Daily Archives: May 11, 2018

စိုးရယ် ကယန်းလူမျိုးစုတွေရဲ့ သူရဲကောင်းဖြစ်သူ ဖူးကောင်းမွန်အင်းကို သတိရတဲ့အနေနဲ့ တံခွန်တိုင်ပွဲတော်ကို ဒီးမောဆိုမြို့နယ် လွိုင်နန်းဖကျေးရွာအနီးမှာ ပြုလုပ်ခဲ့ကြပါတယ်။ ကယန်းသူရဲကောင်း ဖူးကောင်းမွန်အင်းဟာ ကယန်စောဖျာ(စော်ဘွား)တစ်ယောက်ဖြစ်ပြီး ခရစ်သက္ကရာဇ် ၁၇၀၄ လောက်မှာ ဘုန်းတန်ခိုးကြီးမားခဲ့သူတစ်ယောက် ဖြစ်တယ်လို့ ယုံကြည်ကြပါတယ်။   ကယန်းတို့ရဲ့ ဒဏ္ဍာရီပုံပြင်အရ ဒီသူရဲကောင်းကို အကြောင်းပြုပြီး ကယန်းလူမျိုး စည်းလုံးရေးအတွက် ရိုးရာတံခွန်တိုင်ပွဲကို  ပြုလုပ်ကြတာဖြစ်ပြီး အခုဆိုရင် ၈ ကြိမ်မြောက် ရှိပါပြီ။  “ဒီအထိမ်းအမှတ်ပြုလုပ်ပေးရတဲ့အကြောင်းရင်းက ဖူူးကောင်းမွန်အင်းဟာ တစ်ချိန်တစ်ခါတုန်းက သူကရိုးရာကို နှစ်စဉ်နှစ်တိုင်း လုပ်လာခဲ့တာဖြစ်ပြီး သူ့ကို သတိရတဲ့အနေနဲ့ တစ်နှစ်တစ်ကြိမ် တံခွန်တိုင်ပွဲ ကျင်းပရခြင်းဖြစ်ပါတယ်။” လို့ ဖူးကောင်းမွန်အင်း ထိန်းသိမ်းရေးကော်မတီ အတွင်းရေးမှူး ဦးကျော်ဝင်း ကပြောပါတယ်။ ကယန်းလူမျိုးတွေက မိမိတို့ ကိုယ့်ကိုယ်ကို  ဖူးကောင်းမွန်အင်း က ဆင်းသက်လာတဲ့ မျိုးဆက်တွေအဖြစ် မှတ်ယူထားကြပါတယ်။ ဖူးကောင်းမွန်အင်းကို အထွတ်မြတ်ထားတဲ့အနေနဲ့ သူ့အတွက် ကျောင်းဝင်းမြေဧရိယာကို လွိုင်နန်းဖကျေးရွာအနီးမှာ သတ်မှတ်ထားပေးပါတယ်။ အဲဒီဧရိယာအတွင်းမှာရွာသူရွာသားတွေက သူ့အတွက် အထိမ်းအမှတ်တံခွန်တိုင်ကို ထားရှိပေးပါတယ်။ ဖူးကောင်းမွန်အင်းဟာ အမှန်တရားကို အလေးထားတဲ့စော်ဖျာ(စော်ဘွား)တစ်ဦး ဖြစ်တာကြောင့် ကယန်းလူမျိုးတွေ စံထားရတဲ့သူဖြစ်တယ်လို့ ဦးကျော်ဝင်း က ပြောပါတယ်။ ဒီတံခွန်တိုင် ရိုးရာဓလေ့ဟာ ကယားလူမျိုးတွေ ကျင်းပတဲ့ တံခွန်တိုင်ရိုးရာနဲ့  လုပ်နည်းလုပ်ဟန် နည်းနည်းသာ ကွာခြားပါတယ်။ ဒါ့ကြောင့် ကယန်းရိုးရာသမိုင်းဟာလည်းကယားလူမျိုးရဲ့ရိုးရာသမိုင်းနဲ့ တူညီတယ်လို့ တံခွန်တိုင်စောင့်ရှောက်သူ ဦးလမောက်က ပြောပါတယ်။ ဒီတံခွန်တိုင်ပွဲတော်ကို မေလ ၁ ရက်နေ့မှာ ကျင်းပပြီး ကယန်းလူမျိုး ၃၀၀ ကျော် တက်ရောက်ခဲ့ပါတယ်။