ရွာသားများ၏ ကျောက်ပုံများကို မြေဖို့ပြီး အစားပြန်မရ

 မူအက်စတာ 

ကယားပြည်နယ် ဒီးမော့ဆိုမြို့နယ် ဒေါရောက်ခူကျေးရွာ၏ ဘုရားကျောင်းအုတ်တံတိုင်းတည်ဆောက်ရန် စုပုံထားသည့် ကျောက်ခဲများကို ဆောက်လုပ်ရေးကုမ္ပဏီတစ်ခုမှ ကျောက်ပုံအားမြေဖို့လိုက်ပြီး အစားပြန်မပေးကြောင်း ရွာသားများကဆိုသည်။ 

“ကျနော်တို့ရွာ ဘုရားကျောင်းအုတ်တံတိုင်းဆောက်ဖို့ ရွာသားတွေကိုယ်တိုင် ကျောက်ဆောင်ကိုသွားပြီး လက်နဲ့တူးထားရတာ သူကအဲ့လိုလုပ်လိုက်တော့ ရွာသားတွေမခံချင်ဘူးဖြစ်နေတယ်” ဟု ရပ်ရွာအကျိုးတော်ဆောင် တစ်ဦးက ပြောသည်။

ဒေါရောက်ခူကျေးရွာ ဘုရားကျောင်းအုတ်တံတိုင်းတည်ဆောက်ရန်အတွက် ကျေးရွာသားများမှ အိမ်ထောင်စု သုံးစုလျှင် တစ်ကျင်း သို့မဟုတ် တစ်အိမ်ထောင်လျှင် ငွေကျပ်တစ်သောင်း(၁၀၀၀၀)စီ ထည့်ဝင်ခဲ့ကြသည်။ 

ထူးသစ်ဇော်ကုမ္ပဏီမှ ဘုရားကျောင်းရှေ့မျက်နှာစာတွင် စုပုံထားသည့် ကျောက်ပုံ ၃၁ ကျင်းကို လမ်းလုပ်သည့် ဖေဖော်ဝါရီလအတွင်းက မြေဖို့လိုက်ကြခြင်းဖြစ်သည်။

ထိုအချိန်က ဖယ်ရှားပေးခြင်းလည်းမရှိ၊ ကျေးရွာလူကြီးများနှင့်လည်း တိုင်ပင်ခြင်းမရှိဘဲ ဘက်ဖိုးစက်ဖြစ် မြေစာများနှင့် ဖို့လိုက်ကြောင်းသိရသည်။ 

ရွာသားများမှ ၎င်းတို့၏ ကျောက်များကိုပြန်လည်အစားထိုးရန် တောင်းဆိုခဲ့ပြီး ၎င်းတို့ကုမ္ပဏီမှလည်း ပြန်လည်ပေးမည်ဟုဆိုကာ ၎င်းတို့ စီမံကိန်းဘတ်ဂျက်ကုန်ဆုံးသွားရာ ပြန်လာမပေးတော့ကြောင်း ရွာသားများထံမှ သိရသည်။ 

ထို့အပြင် ၎င်းတို့ တာဝန်ယူဆောက်လုပ်သော ဒီးမော့ဆိုမြို့နယ်၊ ဒေါရောက်ခူ-တောင်ငူလမ်းခွဲ( ၃/၀)မိုင် ကတ္တရာလမ်းခင်းခြင်းလုပ်ငန်းကို နယ်စပ်ဒေသတိုင်းရင်းသားလူမျိုးများ ဖွံ့ဖြိုးတိုးတက်ရေး ဦးစီးဌာန ရန်ပုံငွေ ကျပ်(၃၀၃.၀၀၀)သန်းဖြင့် တာဝန်ယူဆောင်ရွက်ခဲ့ရာ ဘတ်ဂျက်နှစ်ကုန်တွင် လုပ်ငန်း ၁မိုင်ခန့်သာ ပြီးစီးခဲ့ကြောင်း ရွာသားများထံမှ သိရသည်။ 

ပြည်သူ့ငွေစာရင်းစောင့်ကြည့် စစ်ဆေးရေးကော်မတီမှလည်း ၎င်းတို့၏ လုပ်ငန်းကို သွားရောက်စစ်ဆေးပြီး အရေးယူသင့်တာ အရေးယူမည်ဖြစ်ကြောင်း ၎င်းကော်မတီဝင်များထံမှ သိရသည်။

  “ကျနော်တို့ ဒီအဖြေတွေကို သိရဖို့ ကျနော်တို့ကိုယ်တိုင် သွားစစ်မှရမယ်၊ ကျနော်တို့ အမြန်ဆုံးသွားစစ်ကြည့်ပါမယ် ” ဟု ကော်မတီဝင်တစ်ဦးမှ ပြောသည်။

ယခုတွင် ၎င်းတို့စီမံကိန်းနေရာတွင် ကယောရွှေပြည်ကုမ္ပဏီနှင့် ဇေညီနောင် ဆောက်လုပ်ရေးကုမ္ပဏီတို့မှ ဆက်လက်တာဝန်ယူ လုပ်ဆောင်နေကြောင်း သိရသည်။ ထူးသစ်ဇော်ကုမ္ပဏီ လမ်းခင်းစီမံကိန်းမှာ ၂၀၁၆-၁၇ဘတ်ဂျက်ကဖြစ်သည်။

Comments

comments