နှစ်ဦးနှစ်ဘက်တည်း ဆုံးဖြတ်၍မရသော ကိစ္စများဖြစ်သောကြောင့် ကျန်သည့် ၄ ချက်ကို မဖြတ်ရသေးဟု DPN ခေါင်းဆောင်ပြော

ထျိုးမြာ/ကန္တာရဝတီတိုင်း(မ်)

နိုင်ငံရေးဆိုင်ရာဆွေးနွေးညှိနှိုင်းရေးကိုယ်စားလှယ်အဖွဲ့(DPN)မှ တင်ပြဆွေးနွေးသော အချက် ၈ အနက် ၄ ချက်ကို နှစ်ဦးနှစ်ဘက်သဘောတူလက်ခံနိုင်ပြီသော်လည်း ထပ်မံကျန်ရှိသော ၄ ချက်မှာ ကျန်သည့်တိုင်းရင်းသား လက်နက်ကိုင်အဖွဲ့အစည်းများ၏ ညှိနှိုင်းပြီး သဘောတူညီမှုရယူရန်လိုအပ်သောကြောင့် မဖြတ်နိုင်သေးခြင်းဖြစ်သည်ဟု DPN ခေါင်းဆောင် ခူဦးရယ်က ကန္တာရဝတီတိုင်း(မ်)သို့ ပြောကြားသည်။

ငြိမ်းချမ်းရေးကော်မရှင် (PC)နှင့် နိုင်ငံရေးဆိုင်ရာဆွေးနွေးညှိနှိုင်းရေးကိုယ်စားလှယ်အဖွဲ့ (DPN) တို့သည် ဆဋ္ဌမအကြိမ်အစည်းအဝေးကို ရန်ကုန်မြို့၊ အမျိုသားပြန်လည်သင့်မြတ်ရေးနှင့် ငြိမ်းချမ်းရေးဗဟိုဌာနတွင် သြဂုတ်လ ၁၀ ရက်နေ့နှင့် ၁၁ ရက်နေ့ နှစ်ရက်တာ ကျင်းပ ပြုလုပ်ခဲ့ကြခြင်း ဖြစ်သည်။

တွေ့ဆုံပွဲမတိုင်မှီက UNFC ၏ တင်သွင်းတောင်းဆိုချက်များအပေါ် နှစ်ချက်ကျန်သည် လေးချက်ကျန်သည်စသည့်သတင်းအမျိုးမျိုး ပေါ်ထွက်နေသော်လည်း လက်တွေ့တွင် ၈ ချက်လုံးကို သဘောမတူသေးသည့် ကာလပတ်လုံးတွင် တစ်ချက်မျှ သဘောတူညီနိုင်ပြီဟူ၍ အတည်ပြု၍ မရသေးကြောင်း ခူဦးရယ်က ပြောသည်။

“တစ်ကယ်တမ်း ပြောရရင် ကျနော်တို့ဘက်က တင်ပြဆွေးနွေးတာက ၈ ချက် အဲ့တော့ ၈ ချက်လုံ သဘောမတူသေးသမျှကာလကတော့ တစ်ချက်မှ ကျနော်တို့သဘောတူပြီလို့ ပြောလို့ မရသေးပါဘူး။ ဒါအဓိက အခြေခံပါပဲ။ ဒါပေမဲ့ ကျနော်တို့ ဆွေးနွေးအဖြေရှာဖို့ ကြိုးပမ်းတဲ့အခါမှာ တစ်ချက်ချင်းကို ကျနော်တို့ ဆွေးနွေးရတာဖြစ်တယ်။ အဲ့တော့ တစ်ချက်ဆွေးနွေးတဲ့အခါမှာ ဒီအချက်ကတော့ နှစ်ဘက်စလုံး နားလည်သဘောပေါက် လက်ခံနိုင်ပြီဆိုတဲ့ အဆင့်ကိုပဲ ကျနော်တို့ ထားထားတာဖြစ်တယ်။ အဆုံးဆုံသဘောတူလိုက်ပြီဆိုတဲ့ဟာမျိုးမဟုတ်ပါဘူး ”ဟု DPNခေါင်းဆောင် ကပြောကြားသည်။

အစည်းအဝေးအပြီးတွင် နိုင်ငံရေးဆိုင်ရာဆွေးနွေးညှိနှိုင်းရေးကိုယ်စားလှယ်အဖွဲ့တို့၏ အဆိုပြုချက်အပေါ် ပွင့်ပွင့်လင်းလင်း၊ ရင်းရင်းနှီးနှီးဖြင့် ဆွေးနွေးညှိနှိုင်းဆွေးနွေးခဲ့ကာ ဆွေးနွေးချက်ရလဒ်များကို နှစ်ဦးနှစ်ဘက် သက်ဆိုင်ရာ ခေါင်းဆောင်များထံသို့ ပြန်လည်တင်ပြသွားမည်ဖြစ်ကြောင်း ထုတ်ပြန်ထားသည်ကိုတွေ့ရသည်။

