ရေရှည်တည်တံ့သည့် ငြိမ်းချမ်းရေး တည်ဆောက်နိုင်ရေး ဂျန်ဒါ ကျွမ်းကျင်ပညာရှင်များ တောင်းဆို

ထျိုးမြာ
အနာဂတ်တွင် ရေရှည်တည်တံ့သောငြိမ်းချမ်းရေးကိုတည်ဆောက်နိုင်ရေးတွင် ကျား- မရေးရာဂျဲန်ဒါ ဆန်းစစ်မှုများကို ပြုလုပ်ပြီး အစိုးရနှင့် တိုင်းရင်းသားလက်နက်ကိုင် အဖွဲ့အစည်းများ ပါဝင်ဖွဲ့စည်းထားသည့် အဖွဲ့အစည်းများတွင် ဂျဲန်ဒါကျွမ်းကျင်သည့် ပညာရှင်များထားရှိရန် ကျား-မ တန်းတူရေးရာမဟာမိတ်အဖွဲ့ (AGIPP) က စက်တင်ဘာ လ(၃)ရက်က ကြေငြာချက်တစ်စောင်ထုတ်ပြန် တောင်းဆိုလိုက်သည်။
အဆိုပါ ကြေညာချက်မှာ ၄ ရက်ကြာကျင်းပခဲ့သည့် ပြည်ထောင်စုငြိမ်ချမ်းရေးညီလာခံ ၂၁ရာစုပင်လုံ ပထမအကြိမ်အစည်းအဝေးအပြီးတွင် ထုတ်ပြန်လိုက်ခြင်းဖြစ်သည်။
ကျား-မတန်းတူရေးရာမဟာမိတ်အဖွဲ့ (AGIPP) ပဲကိုင်ကော်ရှင်ကော်မတီဝင် ဒေါ်သင်းသင်းအောင်က “ ကျွမ်းကျင်ပညာရှင်ဆိုတာက ကျား-မရေးရာကဏ္ဍနဲ့ ပတ်သက်ပြီး တွေးခေါ်တတ်တဲ့သူ၊ မျှတဖို့ ။ကျားကော မကော ပါဝင်မှုဘယ်လောက်ရှိသလဲ။ ဆုံးဖြတ်ချက်တစ်ခု၊ မူဝါဒတစ်ခုချလိုက်ပြီဆိုရင် အမျိုးသမီးတွေကို ဘယ်လောက်ထိ အကျိူးပြု သလဲ၊ အမျိူးသားတွေအတွက်ကော ဘယ်လောက်ထိအကျိူးပြုခဲ့သလဲဆိုတာကို ဆန်းစစ် လေ့လာနိုင်တဲ့သူတွေ၊ လက်တွေ့ကျကျ ခွဲခြားစိတ်ဖြာပေးနိုင်တဲ့ အသိပညာရှင် အတတ် ပညာရှင်မျိုးကို ပြောတာပါ” ဟု AGIPP အဖွဲ့အနေဖြင့် တောင်းဆိုသည့် ကျွမ်းကျင်ပညာရှင်အမျိုးအစားကို ပြောသည်။
အဆိုပါ အဖွဲ့၏ ထုတ်ပြန်ချက်တွင် ပြည်ထောင်စုငြိမ်ချမ်းရေးညီလာခံ၂၁ ရာစု ပင်လုံ ပထမအကြိမ်ညီလာခံသို့ အစုအဖွဲ့အသီးသီးမှ တက်ရောက်လာသူများတွင် အမျိုး သမီးပါဝင်မှုနှုန်း ၁၃ ရာခိုင်နှုန်းခန့်ရှိလာသည့်အတွက် ပြီးခဲ့သည့် ဇန်န၀ါရီလအတွင်းပြုလုပ်သည့် ပထမအကြိမ်ပြည်ထောင်စုညီလာခံထက်စာလျှင် ၆ ရာခိုင်နှုန်းခန့် ပိုမိုပါဝင် လာကြောင်း၊ယခုအကြိမ်အစည်းအဝေးတွင် တိုင်းရင်းသားလက်နက်ကိုင်အစုအဖွဲ့မှ တက်ရောက်သူများတွင် အမျိုးသမီးပါဝင်မှုမှာ ၂၀.၅ ရာခိုင်နှုန်းရှိသည့်အတွက် အခြားအ စုအဖွဲ့များထက် အမျိုးသမီးပါဝင်နှုန်း အများဆုံးဖြစ်နေသည်ဟု ဖော်ပြထားသည်။

