ကန္တာရဝတီတိုင်း(မ်)
ကရင်နီတပ်မတော်ဟာ ပြည်သူလူထုကြောင့် ရပ်တည်နိုင်တာဖြစ်တဲ့အတွက် ရွတ်ဆိုခဲ့တဲ့ သစ္စာအဓိဌာန်အတိုင်း ကြိုးစားလုပ်ဆောင်ရမှာဖြစ်တယ်လို့ ကရင်နီတပ်မတော် ကာကွယ်ရေးဝန်ကြီးဌာနမှ ဒုဝန်ကြီး ခူဒယ်နီယာယ်က ဒီကနေ့ ဩဂုတ်လ ၁၇ရက်နေ့မှာကျရောက်တဲ့ ကရင်နီတပ်မတော်နေ့အခမ်းအနားမိန့်ခွန်းမှာ ကယားဘာသာစကားနဲ့ ပြောကြားခဲ့ပါတယ်။
“စောစောက ကျနော်ပြောသလိုပဲ ကျနော်တို့ရဲဘော်လုပ်တယ်ဆိုတာ သူများတကာထက် ပိုဆင်းရဲမယ် ပိုပင်ပန်းမယ် ချမ်းသာချင်လို့ ရဲဘော်လုပ်တာ မဟုတ်ဘူး ။ ကိုယ့်နှကိုယ်ကို ပြန်လည်သုံးသပ်ပါ။ စောစောက သစ္စာအဓိဌာန်ရွတ်ဆိုပြီးပြီဖြစ်တယ်။ဒီသစ္စာအဓိဌာန်ထဲမှာ ပြည့်စုံအောင် လုပ်ဆောင်ရမယ်။ အားလုံးကြိုးစားလုပ်ဆောင်ရမှာဖြစ်တယ်။ တစ်ချို့တွေက မပြည့်စုံတာရှိနေသေးတယ်။ ဒါပေမယ့် တချို့က ပြည့်စုံအောင်ကြိုးစားလုပ်ဆောင်တာ တွေ့ရတယ်။ ဘာပဲဖြစ်ဖြစ် အားလုံးကြိုးစားပြီး လုပ်ဆောင်ရမယ်ဆိုတာ ကျနော်အနေနဲ့ ရဲဘော်တွေကို အထူးပြောကြားချင်တယ်။ ပြီးတော့ ကျနော်တို့မှာ ကျေးရွာ၊ ရွာမိရွာဖ၊ ရွာသူ/သား၊ မိသားစုတွေ ရှိသေးတယ်။ ဒါကြောင့် ကျနော်တို့ရဲဘော်တွေဟာ ပြည်သူလူထုတွေရှိလို့ ကျနော်တို့ ရပ်တည်နိုင်တာဖြစ်တယ်။ ဒါကြောင့် စည်းလုံးဖို့လိုတယ်။ တစ်ယောက်နဲ့တစ်ယောက် ဖေးမရမယ်။ ပံ့ပိုးရမယ်။ ပြည်သူလူထုတွေ ကျနော်တို့တို မပံ့ပိုးဘူးဆိုရင် ကျနော်တို့ မရပ်တည်နိုင်ဘူး။ ဒါကြောင့် ဘာတွေပဲ ဖြစ်ဖြစ် တစ်နေ့ကျရင် ကျနော်တို့ အောင်ပွဲခံရမှာဖြစ်တယ်။ “ လို့ ခူဒယ်နီယာယ်က မိန့်ခွန်းပြောကြားသွားတာဖြစ်ပါတယ်။
ကရင်နီတပ်မတော်နေ့ဟာ စစ်အာဏာရှင်တွေရဲ့ မတရားကျူးကျော်စစ်ကို ခံရပြီး ကရင်နီအမျိုးသားထု တစ်ရပ်လုံးရဲ့ အချုပ်အခြာအာဏာနဲ့ ကိုယ်ပိုင်ပြဌာန်းခွင့် အခွင့်အရေးကို ပြန်လည်ရရှိဖို့အတွက် ရရာလက်နက်စွဲကိုင်ပြီး လက်နက်ကိုင် ခုခံတော်လှန်ရေးကို စတင်ဖို့အတွက် ကရင်နီတပ်မတော်ကို စတင် ဖွဲ့စည်းခဲ့တဲ့ ၇၄ နှစ်မြောက်ရှိနေပြီဖြစ်ပါတယ်။
“ကရင်နီတပ်မတော်သားတစ်ယောက်အနေနဲ့ ကျနော်တို့တော်လှန်ရတဲ့ရည်ရွယ်ချက်ရှိပါတယ်။ ပထမတစ်ချက် ဘာကြောင့် KA ခုခံတော်လှန်ရေးလုပ်ရတယ်ဆိုတာ ကျနော်တို့ကိုယ်ပိုင်ပြဌာန်းခွင့်၊ တန်းတူညီမျှခွင့်၊ ဆုံးရှုံးသွားတဲ့ ကျနော်တို့အခွင့်အရေးတွေပြန်ရရှိဖို့ဖြစ်တယ်။ နောက်တစ်ချက်အနေနဲ့က ကျနော်တို့ကရင်နီပြည် သီးခြားလွတ်လပ်တဲ့ပြည် ပြန်ဖြစ်ဖို့ ကျနော်တို့ခုခံတော်လှန်နေရတာဖြစ်တယ်။ ဆိုတော့ သမိုင်းအဆက်ဆက်မှာကြည့်လိုက်မယ် ကျနော်တို့ခေါင်းဆောင်တွေ ကျနော်တို့လူကြီးတွေ ခေတ်အဆက်ဆက် စစ်အာဏာရှင်တွေ ကျူးကျော်တိုက်ခိုက်တဲ့ဟာတွေ ကျနော်တို့ခုခံတော်လှန်လာခဲ့တာဖြစ်တယ်။” လို့ ကရင်နီတပ်မတော်မှာ တပ်ကြပ်ကြီးအဖြစ်နဲ့ တာဝန်ထမ်းဆောင်နေတဲ့ အိုင်စီဒိုက ပြောပါတယ်။