ဆဋ္ဌမအကြိမ်အစည်းအဝေးတွင် တင်သွင်းတောင်ဆိုမှုများအနက်ကျန်ရှိသည့် မူဘောင်ပြန်လည်သုံးသပ်ခြင်းကိစ္စ၊ အပစ်ခတ်ရပ်စဲရေးကိုစောင့်ကြည့်လေ့လာသည့်ကိစ္စ၊ တပ်ပြန်လည်နေရာချထားရေး အငြင်းပွားမှုများဖြစ်ပေါ်လျှင် မည်သို့ဖြေရှင်းကြမည်ဟူသည့်ကိစ္စ၊ ငြိမ်းချမ်းရေးဖြစ်စဉ်တွင် နိုင်ငံတကာမှတတ်သိပညာရှင်များပါဝင်ရေးအတွက် မည်သည့်အခန်းကဏ္ဍတွင်လိုအပ်ကြောင်း စသည့်ကိစ္စများဆွေးနွေးကြကြောင်းသိရသည်။

၎င်းတို့ အကြားတွင် အကြေအလည်ဆွေးနွေးပြီး အားလုံးသဘောတူ လက်ခံနိုင်သော အနေအထားကို ရယူရန်လိုအပ်သည့်အပြင် ဖြစ်စဉ်တစ်ခုလုံးနှင့် နှီးနွယ်သည့်အတွက် မိမိတို့ နှစ်ဘက်တည်းဆုံးဖြတ်ချက်ချ၍ မရသည့်ကိစ္စဖြစ်ကြောင်း ခူးဦးရယ်က ပြောသည်။

“ဥပမာ ဆိုလိုတာကတော့ ကျနော်တို့ ငြိမ်းချမ်းရေးဆွေးနွေးပွဲဖြစ်စဉ်တွေမှာ ကျနော်တို့ တိုင်းရင်းသားလက်နက်ကိုင်တော်လှန်ရေးအဖွဲ့အစည်းတွေဟာ ကျနော်တို့ DPN ထဲမှာကြီးရှိတာ မဟုတ်ဘူး။ NCA ထိုးပြီးသား ကျနော်တို့ညီနောင်တိုင်းရင်းသား ၈ ဖွဲ့ရှိတယ်။ နောက် လုံးဝကျနော်တို့ ဆွေးနွေးပွဲ စားပွဲဝိုင်းပေါ် မရောက်သေးတဲ့ အဖွဲ့အစည်းတွေလည်း ရှိသေးတယ်”ဟု ၎င်းက ဆက်ပြောသည်။

DPN၏ တင်သွင်းတောင်းဆိုမှုများအနက် နှစ်ဦးနှစ်ဘက်သဘောတူလက်ခံနိုင်သောအချက်များမှာ အစိုးရနှင့်တပ်မတော်မှ တစ်နိုင်ငံလုံးအပစ်အခတ်ရပ်စဲကြောင်း ၂၄ နာရီ အတွင်းကြေညာပေးရန်၊ အမျိုးသားတန်းတူရေး ကိုယ်ပိုင်ပြဌာန်းခွင့်နှင့် ဖက်ဒရယ်ဒီမိုကရေစီ ပြည်ထောင်စုနိုင်ငံကို တည်ဆောက်သွားရန်၊ နိုင်ငံရေးတွေ့ဆုံပွဲအဆင့်ဆင့်တွင် အစိုးရ၊ လွှတ်တော်နှင့် တပ်မတော် ကိုယ်စားလှယ်များ တိုင်းရင်းသားလက်နက်ကိုင်အဖွဲ့များနှင့် တရားဝင် နိုင်ငံရေးပါတီများအပြင် ပါဝင်သင့်သည့် ကိုယ်စားလှယ်များ ပါဝင်ရန်နှင့် ၂၁ ရာစုပင်လုံ ညီလာခံမှ ထွက်ပေါ်လာသော ဆုံးဖြတ်ချက်များကို မူတည်ပြီး ဖွဲ့စည်းပုံအခြေခံဥပဒေ အပါအဝင် ဥပဒေများကို ပြင်ဆင်ပြဌာန်းပေးရန် စသည့်တို့ပါဝင်ကြောင်းသိရသည်။

ငြိမ်းချမ်းရေးကော်မရှင် (PC)နှင့် နိုင်ငံရေးဆိုင်ရာဆွေးနွေးညှိနှိုင်းရေးကိုယ်စားလှယ်အဖွဲ့ (DPN)တို့သည် သြဂုတ်လမကုန်ခင်တွင် အလွတ်သဘောပြန်လည်တွေ့ဆုံကြမည်ဖြစ်ပြီး တရားဝင်ဆက်လက်တွေ့ဆုံညှိနှိုင်းနိုင်းရန်ရက်ကို အလွတ်သဘောတွေ့ဆုံချိန်တွင် နေ့သတ်မှတ်မည်ဖြစ်ကြောင်း သိရသည်။

Comments

comments