အစုအဖွဲ့အသီးသီးက ယခုအကြိမ်တွင် တင်သွင်းသည့် စာတမ်း (၇၂) စောင်တွင် အမျိုးသမီးအရေးနှင့် ကျား – မတန်းတူညီမျှရေးအချက်ကို ထည့်သွင်းဖော်ပြ ထားသော စာတမ်း (၂၁) ခုရှိပြီး စာတမ်းစုစုပေါင်း၏၂၉ % သည် ကျား – မ တန်းတူညီမျှရေးကို ထည့်သွင်းဖော်ပြထားပြီး စာတမ်းအများစုတွင် စစ်ပွဲပဋိပက္ခကြောင့် ခံစားနေရသော အမျိုး သမီးများကို လူမှုရေးစောင့်ရှောက်မှုများပေးရန်၊တရားမျှတသော ကာကွယ်စောင့်ရှောက်မှုပေးရန်နှင့် အဆင့်တိုင်းတွင် အမျိုးသမီးများ၏ ပါဝင်မှုရှိစေရန် တိုက်တွန်း ဖော်ပြချက်ကို တွေ့ရှိရကြောင်း ထုတ်ပြန်ထားသည်။

 

အဆိုပါ ထုတ်ပြန်ချက်တွင် နိုင်ငံရေးပါတီများ၊ တိုင်းရင်းသားကိုယ်စားလှယ်များနှင့်ပါဝင်သင့်ပါဝင်ထိုက်သူများအစုအဖွဲ့ များမှလည်း အမျိုးသမီးများ ဆုံးဖြတ်ချက်ချသည့် နေရာတွင် ပါဝင်မှု၊ အမျိုးသမီးများအပေါ်အကြမ်းဖက်သူများကို ပြစ်ဒါဏ်မှ ကင်းလွတ်ခြင်းမရှိစေရန်၊ ကျား – မ တန်းတူညီမျှရေးမူဝါဒများ ချမှတ်ရေး၊ ကမ္ဘာ့ကုလသမဂ္ဂ လုံခြုံရေး ကောင်စီ၏ ဆုံးဖြတ်ချက်အမှတ် ၁၃၂၅၊ ၁၈၂၀ နှင့်နိုင်ငံတကာစံနှုန်းများကို လိုက်နာသင့်ကြောင်း၊ ကျား – မ ရေးရာတန်းတူညီမျှမှုကို အာမခံသောလုံခြုံရေးကဏ္ဍပေါင်းစည်းရေးမူ ဖြစ်စေရန်လိုအပ်ကြောင်း ၊ လုံခြုံရေးကဏ္ဍပြုပြင်ပြောင်းလဲရေး (SSR)ပြုလုပ်ရာတွင်လည်း အမျိုးသမီးများ၏လုံခြုံရေးကို ထည့်သွင်း စဉ်းစားရန် အကြံပြုထားသည်ကို တွေ့ရသည်။

