ကန္တာရဝတီတိုင်း ( မ် )
ကရင်နီပြည်မှာ မေလ လဆန်းကတည်း မိုးရွာ၊ လေပြင်းတိုက်ခတ်မှုတွေရှိတာကြောင့် စစ်ဘေးရှောင်စခန်းတချို့မှာ တဲအိမ်အမိုးအကာ ပျက်စီးမှုရှိနေပြီး အကူအညီလိုအပ်နေတယ်လို့ စစ်ဘေးရှောင်တွေက ပြောပါတယ်။
“မိုးနည်းနည်းပဲ ရွာရင် ကိစ္စမရှိဘူးလေးနော၊ ကျမတို့နေတဲ့ နေရာက လေတိုက်တဲ့ လမ်းကြောင်းဖြစ်နေတော့ လေတိုက် မိုးကြီးရွာဆို ကျမအိမ်ဆို အကုန်လုံး မိုးယိုတယ်။ ပထမတစ်ရက်နှစ်ရက်ဆို ညအချိန်မိုးရွာရင် အိပ်ယာအကုန်လုံးစိုသွားတယ်။ တကွက်တကွက်ကျန်တဲ့ နေရာမှာပဲ ကလေးအတွက် ပေးသိပ်ရတာပေါ့နော်။ အဲ့တော့ မိုးကာလည်း မဝယ်နိုင်တော့ တော်တော်ခက်ခဲတယ်။” လို့ ဒီးမော့ဆိုမြို့နယ် အနောက်ဘက်ခြမ်းက လယ်တော ၃ စစ်ဘေးရှောစခန်းက အိမ်ရှင်မ တစ်ဦးက ဆိုပါတယ်။
စစ်ဘေးရှောင်ကာလ ကြာမြှင့်လာတာနဲ့အမျှ အဖက်ဖက်က လိုအပ်ချက် များပြားနေဆဲဖြစ်သလို ထောက်ပံ့ပေးတဲ့ အလှူရှင်အဖွဲ့အစည်းလည်း နည်းပါးလာပြီး မိုးကာလှူဒါန်းပေးတဲ့သူလည်း မရှိတော့ဘူးလို့ ဆိုပါတယ်။ မိုးရာသီကာလ ရောက်ရှိနေပြီဖြစ်တာကြောင့်လည်း အမိုးအကာအတွက် အကူအညီ တောင်းခံမှုများပြားနေပါတယ်။
“အိမ်တိုင်းပဲ လိုအပ်တယ်။ ဒီမှာနေတာ မိုးကာမရတာလည်း ကြာပြီပေါ့။ ဆောက်ထားတဲ့ မိုးကာက တစ်နှစ်ဆို လဲရမယ်၊ ဒါပေမယ့်လည်း ကိုယ့်မှာလည်း အခက်အခဲနဲ့ဆိုတော့ အလှူလည်းမရဆိုတော့ တစ်နှစ်တစ်ခါလဲဖို့လည်း အဆင်မပြေဘူးဖြစ်နေတာပေါ့။ မိုးတအားများ လေတိုက်တဲ့ချိန်မှာပဲ ကျမတို့ ပြဿနာတွေ့ရတာပေါ့။ အခုလည်း မိုးရာသီလည်း မဟုတ်သေးတော့ မိုးရာသီဆို မတွေးရဲစရာတွေတော့ ဖြစ်တာပေါ့။”လို့ စစ်ရှောင်စခန်းက တာဝန်ရှိသူတစ်ဦးက ပြောပါတယ်။
ဒီးမော့ဆိုမြို့နယ်အတွင်းက စစ်ရှောင်စခန်းတွေမှာ စားနပ်ရိက္ခာလိုအပ်ချက်အပြင် အမိုးအကာလည်း လိုအပ်မှုတွေကြောင့် နာမည်စာရင်းနဲ့တကွ အကူအညီတောင်းခံတဲ့ စစ်ရှောင်စခန်း ၆ခုထက်မနည်းရှိတယ်လို့ စစ်ရှောင်ကူညီသူထံကနေ သိရှိရပါတယ်။ လက်ရှိ မိုးကာ ၁၅ ပေပတ်လည် တစ်ထည်ကို ၆သောင်းဝန်းကျင်၊ ၁၈ ပေ ပတ်လည်တစ်ထည်ကို ၈သောင်းကျပ် ဝန်းကျင် ၊ ၂၁ ပေ ပတ်လည်တစ်ထည်ကို တစ်သိန်းကျော် စတဲ့ ဈေးနှုန်းအသီးသီး ရှိပါတယ်။
