ကန္တာရဝတီတိုင်း(မ်)
ရှမ်း-ကရင်နီပြည် နယ်စပ်က မိုးဗြဲမြို့ပေါ် ရပ်ကွက်တွေမှာ စစ်ကောင်စီက မီးလောင်ဗုံးတွေနဲ့ အသုံးပြုတိုက်ခိုက်နေတာကြောင့် ဖေဖော်ဝါရီလ တစ်လအတွင်း ပြည်သူ့နေအိမ် ၃၀ ဝန်းကျင် မီးလောင်ပျက်စီးခဲ့တယ်လို့ ကရင်နီပြည်ကြားကာလအုပ်ချုပ်ရေးကောင်စီ IEC ရဲ့ အတွင်းရေးမှူး(၂) ဦးဗညားက ကန္တာရဝတီတိုင်း(မ်)ကိုပြောပါတယ်။
“အဓိက လက်နက်ကြီးပစ်ခတ်ပြီး မီးလောင်တာတွေ မီးလောင်ဗုံးသုံးပြီး ဗုံးကြဲတာတွေက သိရတယ်လေ။ အဓိကက ဒီမိုးဗြဲမှာဖြစ်သွားတဲ့ဟာတွေပေါ့။ မိုးဗြဲထဲမှာကတော့ အရင်လက ၅၀ ဒီလကတော့ ၃၀ လောက် လို့ပြောတာရှိတယ်ပေါ့။ “လို့ ဦးဗညားက ဆိုပါတယ်။
လက်ရှိ နေအိမ်မီးလောင်ပျက်စီးသွားတဲ့ ရပ်ကွက် ၊ နေရာ နဲ့ အချက်အလက် အသေးစိတ်ကိုတော့ ကောက်ယူရရှိဖို့ ခက်ခဲသေးတာကြောင့် ပြန်လည်ကောက်ယူသွားဖို့ ရှိတယ်လို့ ဦးဗညားက ပြောပါတယ်။
စစ်ကောင်စီဟာ ပြီးခဲ့တဲ့ ၂၀၂၄ ခုနှစ် ဒီဇင်ဘာလကတည်းက မိုးဗြဲမြို့ပေါ်ကို မီးလောင်ဗုံးတွေနဲ့ စတင်အသုံးပြုတိုက်ခိုက်ခဲ့တာဖြစ်ပြီး လက်ရှိမှာ တစ်ဖန်ပြန်လည်အသုံးပြုနေတယ်လို့ ကရင်နီအမျိုးသားများကာကွယ်ရေးတပ်(KNDF)သတင်းနဲ့ ပြန်ကြားရေးတာဝန်ရှိသူ တာအယ်စိုးက အခုလိုပြောပါတယ်။
“မိုးဗြဲမှာ မီးလောင်ဗုံးသုံးတာ ပြီးခဲ့တဲ့ ဒီဇင်ဘာလကတည်းက ဖြစ်တယ်။ အခုတစ်ဖန်ပေါ့နော် ဒီဖေဖော်ဝါရီလမှာ စပြီးတော့ ပြန်ပြီးသုံးလာတယ်ပေါ့နော်။ ဒရုန်းကနေပြီး ဒီမီးလောင်ဗုံးတွေကြဲချတာမျိုးတွေ။နောက်ပြီး ဓါတုဗုံးတွေသုံးတာမျိုးတွေ ဆက်တိုက်လုပ်နေတယ်ပေါ့နော်။ နေအိမ်ကတော့ ထိခိုက်ပျက်စီးမှုတွေအများကြီးရှိတယ်။ မီးလောင်ဗုံးတွေကြောင့် လေယာဥ်ဗုံးကြဲတာကြောင့် ရှိတယ်။ ဒါပေမဲ့ ဒီလတ်တလော ဘယ်လောက်ရှိလဲဆိုတာကိုတော့ အသေးစိတ် ရရှိဖို့ ခက်တယ်ပေါ့နော်။ “လို့ တာအယ်စိုးက ဆိုပါတယ်။
စစ်ကောင်စီနဲ့ တော်လှန်ရေးတပ်ဖွဲ့တို့ နှစ်ဖက်တိုက်ပွဲ နေ့စဥ်ဖြစ်ပွားနေတဲ့ မိုးဗြဲမြို့မှာ ယခုလ ဖေဖော်ဝါရီလအတွင်း စစ်ကောင်စီဟာ လေကြောင်းတိုက်ခိုက်မှု၊ လက်နက်ကြီးပစ်ခတ်မှုအပြင် မီးလောင်ဗုံး အသုံးပြုတိုက်ခိုက်နေတယ်လို့ ဆိုပါတယ်။ ဒါ့အပြင် တိုက်ပွဲဖြစ်ပွားနေဆဲဖြစ်တာကြောင့် လုံခြုံရေးအရ မိုးဗြဲမြို့အတွင်း အများပြည်သူ ဖြတ်သန်းသွားလာခွင့်ကို ဖေဖော်ဝါရီ ၂၄ ရက်မှစပြီး ၂၈ ရက်နေ့အထိ (၅)ရက်တာ ယာယီပိတ်ထားတယ်လို့ တော်လှန်ရေးတပ်ဖွဲ့တွေက အသိပေးထားပါတယ်။
မိုးဗြဲမြို့မှာ ဖြစ်ပွားနေတဲ့ တိုက်ပွဲအခြေအနေ၊ နေအိမ်မီးလောင်ပျက်စီးမှုအခြေအနေနဲ့ပတ်သက်ပြီး တော်လှန်ရေးတပ်ဖွဲ့တွေက တစ်စုံတစ်ရာ အသိပေးထုတ်ပြန်ထားတာ မရှိသေးပါဘူး။
၂၀၂၁ခုနှစ်၊ ဖေဖော်ဝါရီလ ( ၁ )ရက်နေ့မှ ၂၀၂၅ ခုနှစ်၊ ဇန်နဝါရီလ ( ၃၁ )ရက်နေ့အထိ ကရင်နီပြည် နဲ့ ကယန်းဒေသအတွင်း စစ်ပဋိပက္ခကြောင့် ပျက်စီးသွားတဲ့ နေအိမ်ပေါင်း (၂၈၉၇) ရှိတယ်လို့ တိုးတက်သောကရင်နီပြည်သူ့အင်အားစု(PKPF)က ထုတ်ပြန်ထားပါတယ်။
