spot_img
Thursday, December 1, 2022
spot_img

ငြိမ်းချမ်းရေးဆွေးနွေးပွဲ ဖိတ်ခေါ်မှုဟာ စစ်ကောင်စီတပ် ဖရိုဖရဲဖြစ်နေတာဖြစ်တယ်လို့ KNPP ပြော

spot_imgspot_imgspot_imgspot_img

ဘလက်ဇင်း (ကန္တာရဝတီတိုင်း(မ်))

လက်ရှိမှာ စစ်ကောင်စီတပ်တွေ ဖရိုဖရဲဖြစ်နေပြီး ထိခိုက်ကျဆုံးမှုတွေ၊ တပ်ပြေးမှုတွေ များပြားလာတာကြောင့် အာဏာသိမ်းစစ်ခေါင်းဆောင် မင်းအောင်လှိုင်ဟာ တိုင်းရင်းသားလက်နက်ကိုင်အဖွဲ့အစည်းတွေကို ငြိမ်းချမ်းရေးဆွေးနွေးဖို့ ပြောလာတာဖြစ်တယ်လို့ ကရင်နီအမျိုးသားတိုးတက်ရေးပါတီ(KNPP) အတွင်းရေးမှူး-၁ ခူဒယ်နီယာက ကန္တာရဝတီတိုင်း(မ်)ကို ပြောပါတယ်။

ငြိမ်းချမ်းရေးလုပ်ငန်း အကောင်အထည်ဖော်နိုင်ဖို့ ဧပြီလ ၂၂ ရက်နေ့မှာ စစ်ကောင်စီ ခေါင်းဆောင် မင်းအောင်လှိုင်ရဲ့ မိန့်ခွန်းပြောကြားချက်အပေါ် KNPP က သုံးသပ်ပြောဆိုလိုက်တာဖြစ်ပါတယ်။

ကရင်နီ အမျိုးသားတိုး တက်ရေးပါတီ (KNPP) အတွင်းရေးမှူး-၁ ခူဒယ်နီယာက “မင်းအောင်လှိုင်တပ်က တပ်တော်တော် ဖရိုဖရဲဖြစ်နေပြီ။ နောက် သူတို့ ထိခိုက်မှု ကျဆုံးမှုတွေ၊ ထွက်ပြေးမှုတွေ အများကြီးဖြစ်နေပြီ။ သူတို့မှာ အခက်အခဲအများကြီးကြုံတော့ တိုင်းရင်းသားလက်နက်ကိုင်အဖွဲ့အစည်းတွေ တော်လှန်ရေးအဖွဲ့အစည်းတွေကို ငြိမ်းချမ်းရေးဆွေးနွေးမယ်ဆိုတာ ပြောလာတာ အဲ့လိုမျိုးပဲ သုံးသပ်ရတယ်။” လို့ ပြောပါတယ်။

ဧပြီလ ၂၃ရက်နေ့ မနက်ပိုင်းအထိ တရားဝင်အကြောင်းကြားစာ ပေးပို့တာမရှိသလို ဖိတ်ကြားမှုအပေါ်လည်း တွေ့ဆုံဆွေးနွေးဖို့ မရှိဘူးလို့ KNPP ဖက်က သဘောထားပြောဆိုထားပါတယ်။

အာဏာသိမ်းစစ်ခေါင်းဆောင် ပြောတဲ့ ငြိမ်းချမ်းရေးဆွေးနွေးမှုဟာ အပြောနဲ့ လုပ်ရပ်ဟာ မတူဘူးလို့ ဆိုပါတယ်။ လူထုတစ်ရပ်လုံးက စစ်ကောင်စီကို တော်လှန်နေတာဖြစ်ပြီး ငြိမ်းချမ်းရေးဆွေးနွေးချင်ရင် လက်နက်ကိုင်အဖွဲ့အစည်းအားလုံးပါဝင်မှသာ ရမှာဖြစ်တယ်လို့ ခူဒယ်နီယာက ပြောပါတယ်။

