ပြည်နယ်အစိုးရ ငွေကြေး စီမံခန့်ခွဲမှုအားနည်းခြင်းနှင့် စည်းကမ်းချိုးဖောက်ခြင်း လွှတ်တော်မှာဆွေးနွေးခဲ့ကြ

ကန္တာရဝတီတိုင်းမ်

ပြည်နယ်အစိုးရကနေ ခွင့်ပြုငွေတွေ အချိန်မှီမသုံးစွဲနိုင်တဲ့အတွက် ပြန်အပ်နှံနေရတာတွေ ၊ ဘဏ္ဍာရေးစည်းမျဉ်းစည်းကမ်းချိုးဖောက်တာတွေ ရှိတယ်လို့ ပြီးခဲ့တဲ့ ဧပြီလ ၄ ရက်နေ့က ပြုလုပ်တဲ့ ဒုတိယအကြိမ် ကယားပြည်နယ်လွှတ်တော် ၁၃ ကြိမ်မြောက် ပုံမှန်အစည်းအဝေးမှာ တိုက်ရိုက်ထုတ်လွှင့်မှုတဆင့်ကနေ သိရပါတယ်။

ပထမနေ့မှာပဲ ကယားပြည်နယ်စာရင်းစစ်ချုပ် ဦးအောင်မောင်းက ကယားပြည်နယ် ၂၀၁၇-၂၀၁၈ ခုနှစ် ပြည်နယ် ရံပုံငွေအရ ဌာနဆိုင်ရာသီးသီးက ရသုံးဆိုင်ရာစာရင်းနှင့် ပတ်သက်ပြီးတော့ စစ်ဆေးတွေ့ရှိချက် အစီရင်ခံစာကို လွှတ်တော်မှာ တင်ပြသွားပါတယ်။

အစီရင်ခံစာမှာ အစိုးရရဲ့ ငွေကြေးစီမံခန့်ခွဲမှု အားနည်းတာတွေ၊ လုပ်ငန်းစီမံကိန်းမစမီ ကွင်းဆင်းပြီး ကြိုတင်ပြင်ဆင် တွက်ဆထားဖို့ အသုံးစရိတ်တွေကို စိစစ်သုံးစွဲဖို့ သတိပေးသွားပါတယ်။

အဲဒီနောက်မှာတော့ ဒုတိယနေ့မှာ လွှတ်တော်ကိုယ်စားလှယ် အသီးသီးက တင်ပြဆွေးနွေးသွားခဲ့ပါတယ်။

ပြည်နယ်လွှတ်တော်ထဲမှာ ဖရူဆိုမြို့နယ် မဲဆန္ဒနယ်အမှတ်(၁) မှ ဦးသဲရယ်က အစိုးရရဲ့ ငွေကြီးကြပ်သူအရာရှိမှာ ဝန်ကြီးချုပ်ဖြစ်ပြီး၊ ငွေထုတ်သူအရာရှိမှာ အထွေထွေအုပ်ချုပ်ရေးမှူးဦးစီးဌာနရဲ့ ဒုတိယညွန်ကြားရေးမှူးတွေပဲ ဖြစ်တယ်​လို့ ဆိုပါတယ်​။

အခုလို ဘဏ္ဍာရေးဆိုင်ရာ စည်းမျဉ်းစည်းကမ်း ချိုးဖောက်မှုတွေဟာ အဓိက ဝန်ကြီးချုပ်နဲ့ အထွေထွေအုပ်ချုပ်ရေးမှူးတွေဖြစ်တယ်လို့ တင်ပြဆွေးနွေးသွားခဲ့ပါတယ်။

ပြည်နယ်အစိုးရဝန်ကြီးချုပ်နဲ့ အထွေထွေအုပ်ချုပ်ရေးမှူးတွေက ဘဏ္ဍာငွေကြေးဆိုင်ရာစီမံအုပ်ချုပ်မှု ကဏ္ဍတွေမှာ ညံ့ဖျင်းပြီး ဘဏ္ဍာရေးစည်းမျဉ်းစည်းကမ်းတွေ ချိုးဖောက်နေတယ်လို့ ဆိုပါတယ်။

