ကန္တာရဝတီတိုင်း(မ်)
ကရင်နီပြည်၊ ဖရူဆိုမြို့နယ်၊ ဒေါလာစောကျေးရွာ အုပ်စုထဲက စစ်ဘေးရှောင်တွေဟာ ကုန်စျေးနှုန်းကြီးမြင့်လာတဲ့နောက်ပိုင်း မီးဖိုဆောင် အသုံးစရိတ်တွေကို လျော့ချလာရတယ်လို့ ဆိုပါတယ်။
“အသားငါးဆို တစ်လမှ တစ်ကြိမ်ပဲ ဝယ်စားရတယ်၊ အထောက်အပံ့နဲ့တော့ အားထားရတယ်၊ ဘာဖြစ်လဲဆို ဝင်ငွေမရှိလို့လေး၊ ဒီနောက်ပိုင်းတောင်မှ ကိုယ်လုပ်နေတဲ့ မုန့်လုပ်ငန်းတောင် တစ်ပတ်တစ်ခါပဲ လုပ်ဖြစ်တော့တယ်။” လို့ စစ်ဘေးရှောင်အမျိုးသမီး တစ်ဦးက ဆိုပါတယ်။
ဖရူဆိုမြို့နယ် ဒေါလာစောကျေးရွာ အုပ်စုက ဒေသခံတွေဟာ ရွေ့ပြောင်းတောင်ယာကိုလုပ်ကိုင်ကြပေမယ့် အဆိုပါဒေသဘက်ကို စစ်ဘေးရှောင်လာတဲ့ စစ်ရှောင်တွေကတော့ စိုက်ပျိုးရေးလုပ်ငန်းကို လုပ်ကိုင်နိုင်ခြင်းမရှိပါဘူး။ ဒါ့အပြင် ဝင်ငွေမရှိတာကြောင့်လည်း အလှူရှင်ရဲ့ အထောက်အပံ့ကိုသာ မှီခိုနေရပါတယ်။
“ဟင်းတစ်နပ်ချက်မယ်ဆိုရင် အနည်းဆုံး ၅ ထောင် လောက်ရှိတာပေါ့၊ ဒါပေမယ့် ကုန်စျေးနှုန်းတက်တော့ အရင်လိုတော့ မဝယ်စားနိုင်ကြဘူးပေါ့၊ ကလေးတွေကလည်း ဆီပါမှ ထမင်းစားတယ် ဆိုတော့လည်း တစ်ချို့မိသားစုဆို အခက်အခဲရှိနေကြတယ်။” လို့ စစ်ဘေးရှောင် အမျိုးသမီးတစ်ဦးကလည်း ပြောပါတယ်။
ဒေါလာစောကျေးရွာအုပ်စုထဲက စစ်ဘေးရှောင်စခန်း သုံးခု ရှိနေပြီး လူဦးရေ ၁၀၀၀ ကျော်အထိ ရှိနေပါတယ်။
