ရှားတောမြို့က ပညာရေးဝန်ထမ်းအိမ်ယာ နေရာရွေးချယ်မှု၏ နောက်ကွယ်ဂယက်

မူအက်စတာရေးသားသည်။

ရှားတောမြို့နယ်၊ ကေ့ထျိုးဘိုးကွင်းနံဘေးရှိ ၁ ဧကဝန်းကျင်ရှိ မြေနေရာတွင် ပညာရေးဝန်ထမ်းအိမ်ယာ ဆောက်လုပ်ရန် အစပြုနေစဉ်အတောအတွင်း မြေယာပိုင်ဆိုင်မှုအငြင်းပွားစရာများ စတင်လာသည်။

ကယားတိုင်းရင်းသားတို့၏ အထွတ်အမြတ်ထားရာ ကေ့ထျိုးဘိုကွင်းနေရာအား ယင်းအဆောင်အဦးကို လာရောက်ဆောက်လုပ်ခြင်း ခွင့်မပြုဟု ရှားတောမြို့နယ်ကေ့ထျိုးဘိုးအဖွဲ့နှင့် ဖေစိုးလေးအဖွဲ့က ကြေညာထုတ် ကန့်ကွက်သည်။

မူလက ယင်းနေရာကို မြို့နယ်ဘောလုံးကွင်းတည်ဆောက်ရန် လျာထားသဖြင့် ကေ့ထျိုးဘိုးကော်မတီက ခွင့်ပြုပေးခဲ့သည်ဟု ဆိုသည်။

သို့သော် ခွင့်ပြုထားသော ဘောလုံးကွင်းအဖြစ် အကောင်အထည်ဖေါ်ခြင်းမဟုတ်ဘဲ ဝန်ထမ်းအိမ်ယာဆောက်လုပ်နေခြင်းကို ရပ်တန့်ထားရန် ၎င်းတို့က တာဝန်ရှိသူထံ တောင်းဆိုလိုက်သည်။

၂၀၁၇-၁၈ ဘဏ္ဍာရေးနှစ် ပိုလျှံရန်ပုံငွေ ကျပ်သန်း ၂၃၀ ဖြင့် ပေ ၁၅၀ ၊ ၃၀ ( ၆ )ခန်းတွဲ နှစ်ထပ် (အ.ထ.က)ရှားတောမြို့ ပညာရေးဝန်ထမ်းအိမ်ယာအတွက် ဖေဖေါ်ဝါရီလမှစ၍ တည်ဆောက်နေခြင်းဖြစ်သည်။

မြို့နယ်ဘောလုံးကွင်းဆောက်ရန် မြို့အာဏာပိုင်များနှင့် နှစ်ဖက်သဘောတူခဲ့ပြီး လာရောက်တိုင်းတာခြင်းများပြုလုပ်ရာ ဘောလုံးကွင်းဆောက်လုပ်ရန် နေရာအကျယ်အဝန်းမလုံလောက်သဖြင့် ဝန်ထမ်းအိမ်ယာကိုသာ ဆောက်လုပ်ရန် ဆုံးဖြတ်ခဲ့သည်။

အိမ်ယာဆောက်လုပ်ပါက ကေ့ထျိုးဘိုးကွင်းဧရိယာတွင် ကျရောက်နေသည်ဟုဆိုသည့် ယင်းနေရာတွင် တစ်နှစ်တစ်ကြိမ် ရိုးရာပွဲကျင်းပချိန် နေရာအကျပ်အတည်းနှင့် ရင်ဆိုင်ရမည့်အပေါ် စိုးရိမ်မှုများလည်း ရှိနေသည်။

“ဒီလိုကွင်းအလယ်တည့်တည့်မှာ အိမ်ယာလာဆောက်တဲ့အခါ ကျွန်တော်တို့ ရိုးရာပွဲ ကတဲ့အခါကျရင် သူတို့အိမ်ကို ဝိုင်းပတ်ပြီး ကရမလား၊ ဘယ်လိုမှမဖြစ်နိုင်ဘူး”ဟု ဖေစိုးလေးလူငယ်အဖွဲ့ဝင်တစ်ဦးဖြစ်သူက ဖေဖော်ဝါရီလ ၂၇ ရက်နေ့တွင် ရှားတောမြို့နယ်ရှိ ရပ်မိရပ်ဖ၊ ကေ့ထျိုးဘိုးဂေါပကအဖွဲ့၊ ဖေစိုးလေးလူငယ်အဖွဲ့တို့၏ တွေ့ဆုံပွဲ၌ ပြောသည်။  