အထွေထွေပိုလျှံရံပုံငွေ (GRF )မှ မယ်စဲ့မြို့နယ်တွင်ပေးသည့် လုပ်ငန်းတန်ဖိုး ကျပ်သန်းပေါင်း ၄.၈၀၀ သည်လည်း ဈေးသစ်ဆောက်ရာတွင် အကုန်ဖျက်ဆီးသိမ်းခဲ့ရသည့် လုပ်ငန်းများဖြစ်သည့်အတွက် ပြည်သူ့ဘဏ္ဍာငွေကို အလေအလွင့်တွေဖြစ်စေခဲ့တယ်လို့ လွှတ်တော်မှာဆွေးနွေးသွားပါတယ်။

ဘဏ္ဍာနှစ်ကုန်ဆုံးချိန်မှာ ငွေလုံးမှ (၁၅၁)သိန်းကျော်ကို CF 008832 သို့ လွှဲပြောင်းကာ ၂၀၁၈ ဧပြီလ ၁၁ရက်နေ့တွင် ထုတ်ပေးထားခြင်းသည် ဘဏ္ဍာရေးစည်းမျဉ်းကို ကြီးမားစွာ ချိုးဖောက်ခြင်းဖြစ်သည်ဟုလည်း ဦးသဲရယ်က ထပ်ဆွေးနွေးထားပါတယ်။ ဆိုလိုတာက လုပ်ငန်းကြီး ဝယ်ယူရေးအတွက် ငွေပမာဏအများအပြားကို ထုတ်ပြီး ပြည်နယ်အစိုးရက မြန်မာ့စီးပွားရေးဘဏ်မှာ အကောက်တစ်ခုဖွင့်ပြီး ထည့်ထားတာဟာ ဥပဒေနဲ့မညီကြောင်း ဖွင့်လှစ်ခွင့်မရှိကြောင်း ဆိုလိုတာဖြစ်ပါတယ်။

“ ကျွန်တော်တို့ ဆွေးနွေးအကြံပြုတဲ့အပေါ်မှာ အဓိကဘာတွေ့ရလဲဆိုတော့ လုပ်ငန်းတစ်ချို့က လျာထားပြီးတော့မှ ကာလကျော်လွန်ပြီးတော့ မလုပ်နိုင်တဲ့ လုပ်ငန်းတွေရှိပြီးတော့မှ ငွေပြန်အပ်ရတဲ့ လုပ်ငန်းတွေရှိတယ်။ နောက်ပြီးတော့မှ တင်ဒါကိစ္စဆိုလို့ရှိရင် တင်ဒါလျှောက်လွှာကို လုပ်ငန်းသတ်မှတ်နှုန်းထက် ကျော်လွန်ပြီး လုပ်ငန်းရောင်းချတာမျိုးတွေ တွေ့နေရတယ်ပေါ့နော။ ” ဟု ဦးသဲရယ်က ကန္တာရဝတီတိုင်း(မ်)ကို ပြောသည်။

ကယားပြည်နယ် ၂၀၁၈-၂၀၁၉ ခုနှစ် ဘဏ္ဍာငွေ စိစစ်ချက်မှာ နယ်စပ်ဒေသနှင့် တိုင်းရင်းသားလူမျိုးများ ဖွံ့ဖြိုးတိုးတက်ရေး ဦးစီးဌာနမှ လုပ်ငန်းတွေကို ကွင်းဆင်းစစ်ဆေးတဲ့အခါမှာ ဝန်ကြီးဌာနဆိုင်ရာတွေက ကွင်းဆင်းစစ်ဆေးမှု အားနည်းနေတာကို တွေ့ရတယ်လို့ ဖရူဆိုမြို့နယ် မဲဆန္ဒနယ်အမှတ် (၂)မှ ဦးခင်မောင်ထွန်း က လွှတ်တော်မှာ ဆွေးနွေးတင်ပြသွားပါတယ်။

ပြည်ထောင်စုငွေတွေကို မတ်လအထိ ငွေလုံးတွေထုတ်ထားပေမယ့်လည်း ၂၀၁၇ ခုနှစ် မေလ အထိ လုပ်ငန်းတွေ မပြီးသေးဘူးလို့ ဆွေးနွေးသွားပါတယ်။

