ကန္တာရဝတီတိုင်း(မ်)
ကရင်နီပြည် ၊ ဒီးမော့ဆို အနောက်ဖက်ခြမ်းတစ်နေရာမှာ ဖွင့်လှစ်ထားတဲ့ ဆေးသင်တန်းတစ်ခုမှာ သင်ခန်းစာမစ်ရှင် လေ့ကျင့်ဖို့ ရေချောင်းဖြတ်ရာကနေ တောင်ကျရေနဲ့အတူ ဆေးသင်တန်းသား ၁၈ ဦးမျောပါ သေဆုံးမှု ဖြစ်ပွားခဲ့တယ်လို့ ဒီကနေ့ စက်တင်ဘာလ ၁၃ ရက်နေ့မှာ ကရင်နီအမျိုးသားများကာကွယ်ရေးတပ် (KNDF) က ထုတ်ပြန်ထားပါတယ်။
စက်တင်ဘာလ ၁၁ ရက်နေ့ ညပိုင်းမှာ မတော်တဆမှု ဖြစ်ပွားခဲ့တာဖြစ်ပြီး မိုးအဆက်မပြတ်ရွာသွန်းနေချိန် မြင့်တက်လာတဲ့ ချောင်းရေတွေနဲ့ အတူ မျောပါခဲ့တာဖြစ်ပါတယ်။
ဆေးသင်တန်းသားတွေရဲ့ မတော်တဆမှု ဖြစ်စဥ်ကို စုံစမ်းစစ်ဆေးမှုတွေ ပြုလုပ်သွားမှာဖြစ်တယ်လို့ KNDF ဒုစစ်ဦးစီးချုပ် မာဝီက သူ့ရဲ့လူမှုကွန်ယက်စာမျက်နှာမှာ ရေးသားပြောဆိုထားပါတယ်။
“ဆုံးရှုံးသွားရတဲ့ ဆေးသင်တန်းသားတွေအတွက် မိသားစုနဲ့အတူ တပ်ရင်းတပ်ဖွဲ့တွေနဲ့အတူ များစွာစိတ်မကောင်းဖြစ်ရပါတယ်။ ဖြစ်စဉ်ကို ကျနော်တို့ စုံစမ်းစစ်ဆေးမှုတွေပြုလုပ်ဆောင်ရွက်ပြီး အများပြည်သူကိုချပြ ထုတ်ပြန်သွားပါ့မယ်”လို့ KNDF ဒုစစ်ဦးစီးချုပ် မာဝီက ရေးသားထားပါတယ်။
အဆိုပါ ဆေးသင်တန်းဟာ ကရင်နီအမျိုးသားများကာကွယ်ရေးတပ် (KNDF) ရဲ့ဆေးဌာနကနေ ကြီးမှူး ဖွင့်လှစ်ထားတာဖြစ်ပါတယ်။
ဖွင့်လှစ်ထားတဲ့ ဆေးသင်တန်းဟာ ကရင်နီအမျိုးသားများကာကွယ်ရေးတပ်နဲ့ တပ်ပေါင်းစုံတို့ရဲ့ လိုအပ်ချက်အရ ကရင်နီပြည်အတွက် လူ့စွမ်းအားအရင်းအမြစ်တွေ ပိုမိုတိုးတက်ကောင်းမွန်စေဖို့နဲ့ ဆေးတပ်သားတွေ တိုးပွားလာစေဖို့ ရည်ရွယ်ပြီး ဖွင့်လှစ်ခဲ့တာဖြစ်တယ်လို့ သိရပါတယ်။
ကရင်နီအမျိုးသားများကာကွယ်ရေးတပ် ဗဟိုအနေနဲ့ မတော်တဆမှုကို စုံစမ်းစစ်ဆေးမှုတွေ ပြုလုပ်သွားမှာဖြစ်ပြီး ဖြစ်စဥ် အသေးစိတ်ကိုတော့ ပြန်လည်အသိပေးထုတ်ပြန်သွားမယ်လို့ ပြောဆိုထားပါတယ်။