တစ်နိုင်ငံလုံးအပစ်အခတ်ရပ်စဲရေး သဘောတူစာချုပ် (NCA) အရ ကျင်းပသည့် အမျိုးသားအဆင့်နိုင်ငံ ရေးဆွေးနွေးပွဲများတွင် အစုအဖွဲ့တိုင်းက အမျိုးသမီးပါဝင်မှု ၃၀ ရာခိုင်နှုန်းပါဝင်ရန် မဖြစ်မနေလုပ်ဆောင် ရမည်ဖြစ်ကြောင်း ပြည်ထောင်စုငြိမ်းချမ်း ရေးညီလာခံ – (၂၁) ရာစုပင်လုံပထမအစည်းအဝေးကျင်းပရေး ပူးတွဲကော်မတီဝင်ဦးဇော်ဌေးက စက်တင်ဘာလ ၂ ရက်က ကျင်းပသည့် သတင်းစာရှင်းလင်းပွဲတွင် ပြောသည်။

“မူဘောင်တွေ အတည်ဖြစ်သွားပြီး NCA အရ ကျင်းပတဲ့ နိုင်ငံရေးဆွေးနွေးပွဲတွေမှာ အမျိုးသမီးပါဝင်မှု ၃၀ ရာခိုင်နှုန်းပါမှာဖြစ်တယ် ။ ၃၀ ရာခိုင်နှုန်း ပါမယ်ဆိုရင် အစုအဖွဲ့တိုင်းက ၃၀ ရာခိုင်နှုန်းပါရမှာ ဖြစ်တယ်’’ဟု၎င်း က ပြောသည်။
ထို့ပြင် ပစ်ခတ်တိုက်ခိုက်မှုရပ်စဲရေးဆိုင်ရာပူးတွဲစောင့်ကြည့်ရေးကော်မတီအဆင့်ဆင့်တွင် အမျိုးသမီး ၃၀ရာခိုင်နှုန်းပါဝင်ရန် ကြိုးစားမည်ဟုဆိုသော်လည်း အဆိုပါ ကော်မတီ၏ ပြည်ထောင်စုအဆင့်တွင် အမျိုးသမီးပါဝင်မရှိသလောက်နည်းပါးနေပြီး ပြည်နယ်အဆင့်နှင့် ဒေသဆိုင်ရာအဆင့် ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲစောင့်ကြည့်ရေးကော်မတီများတွင် အမျိုးသမီးပါဝင်မှုနှုန် ၃၀ရာခိုင်နှုန်းပါဝင်အောင် မဖြစ်မနေလုပ်ဆောင်နေသည်ဟုလည်း ပြည်ထောင်စုအဆင့် ပစ်ခတ်တိုက် ခိုက်မှုရပ်စဲရေးဆိုင်ရာ ပူးတွဲစောင့်ကြည့်ရေးကော်မတီအဖွဲ့ဝင် ဒေါက်တာမင်းဇော်ဦးက ပြောကြားထားသည်။

၂၀၁၁ခုနှစ်မှ၂၀၁၅ခုနှစ်အထိငြိမ်းချမ်းရေးလုပ်ငန်းစဉ်တွင် အမျိုးသမီးပါဝင်မှုသည် တစ်နိုင်ငံလုံးအပစ်အခတ်ရပ်စဲရေးဆိုင်ရာညှိနှိုင်းရေးအဖွဲ့ ၁၆ဦးတွင် အမျိုးသမီးတစ်ဦး၊ အဆင့်မြင့်ကိုယ်စားလှယ်အဖွဲ့၁၅ဦးတွင် အမျိုးသမီး၂ဦး၊ ပြည်ထောင်စုငြိမ်းချမ်းရေး ဖော်ဆောင်ရေးလုပ်ငန်းကော်မတီ(၅၂)ဦးတွင် အမျိုးသမီးနှစ်ဦးနှင့် ပြည်ထောင်စုငြိမ်း ချမ်းရေးဆွေးမှုပူးတွဲကော်မတီ (၄၈)ဦးတွင် အမျိုးသမီးသုံးဦးသာ ပါဝင်လျှက်ရှိသည်။

Comments

comments

Leave a Reply

Your email address will not be published. Required fields are marked *