သတ်မှတ်ချိန်ထိ လုပ်ငန်းတွေမပြီးပေမယ့်လည်း ဒဏ်ငွေပေးဆောင်ခိုင်းတာမျိုး မရှိတဲ့အပြင် ရန်ပုံငွေအသုံးစရိတ် ကြိုပေးထားတာကိုလည်း တွေ့ရပါတယ်။ ဒါတွေက ဘဏ္ဍာရေးစည်းမျဉ်းစည်းကမ်းကို ချိုးဖောက်နေပါတယ်။

ရွာသစ်၊ စွတ်ပိုင်၊ ဝမ်အောင်း လုပ်ငန်းနဲ့ပတ်သက်ပြီး ဌာနမှ ကြီးကြပ်မှုအားနည်းခြင်း သက်ဆိုင်ရာ အင်ဂျင်နီယာဌာနကနေ တင်ပြလာတဲ့အပေါ် အရေးယူဆောင်ရွက်ဖို့နဲ့ လုပ်ငန်းပြီးမြောက်မှုကို လွှတ်တော်တင်ပြဖို့ လိုတယ်လို့ ဆွေးနွေးသွားပါတယ်။

အစိုးရအဖွဲ့ကလည်း စီမံကိန်းရေးဆွဲတဲ့အခါမှာ စာချုပ်တွေ စည်းမျဉ်းစည်းကမ်းတွေ သေချာလုပ်ဖို့၊ အခွန်ပေးဆောင်ဖို့ စနစ်တကျရှိဖို့၊ အရည်သွေးပြည့်မှီအောင်ဆောင်ရွက်ဖို့ တိုက်တွန်းထားပါတယ်။

လျာထားချက်မပြည့်တာကိုတွေ့ရပါတယ်။ သက်ဆိုင်ရာဝန်ကြီးတွေက အနီးကပ်ကြီးကြပ်ရမှာဖြစ်တယ်လို့ ဆိုပါတယ်။

ရုံးသုံးပစ္စည်းများ ဝယ်ယူရာတွင်လည်း ပစ္စည်းများသာ တွေ့ရပြီး စာရင်းများမှတ်တမ်းတင်ထားခြင်းမရှိကြောင်း သိရသည်။ ၎င်းအချက်များသည်လည်း စည်းမျဉ်းစည်းကမ်းကို ချိုးဖောက်ခြင်းဖြစ်ကြောင်းနှင့် ၎င်းအပေါ် ထိရောက်သည့် အရေးယူမှုများကို အစိုးရမှ လုပ်ဆောင်သင့်ကြောင်း အကြံပြုခဲ့ကြသည်။

လွိုင်ကော်မြို့နယ် မဲဆန္ဒနယ် အမှတ် (၁)မှ ကိုယ်စားလှယ်လည်းဖြစ်၊ ပြည်နယ်အစိုးရအဖွဲ့မှ စည်ပင်သာယာရေးနှင့် လူမှုရေးဝန်ကြီး ဒေါက်တာအောင်ကျော်ဌေးက ၂၀၁၇-၁၈ ခုနှစ်ဘဏ္ဍာရေးနှစ် ဘဏ္ဍာငွေအရအသုံးစရိတ်ကို လွှတ်တော်ထဲမှာ အခုလိုပြန်ရှင်းပြသွားပါတယ်။

“ဌာနဆိုင်ရာအသီးသီးက လိုက်နာဆောင်ရွက်ရာတွင် ပြီးပြတ်သည့်လုပ်ငန်းများ ရှိသကဲ့သို့ ဆောင်ရွက်ဆဲကိစ္စများလည်း ရှိသည့်အတွက် ပိုမိုပြည့်စုံသည့် ၂၀၁၇-၁၈ဘဏ္ဍာငွေအရအသုံးစာရင်းနဲ့ စစ်ဆေးတွေ့ရှိချက် အကျဉ်းချုပ်အစီရင်ခံစာ ဖြစ်စေရေးအတွက် ဌာနအသီးသီး၏ စစ်ဆေးတွေ့ရှိချက် အစီရင်ခံစာကို လိုက်နာဆောင်ရွက် အကောင်အထည်ဖော်မှုအခြေအနေအား စောင့်ကြည့်ရေးသားပြီးတော့ ပြည်နယ်လွှတ်တော်နှင့် ပြည်နယ် စာရင်းစစ်ချုပ်တို့အား ပြန်လည်တင်ပြသွားမည်” လို့ ပြန်လည် တင်ပြဆွေးနွေးသွားပါတယ်။

Comments

comments