ဘိန်းစိုက်သူထံမှ သတင်းအချက်အလက် မရရှိသဖြင့် အစားထိုးသီးနှံများ ချပေးရန် အခက်အခဲဖြစ်

မော်ဦးမြာ

ဘိန်းစိုက်တောင်သူများထံမှ တိကျသော အချက်အလက်များ မရရှိသည့်အတွက် ဘိန်းအစားထိုးသီးနှံများ ချပေးရန် အခက်အခဲရှိနေသည်ဟု စိုက်ပျိုးရေး၊မွေးမြူရေးနှင့် ဆည်မြောင်းဝန်ကြီးဌာနမှ ဝန်ကြီး ဦးဘော့စ်ကိုက ပြောကြားသည်။

ဝန်ကြီးများ၊ ဌာနဆိုင်ရာများနှင့် ကျေးရွာအုပ်ချုပ်ရေးမှူးများ မတ်လ ၂၆ ရက်နေ့က အပြန်အလှန်တွေ့ဆုံပွဲတွင် ၎င်းက ပြောကြားခဲ့သည်။

“အချက်အလက်တွေ အကုန်မရလို့ ခုနက ပြောတဲ့ ဧကတွေ မောင်ဖြူ၊ မောင်နီ အကုန်မရလာဘူး မပေးရဲကြဘူးလေ မပူးပေါင်းရဲကြဘူး။ ပူးပေါင်းဖို့ဆိုတာ ဖမ်းဖို့ ဆီးဖို့ မဟုတ်ဘူး အပြောင်းအလဲတစ်ခု လုပ်စေချင်တာ အဲ့လိုအနေအထားပါ။”ဟု ဝန်ကြီးက ပြောသည်။

ဘိန်းစိုက်တောင်သူများအနေဖြင့် မိမိတို့ထံတွင် ရှိသည့် အချက်အလက်များ၊ စိုက်ပျိုးမှုဧကများအား ပွင့်လင်းစွာ ချပြရန် လိုအပ်သည့်အပြင် အစိုးရများနှင့် ပူးပေါင်းဆောင်ရွက်မှသာ ဘိန်းစိုက်ပျိုးမှု ပပျောက်နိုင်မည်ဟု ဆိုသည်။

သို့မှသာ ဘိန်းစိုက်တောင်သူများ လိုချင်သည့် ဘိန်းအစားထိုး သီးနှံများ၊ နှစ်ရှည်ပင်များကိုလည်း သက်ဆိုင်ရာ အစိုးရမှ ချပေးနိုင်မည်ဖြစ်ကြောင်း ၎င်းက ပြောသည်။ စိုက်ပျိုးလိုသည့် စိုက်ပျိုးပင်များကို ဒေသနှင့် ကိုက်ညီသည့် အစားထိုးသီးနှံများအား သက်ဆိုင်ရာ အစိုးရထံ တင်ပြနိုင်ကြောင်းလည်း ဝန်ကြီးဦးဘော့စ်ကိုက လမ်းညွှန်သည်။

အစိုးရနှင့် ပူးပေါင်းပြီး တောင်သူများစိုက်ပျိုးသည့် ဘိန်းအစားထိုးသီးနှံများကိုလည်း ၎င်းတို့မှ ဈေးကွက်များကို ပြန်လည်ရှာဖွေပေးမည်ဖြစ်ကြောင်း ၎င်းက ဆက်ပြောသည်။ “ကျွန်တော်တို့ ပူးပေါင်းပြီဆိုကတည်းက ဘယ်ဈေးနှုန်း ဘယ်ဈေးကွက်ရှိမလဲ ဆိုတာ လာပြီလေ ပူးပေါင်းရတော့မယ် ဘယ်လိုပဲဖြစ်ဖြစ် ကော်ဖီကတော့ ဈေးကွက်ရှိပြီးသားပဲ ခုနကပြောတဲ့ သဘာဝမြေသြဇာအော်ဂဲနစ် ဖြစ်ဖို့ပဲလိုတယ် ကျတော်တို့က ဝယ်တဲ့လူရှိပြီးသားပဲ။”ဟု ပြောသည်။

ယခင်က သက်ဆိုင်ရာ အစိုးရအဖွဲ့မှ ဘိန်းအစားထိုးသီးနှံများ ချပေးသော်လည်း ဒေသနှင့် မကိုက်ညီခြင်း၊ နည်းပညာမသိရှိခြင်း၊ ဈေးကွက်မရှိခြင်းကြောင့် မိမိတို့အတွက် အခက်အခဲရှိကြောင်း ဘိန်းစိုက်တောင်သူများက ဆိုကြသည်။

ဘိန်းပင်များကို ကယားပြည်နယ်၏ အနောက်ဖက်ခြမ်းရှိ ဒီးမော့ဆိုမြို့နယ်နှင့် ဖရူဆိုမြို့နယ်တို့တွင် အများဆုံးစိုက်ပျိုးကြသည်။

Comments

comments