ကန္တာရ၀တီတိုင်း (မ်)
စစ်မှုထမ်းဥဒေကြောင့် တပ်သားအဖြစ်စုဆောင်းခံရတဲ့ စစ်ကောင်စီ တပ်သားသစ် ၄ ဦးဟာ ကရင်နီအမျိုးသားများကာကွယ်ရေးတပ် (KNDF)ထံ ဘက်ပြောင်းခိုလှုံလာတယ်လို့ KNDF ကပြောပါတယ်။
MA-1 သေနတ် ၃ လက်နဲ့အတူ ပြီးခဲ့တဲ့ ဒီဇင်ဘာလ ၁၁ ရက်နေ့မှာ ခိုလှုံလာခဲ့တာဖြစ်တယ်လို့ ဆိုပါတယ်။ ဘက်ပြောင်းခိုလှုံလာတဲ့ တပ်သား ၄ ဦးကို KNDF CDM ဌာနမှာ ခေါ်ယူထိန်းသိမ်းထားတယ်လို့ ဆိုပါတယ်။ ၎င်းတို့နဲ့ပတ်သတ်ပြီး အခြေအနေ အသေးစိတ်ကို ထပ်မံထုတ်ပြန်သွားမယ်လို့လည်း KNDF သတင်းနှင့်ပြန်ကြားရေး တာဝန်ခံတစ်ဦးကတော့ ကန္တာရဝတီတိုင်း (မ်) က မေးမြန်းရာမှာ အခုလိုပြောပါတယ်။
“လောလောဆယ်အသေးစိတ် မပြောနိုင်သေးဘူး။ ဒါနဲ့ပတ်သတ်ပြီး မကြာခင်အသေးစိတ်ထုတ်ပြန်မယ်” လို့ သူက ပြောပါတယ်။
မေလ ၁၀ ရက်နေ့မှာ စတင် အသက်၀င်လာတဲ့ စစ်ကောင်စီရဲ့ စစ်မှုထမ်းဥပဒေက လက်ရှိမှာတော့ အပတ်စဥ် ၇ ကို ခေါ်ယူနေပြီ ဖြစ်ပါတယ်။ စစ်ကောင်စီ ထိန်းချုပ်တဲ့ တိုင်း ၊ မြို့နယ်တွေမှာ စစ်မှုထမ်းဖို့အတွက် လူငယ်တွေဟာ အတင်းအကျပ် ဖမ်းဆီးခံရမှုတွေလည်း လတ်တလောမှာ ဆက်တိုက်ဖြစ်ပေါ်နေပါတယ်။
စစ်ကောင်စီတပ်ရှိတဲ့ ကရင်နီပြည် ၊ လွိုင်ကော်မြို့တွင်းမှာတော့ စစ်မှုထမ်းဖို့ နဲ့ ပြည်သူ့လုံခြုံရေးအတွက် သင်တန်းပေးနေပြီလို့ ဒေသခံတွေက ပြောဆိုကြပါတယ်။ KNDF တပ်ရင်းတချို့ကလည်း စစ်ကောင်စီလက်အောက်မှာ မနေလိုတဲ့ သူတွေကို KNDF တပ်ရင်းမှာ တပ်သားအဖြစ်ဝင်ရောက် တာဝန်ထမ်းဆောင်နိုင်ကြောင်း လူမှုကွန်ရက်စာမျက်နှာမှတဆင့် ဖိတ်ခေါ်နေပါတယ်။
စစ်မှုထမ်းဥပဒေကြောင့် အတင်းအဓမ္မတပ်သားသစ်အဖြစ် စုဆောင်းခံရတဲ့ စစ်ကောင်စီတပ်သားသစ်တွေဟာ ကရင်နီပြည်က ရှေ့တန်းတိုက်ပွဲတွေမှာ တွန်းပို့ခံနေရတယ်လို့ KNDF သတင်းနဲ့ပြန်ကြားရေးတာဝန်ရှိသူတစ်ဦးက ကန္တာရဝတီတိုင်း (မ်) ကိုဖြေကြားဖူးပါတယ်။