အိမ်ယာဆောက်လုပ်မည့်နေရာသည် ကေ့ထျိုးဘိုးကွင်းမဟုတ်ဘဲ မြေစာရင်းမှ ပုံစံထွက်ထားပြီးသားဖြစ်ကြောင်း မဲဆန္ဒနယ်အမှတ် (၇) အမျိုးသားလွှတ်တော်ကိုယ်စားလှယ် ဦးအောင်ကျော်စိုးက ပြောသည်။

“အခုဝန်ထမ်းအိမ်ရာဆောက်မယ့်နေရာက ဘောလုံးကွင်အဟောင်း၊ ကေ့ထျိုးဘိုးကွင်းမဟုတ်ဘူး၊ ဘောလုံးကွင်းအဟောင်းက အရင်အစိုးရလက်ထက်တည်းက ပေးထားတာ။ ကေ့ထျိုးဘိုးကွင်းနေရာက သပ်သပ် ဒါနဲ့မဆိုင်ဘူး၊ တကယ်တမ်းပြောရမယ်ဆိုရင် လမ်းတစ်ကြောင်းတောင်ခြားသေးတယ်။ မြို့ပြစီမံကိန်းရဲ့လမ်းတောင် ခြားသေးတယ်။ ပုံစံ ၁၀၅ ထွက်ပြီးသား ကေ့ထျိုးဘိုးကွင်းနေရာက။ အခုဝန်ထမ်းအိမ်ရာလည်း အား/ကာက မြေထွက်ပြီးသား။ သူတို့ အဲ့နေရာက ပုံစံတွေထွက်ထားပြီးသားပဲလေ၊ ဦးလှထွန်းကိုယ်တိုင် ပေးထားတာ”ဟု ၎င်းက ပြောသည်။

သို့သော် ရှားတောမြို့နယ် ကေ့ထျိုးဘိုးဂေါပက၏ နာယကတစ်ဦးဖြစ်သူ ဦးလှထွန်းကမူ ယင်းနေရာအား ဘောလုံးအားကစားကွင်းအတွက် ခွင့်ပြုပေးခဲ့ခြင်းဖြစ်ပြီး ဝန်ထမ်းအိမ်ယာဆောက်လုပ်ရန် ခွင့်ပြုခဲ့ခြင်း မဟုတ်ကြောင်း ပြန်လည်တုန့်ပြန်သည်။

အိမ်ယာတည်ဆောက်ရေးလုပ်ငန်းကို ဖေဖေါ်ဝါရီ နောက်ဆုံးအပတ်က တွေ့ရစဉ် (ဓါတ်ပုံ- မူအက်စတာ)

“ဦးလှထွန်းကပဲပေးထားတယ်ဆိုလည်း ကျွန်တော်ပေးတဲ့ဟာလည်း အထောက်အထားရှိသလား။ မြို့နယ်အားကစားကွင်းဖြစ်ရင်တော့ ကျွန်တော်ပေးနိုင်တယ်၊ ကျွန်တော်ဒါပဲ ပြောတယ်၊ အခုတော့ မြို့နယ် အားကစားကွင်းမဖြစ်တော့ လာယူသွားတာလည်း လာရောက်တိုင်းထွာသွားတာလည်း ကျွန်တော်တို့ ကေ့ထျိုးဘိုးအဖွဲ့ကို ဘာမှမတီးခေါက်ဘူး၊ ဒါကြောင့် လုံးဝမစွန့်လွှတ်နိုင်ဘူးဆိုပြီးတော့ ကျွန်တော်တို့ တင်လိုက်တယ်”ဟု ဦးလှထွန်းက ပြောသည်။

ယခုကွင်းနေရာသည် ရိုးရာအရ ယဇ်ပူဇော်ရန် ကြက်ရိုးထိုး၊ ဝက်သတ်ထားသည့်နေရာ ရိုးရာကွင်းဖြစ်နေသဖြင့် လာရောက်နေထိုင်သူများလည်း အဆင်မပြေမည် စိုးရိမ်ကြောင်း ကေ့ထျိုးဘိုးဂေါပက အဖွဲ့ဝင် ဦးဌေးရယ် ပြောသည်။