“သူ မင်းအောင်လှိုင်ပြောတာက သူငြိမ်းချမ်းရေး တွေ့ဆုံဆွေးနွေးမှုလုပ်မယ်။ ပြောတာနဲ့ သူမြေပြင်မှာလုပ်နေတာ တခြားစီပါပဲ။ ဆိုတော့ သူ အပြောနဲ့ လုပ်ရပ်တွေက တူမနေဘူးပေါ့နော။ နောက်တစ်ခုက ဒီအချိန်မှာ တိုင်းရင်းသား တော်လှန်ရေး လက်နက်ကိုင်အဖွဲ့အစည်းတွေပဲ တိုက်ပွဲတော်လှန်တာမဟုတ်ဘူးလေ။ လူထုတစ်ရပ်လုံးက တော်လှန်နေတာဆိုတော့ အဖွဲ့အစည်းတွေ ဆွေးနွေးချင်တယ်ဆိုရင်တော့ လက်နက်ကိုင်အဖွဲ့အစည်းတွေအားလုံး ပါဝင်မှ ဖြစ်မယ်။ ဒီဆွေးနွေးမှု ခေါ်ယူတဲ့ဆွေးနွေးမှုတွေကလည်း အောင်မြင်မှာ မဟုတ်ဘူး။”လို့ ခူဒယ်နီယာက ဆက်ပြောပါတယ်။

ယမန်နေ့ စစ်ခေါင်းဆောင်ပြောကြားခဲ့တဲ့ မိန့်ခွန်းမှာ တိုင်းရင်းသားလက်နက်ကိုင်အဖွဲ့ ခေါင်းဆောင်တွေကို တွေ့ဆုံဆွေးနွေးဖို့ ဖိတ်ခေါ်ထားတာဖြစ်ပါတယ်။

“တိုင်းရင်းသားလက်နက်ကိုင်အဖွဲ့များရဲ့ ခေါင်းဆောင်များကို တွေ့ဆုံဆွေးနွေးဖို့အတွက် ဖိတ်ခေါ်ပါတယ်။ အဖွဲ့များအားလုံးကို ကျနော်ကိုယ်တိုင် တွေ့ပါမယ်။ ပြီးလို့ရှိရင် နိုင်ငံတော်စီမံအုပ်ချုပ်ရေးကောင်စီ ကိုယ်စားလှယ်အဖွဲ့များနဲ့ ဆွေးနွေးမှုများ ပြုလုပ်သွားပါမယ်။ လိုအပ်ရင်လည်း ထပ်မံဆွေးနွေးမှုတွေ ပြုလုပ်သွားပါမယ်။ ဒီဆွေးနွေးပွဲကို တိုင်းရင်းသားလက်နက်ကိုင်အဖွဲ့များ၏ ခေါင်းဆောင်အသီးသီးနဲ့ အဖွဲ့ဝင်ကိုယ်စားလှယ် ၂ ဦးစီ စာရင်းပေးပို့ပေးကြပါ။”လို့ စစ်ကောင်စီ ခေါင်းဆောင်က မိန့်ခွန်းမှာ ပြောကြားထားပါတယ်။

အဖွဲ့ဝင်အားလုံးကို ကိုယ်တိုင်တွေ့မှာဖြစ်ပြီး နိုင်ငံတော်စီမံအုပ်ချုပ်ရေးကောင်စီ ကိုယ်စားလှယ်အဖွဲ့တွေနဲ့ ဆွေးနွေးမှု ပြုလုပ်သွားမယ်လို့ ဆိုပါတယ်။ ဒါ့အပြင် တက်ရောက်သူ အမည်ကို ၂၀၂၂ မေလ ၉ ရက် နောက်ဆုံးထား အကြောင်းပြန်ကြားဖို့ သူက ပြောသွားပါတယ်။

Related Stories