ကရင်နီတပ်မတော်တည်ထောင်တာ (၇၄)နှစ်မြောက်ရှိနေပြီး တိုင်းပြည်ကိုကာကွယ်ရမယ်၊ ကျူးကျော်လာသူတွေကို ခုခံတိုက်ထုတ်ရမယ်၊ ပြည်သူတွေကိုနှိပ်စက်တဲ့ကျူးကျော်သူတွေကို တိုက်ထုတ်ရမှာက ရဲဘော်တစ်ဦးချင်းစီရဲ့ သမိုင်းပေးတာဝန်ဖြစ်သလို တိုင်းပြည်နဲ့လူမျိုးအပေါ် အသက်ပေးထားပြီးသားဖြစ်တယ်လို့ ခူဒယ်နီယာယ်က ပြောကြားသွားပါတယ်။
ဆင်းရဲဒုက္ခဒဏ်ကို ခံနိုင်ရည်ရှိရမှာဖြစ်တဲ့အတွက် သူတစ်ပါးရဲ့ ချမ်းသာမှု၊ မာန်တက်မှုတွေကို အားမကျဘဲ ရဲဘော်တာဝန်ကို ပြီးပြည့်စုံအောင်လုပ်ရမှာဖြစ်တယ်လို့ ထည့်သွင်းပြောကြားခဲ့တာဖြစ်ပါတယ်။
အာဇာနည်ခေါင်းဆောင်တွေ တော်လှန်ရေးသမားတွေနဲ့ ပြည်သူလူထုတွေရဲ့ နှစ်ပေါင်း ၇၀ ကျော်ကြာ အမျိုးသားရေးအတွက် ပေးဆပ်ခဲ့မှုတွေကို သမိုင်းပေးတာဝန်အဖြစ် မပြီးဆုံးမချင်း ဆက်လက်တိုက်ပွဲဝင်နေရအုံးမှာဖြစ်တယ်လို့ ကရင်နီအမျိုးသားတိုးတက်ရေးပါတီက ပေးပို့တဲ့ သဝဏ်လွှာမှာလည်း ထည့်သွင်းဖော်ပြထားပါတယ်။
“ကျနော်တို့တိုင်းပြည်၊ လူမျိုးတွေ ဆင်းရဲဒုက္ခ ရောက်တာတွေကို ပြန်ကြည့်ပြီး ကျနော်တို့ဟာ တိုင်းပြည်နဲ့ လူမျိုးအပေါ်မှာ ကတိသစ္စာတွေ တိုင်တည်ထားပြီး ဖြစ်တယ်။ သစ္စာရည်သောက်ပြီးတဲ့ ရဲဘော်တွေရှိတယ်။ မသောက်ရသေးတဲ့ရဲဘော်တွေရှိတယ်။ ဘာပဲဖြစ်ဖြစ် ကျနော်တို့ ရဲဘော်တွေပဲ မဟုတ်ဘူး ကျနော်တို့ပြည်နယ်မှာရှိတဲ့ သူတွေအားလုံး တာဝန်ကိုယ်စီရှိကြတယ်။ အဲဒါကြောင့် ကျနော်တို့ရဲ့ တိုင်းပြည်ကို ကောင်းမွန်အောင်လုပ်ရမယ်။ ပြည်သူတွေကို ကာကွယ်ရမယ်။ သဘာဝပတ်ဝန်းကျင်၊ သစ်တော စတာတွေကို ကျနော်တို့ ထိန်းသိမ်းစောင့်ရှောက်ရမယ်။ အဲ့ဒါ ကျနော်တို့ရဲ့ တာဝန်ဖြစ်တယ်။”လို့ ခူဒယ်နီယာယ်က ဆက်ပြောပါတယ်။
(၇၄)နှစ်မြောက် ကရင်နီတပ်မတော်နေ့အခမ်းအနားကို ကရင်နီတပ်မတော် KA ရဲ့ ဌာနချုပ်ဖြစ်တဲ့ တာလဲဒူဆို ( ခေါ် ) ညာမိုမှာ ဒီကနေ့မနက်ပိုင်းမှာ ကျင်းပပြုလုပ်ခဲ့တာပါ။
အခမ်းအနားမှာ ကရင်နီပြည် အလံအား အလေးပြုခြင်း၊ နိုင်ငံတော်သီချင်းသီဆိုခြင်း၊ ကျဆုံးသွားတဲ့ အာဇာနည်သူရဲကောင်းနဲ့ ရဲဘော်တို့ကို အလေးပြုခြင်း၊ သစ္စာအဓိဌာန်ရွတ်ဆိုခြင်း၊ ပေးပို့လာတဲ့ သဝဏ်လွှာကို ဖတ်ကြားခြင်း တို့ကို ပြုလုပ်ခဲ့ပါတယ်။
အခမ်းအနားကို ကရင်နီပြည်အစိုးရခေါင်းဆောင်ကြီးတွေ ဖိတ်ကြားထားတဲ့ဧည့်သည်တော်တွေနဲ့ ကရင်နီတပ်မတော် ရဲဘော်တွေ ပြည်သူလူထုတွေ ပါဝင်တက်ရောက်ခဲ့ကြပါတယ်။
