ကန္တာရဝတီတိုင်း ( မ် )
အာဏာသိမ်း စစ်ကောင်စီတပ်က မြန်မာနိုင်ငံအတွင်း စစ်ဖက်၊ အရပ်ဖက် လေကြောင်း တိုက်ခိုက်မှု ပြုလုပ်ရာမှာ ယခင်တုန်းကလို ရမ်းသန်းပြုနေတာ မဟုတ်တော့ဘဲ အမိန့်ကွပ်ကဲရေးစနစ်နဲ့ စနစ်တကျလေကြောင်းတိုက်ခိုက်မှု ပြုလုပ်လာတာကို တွေ့ရတယ်လို့ ကရင်နီပြည်ကြားကာလ အုပ်ချုပ်ရေးကောင်စီ – IEC ရဲ့ အတွင်းရေးမှူး (၂) ဦးဗညားက ပြောပါတယ်။
“တစ်ကယ့်ကို စနစ်ကျကျ စနစ်တကျကွပ်ကဲရေးနဲ့ အမိန့်ပေးစနစ်တွေနဲ့ မြေပြင်ရဲ့ ဝေဟင် ထောက်လှမ်းရေး သတင်းတွေကို အခြေခံပြီးတော့မှ operation (စစ်ဆင်ရေး) စလုပ်နေပြီပေါ့နော။ သိသလောက်ကတော့ နှစ်လ သုံးလ အထဲမှာ ဆက်တိုက်လုပ်သွားမယ်လို့တော့ အကြမ်းဖျင်းသိထားတယ်။” လို့ ဦးဗညားက ပြောပါတယ်။
ယခင်ကတည်းက စာသင်ကျောင်းနဲ့ စစ်ဘေးရှောင်စခန်းတွေကို ပစ်မှတ်ထားပြီး ဗုံးကြဲတိုက်ခိုက်မှုတွေ ပြုလုပ်နေတဲ့ စစ်ကောင်စီဟာ ၂၀၂၅ ခုနှစ်အတွင်းမှာတော့ စီးပွားရေးလုပ်ငန်းရှိတဲ့ နေရာတွေ၊ အရပ်သား သွားလာလှုပ်ရှားတဲ့ နေရာတွေကိုပါ ဦးတည် တိုက်ခိုက်လာတယ်လို့လည်း ဆိုပါတယ်။
ကရင်နီပြည်မှာ ဧပြီလအတွင်း စစ်ကောင်စီရဲ့ လေကြောင်းတိုက်ခိုက်မှုကြောင့် အရပ်သား ၂၉ ဦး ထိခိုက်ဒဏ်ရာရခဲ့တယ်လို့လည်း IEC က ပြောထားပါတယ်။
သတ္တုတူးဖော်ရေးလုပ်ငန်း တွေရှိနေတဲ့ မော်ချီးဒေသကို မတ်လမှာ တကြိမ်၊ ဧပြီလမှာ ၂ ကြိမ်နဲ့ မေလ အတွင်းမှာ ၂ ကြိမ်၊ စုစုပေါင်း ၅ ကြိမ်ထိအောင် စစ်ကောင်စီက ဗုံးကြဲမှုတွေ ပြုလုပ်ခဲ့တာပါ။
“မော်ချီးဒေသကို တိုက်ခိုက်တယ်ဆိုတာက အကြမ်းဖျင်းအားဖြင့်တော့ လူမှုစီးပွားရေးကို ဖျက်စီးလိုတဲ့ရည်ရွယ်ချက်ရှိတယ်။” လို့ ဦးဗညားက ပြောပါတယ်။
မြန်မာတစ်နိုင်ငံလုံးအတိုင်းအတာနဲ့ ခြုံကြည့်လိုက်ရင် စစ်ကောင်စီဟာ တိုင်းရင်းသားလက်နက်ကိုင် အဖွဲ့တွေ၊ တော်လှန်ရေးအင်အားစုတွေရဲ့ အုပ်ချုပ်ရေးယန္တရားတွေနဲ့ ဆက်စပ်တဲ့နေရာ၊ လူမှုဝန်ဆောင်မှုလုပ်ငန်းတွေရှိတဲ့ နေရာနဲ့ လူမှုစီးပွားရေးအချက်အချာကျတဲ့ နေရာတွေကို ပိုမို တိုက်ခိုက်လာတာကို တွေ့ရတယ်လို့လည်း ဦးဗညားက ဖြည့်စွက်ပြောပါတယ်။
