ကန္တာရဝတီတိုင်း(မ်)
ကမ္ဘာလုံးဆိုင်ရာ ကူးစက်မြန် ကပ်ရောဂါကြီးဖြစ်သည့် Covid-19 ရောဂါပိုး ကူးစက်ခံရသူ ဆက်လက်တိုးလာလျက် ရှိရာ ယနေ့ ဧပြီလ ၁၃ ရက်နေ့ ည ၁၀း၁၅ နာရီတွင် ကျန်းမာရေးနှင့် အားကစားဝန်ကြီးဌာနမှ ထုတ်ပြန်သည့် နောက်ဆုံးရ အချက်အလက်များအရ ကူးစက်မြန် အဆုတ်ရောင်ရောဂါ Covid-19 ကူးစက်ခံရသူ ၁ ဦး ထမ်မံ စစ်ဆေးတွေ့ရှိခဲ့ကြောင်း သိရသည်။
ယင်းကဲ့သို့ ၁ ဦး ထပ်မံတွေ့ရှိခဲ့ရသည့်အတွက် ယနေ့ ဧပြီလ ၁၃ ရက်နေ့ တစ်ရက်တည်းတွင် ရောဂါပိုး စစ်ဆေး တွေ့ရှိသူ (၁၄) ဦးအထိ ရှိခဲ့ပြီ ဖြစ်သည်။
ယင်းပမာဏသည် မြန်မာနိုင်ငံတွင် တစ်နေ့အတွင်း ရောဂါပိုးကူးစက်ခံရသူ တွေ့ရှိမှု အများဆုံး ဖြစ်သည်။
လက်ရှိတွင် မြန်မာနိုင်ငံတွင် ကူးစက်မြန် အဆုတ်ရောင်ရောဂါ Covid-19 ကူးစက်ခံရသူ စုစုပေါင်း (၅၃) ဦးအထိ ရှိလာပြီ ဖြစ်သည်။
Covid-19 ရောဂါပိုး ကူးစက်ခံရသူ ၅၃ ဦးထဲမှ ၄ ဦးသည် သေဆုံးခဲ့ပြီး ၂ ဦးသာ ပြန်လည်သက်သာလာသေးကြောင်း သိရသည်။
