ရှမ်း – ကရင်နီနယ်စပ် ဖယ်ခုံမြို့နယ်အနောက်ဘက်ခြမ်းရှိ လအိကျေးရွာက ကျောင်းသားတွေစာသင်ကြားနေတဲ့နေရာဟာ ဒီကနေ့ ဇွန်လ ၁၆ ရက်နေ့ မနက် ၁၀ နာရီကျော်အချိန်မှာ အသေခံ ဒရုန်းနှစ်စီးနဲ့ တိုက်ခိုက်ခံရလို့ ကျောင်းသားနှစ်ဦး ထိခိုက်ဒဏ်ရာရရှိခဲ့တယ်လို့ ဒေသခံတွေက ကန္တာရဝတီတိုင်း ( မ် ) ကို ပြောပါတယ်။
“:ကလေးက ၂ယောက်ထိတယ်။ လက်မှာတစ်ယောက်ထိတယ် ခြေထောက်မှာတစ်ယောက်ထိတယ်။ ကလေးနဲ့ ဆရာမတွေပဲ ရှိတာ စာသင်ချိန်ဆို။ လက်နက်ကြီးတွေနဲ့လည်းပစ်တယ် လက်နက်ကြီးပစ်ပြီးမှ ဒရုန်းနဲ့ပစ်တာ။ ပထမတစ်ကြိမ် ကြားတော့ စာသင်ဆောင်မှာ ကလေးတွေစာရေးနေကြတာ ကလေးတွေလည်း ထွက်ပြေးကြတယ်။ မှန်စလည်းကွဲသွားတယ်။” လို့ ဒေသခံအမျိုးသားတစ်ဦးက ပြောပါတယ်။
စစ်ကောင်စီက တိုက်ပွဲဖြစ်ပွားခြင်းမရှိဘဲ အသေခံဒရုန်းနှစ်စီးနဲ့ လအိကျေးရွာက ပရဟိတဘုန်းတော်ကြီးသင် ပညာရေးကျောင်းကို ပစ်ခတ်လာတာဖြစ်တယ်လို့ ဖယ်ခုံမြို့နယ် ပြည်သူ့လုံခြုံရေးတပ်ဖွဲ့ကလည်း ထုတ်ပြန်ထားပါတယ်။ အဲ့ဒီပစ်ခတ်မှုကြောင့် မူလတန်းအရွယ်ကလေးငယ် နှစ်ဦး ရှထိခဲ့သလို ဘုန်းကြီးကျောင်း ပရဝဏ်တချို့လည်း ပျက်စီးခဲ့တယ်လို့ ဆိုထားပါတယ်။
ဒရုန်းနဲ့ ပစ်ခတ်မှုမပြုလုပ်ခင် လက်နက်ကြီးတွေနဲ့ ပစ်ခတ်ခဲ့တယ်လို့ ဒေသခံတွေက ပြောဆိုကြပါတယ်။ တိုက်ပွဲဖြစ်ပွားခြင်းမရှိသလို ကလေးငယ်တွေ စာသင်ကြားတဲ့နေရာကို အခုလို အသေခံဒရုန်းနဲ့ပစ်ခတ်မှုကြောင့် လုံခြုံရေး စိုးရိမ်မှုရှိတယ်လို့ ကျောင်းသားမိဘတစ်ဦးက အခုလို ပြောပါတယ်။
“ ဒရုန်းတော့တွေ့တယ် သူ့အသံက ချိန်းဇောဖြတ်တဲ့အသံမျိုး၊ အသံကြားတော့ ကျမတို့ထွက်ပြေးကြတယ်။ နောက်တစ်လုံးထပ်လာတယ် ကလေးတွေလည်း ထွက်ပြေးကြတယ်။ ကွဲတာ အသံကျယ်တယ်။ ကျမတို့ကလေးအတွက် တအားစိုးရိမ်တယ် ပြီးတော့ ဘုန်းကြီးကျောင်းဆိုတော့ မထင်မှတ်ထားဘူးပေါ့ လုံခြုံတယ်ပေါ့ အဲ့မျိုးထင်တာပေါ့ ။ ကိုယ့်ကလေးကိုလည်း တအားစိတ်ပူတယ်လေ။”လို့ ကျောင်းသားမိဘတစ်ဦးက ပြောပါတယ်။
အဆိုပါ ပရဟိတဘုန်းတော်ကြီးသင် ပညာရေးကျောင်းဟာ ဒီကနေ့မှာ ကျောင်းသားတွေကို စတင် လက်ခံသင်ကြားနေတာဖြစ်ပြီး အခုလို အသေခံဒရုန်းတွေနဲ့ ပစ်ခတ်ခံရမှုကြောင့် ကျောင်းကို ယာယီပိတ်ထားလိုက်ရပါတယ်။
ပုံစာ – လအိကျေးရွာက စာသင်ကြားတဲ့နေရာ ဒရုန်းနဲ့တိုက်ခိုက်ခံရလို့ ပျက်စီးသွားတဲ့ မြင်ကွင်းတချို့။ ( ဓါတ်ပုံ – ကန္တာရဝတီတိုင်း ( မ် ) )