“ရိုးရာကွင်းသတ်မှတ်တဲ့နေရာမှာ ကျွန်တော်တို့တွေ ကြက်ရိုးတွေထိုးရပါတယ်။ ဝက်တွေသတ်ပြီး မြေပေါ်မှာ ရှင်းရှင်းပြောရရင် ကျိန်စာတိုက်တဲ့သဘောလုပ်ထားပါတယ်။ အဲ့ဒီတော့ နေတဲ့သူတွေအနေနဲ့လည်း အနှောက်အယှက်မျိုးစုံတော့ ကြုံတွေ့ရမှာပဲ ဖြစ်ပါတယ်”

၂၀၁၂ ခုနှစ်တွင် ၎င်းမြေနေရာကို မြို့နယ်ကေ့ထျိုးဘိုးကွင်းဆောက်လုပ်ရန် ပေ ၁၂၀၀/၇၅၀ ပေးအပ်ထားခြင်းဖြစ်ကြောင်း ကန့်ကွက်သူများက ဆိုသည်။

“ဒီ ၂၀၁၅/၁၆မှပဲ Town Plan တွေ ဆွဲခဲ့တာပါ။ ဒီလိုဆွဲတဲ့အပေါ်မှာ ကျွန်တော်တို့အဖွဲ့ကို အသိပေးခြင်းမရှိပါဘူး။ အခုချိန်မှာ ကျွန်တော်တို့ကွင်းရဲ့ အလယ်တည့်တည့်မှာ ဝန်ထမ်းအိမ်ယာ လာဆောက်မယ်ဆိုရင် ကျွန်တော်တို့ သဘောမတူတာမဟုတ်ဘူး။ ဝန်ထမ်းအိမ်ရာဆောက်မယ်ဆိုရင် အခြားနေရာဆောက်ပေးဖို့ပဲ လူငယ်တွေက တောင်းဆိုခဲ့ကြတာပါ။ ဘာလို့လဲဆိုရင် ဝန်ထမ်းအိမ်ရာဆောက်လိုက်မယ်ဆိုရင် ကျွန်တော်တို့ ပွဲကျင်းပတဲ့အခါကျရင် အဆင်ပြေနိုင်မယ့် အလားအလာမရှိတဲ့အတွက်ကြောင့်ပါ။” ဟု ဦးဌေးရယ်က ဆက်ပြောသည်။

ဖေဖော်ဝါရီလ ၂၇ ရက်နေ့တွင် ရှားတောမြို့နယ်ရှိ ရပ်မိရပ်ဖ၊ ကေ့ထျိုးဘိုးဂေါပကအဖွဲ့၊ ဖေစိုးလေးလူငယ်အဖွဲ့တို့မှ စုပေါင်းလျက် အုပ်စု ၃ စု၏ အစည်းအဝေးတစ်ရပ်ကျင်းပပြီး ယင်းမြေနေရာတွင် အိမ်ယာဆောင်လုပ်မှုကို လက်မှတ်ထိုး ကန့်ကွက်ကာ၊ ကြက်ရိုးထိုးခဲ့ကြသည်။

ကြက်ရိုးထိုးရာတွင် အဆိုပါမြေကို စွန့်လွှတ်ခြင်းမပြုနိုင်ကြောင်း ရလဒ်ထွက်သည်ဟု ဆိုသည်။

“သူတို့ကို ဖယ်ခိုင်းတယ်၊ သူတို့မသိလို့ပဲ လုပ်မိတယ်လို့ပဲ ကျွန်မထင်တယ်၊ သူတို့ကို မြေယာပြန်ဖယ်ခိုင်းတယ် မြေအစားထိုးလို့ရတယ်ပေါ့၊ ဒါပေမဲ့ ကယားတွေရဲ့ စိတ်ဒဏ်ရာကို အစားထိုးလို့မရဘူး။”ဟု ဖေစိုးလေးလူငယ် အတိုင်ပင်ခံ ဒေါ်ပိုးမယ်က ပြောသည်။

Comments

comments