ကန္တာရဝတီတိုင်း(မ်)
ပြီးခဲ့တဲ့ စက်တင်ဘာလ (၂) ရက်နေ့က ပတိုငံ ကျေးရွာမှာ စစ်ကြောင်း ထိုးလာတဲ့ စစ်ကော်မရှင်တပ်ကို ခုခံတိုက်ခိုက်ရင်း ကရင်နီအမျိုးသားများ ကာကွယ်ရေးတပ်၊ တပ်ရင်း အမှတ် (၄) ရဲ့ တပ်ဖွဲ့ဝင်တစ်ဦး ကျဆုံးခဲ့တယ်လို့ သိရပါတယ်။
ကျဆုံးခဲ့တဲ့ ရဲဘော် တစ်ဦးမှာ အသက် (၂၅) နှစ်အရွယ် ရဲဘော် ဒေါရို(ခ) ရဲမင်းထွေး ဖြစ်ပြီး စစ်ကော်မရှင်တပ် ပစ်ခတ်တဲ့ ကျည် နှစ်ချက် ထိမှန်ကာ ကျဆုံးခဲ့တာ ဖြစ်တယ်လို့ သိရပါတယ်။
“သူကျဆုံးတာတော့ ပြီးခဲ့တဲ့ (၂)ရက်နေ့တုန်းကပေါ့။ ပတိုငံ တိုက်ပွဲမှာ စစ်ကြောင်းထိုးလာတာကို ပြန်လည် ချေမှုန်းရင်းနဲ့ ကျဆုံးခဲ့တာ” လို့ တပ်ရင်း အမှတ် (၄) ရဲ့ တာဝန်ရှိသူ တစ်ဦးက ပြောပါတယ်။
လက်ရှိမှာ စစ်ကော်မရှင်တပ် ဟာ ဆက်လက် စစ်ကြောင်းထိုးလာနေတာကြောင့် စစ်ရေး ဆက်လက်တင်းမာနေဆဲ ဖြစ်ပြီး အနီးအနားက ပြည်သူတွေကို စစ်ရေး သတိရှိကြဖို့ကိုလည်း သတိပေးထားတာတွေ ရှိတယ်လို့ တပ်ရင်းတာ၀န်ရှိသူတစ်ဦးက အခုလို ဆက်ပြောပါတယ်။
“လက်ရှိအခြေအနေက တော်တော်တင်းမာနေတယ်။ စစ်ကောင်စီဘက် က အင်အားလုံးရင်းနဲ့ထိုးလာတာ ရှိတယ်။စစ်ရှောင်တွေ အသွားအလာသတိထားရှိဖို့ ၊ ရန်သူ လှုပ်ရှားမှု ၊ စစ်တလင်း နဲ့ နီးတဲ့နေရာတွေမှာ သတိနဲ့ နေကြဖို့ ရှောင်ကြဖို့ သတိပေးထားတာတွေ ရှိတယ်”လို့ သူက ဆိုပါတယ်။
ပြီးခဲ့တဲ့ စက်တင်ဘာလ (၂) ရက်နေ့ကစပြီး စစ်ကြောင်းထိုးလာတဲ့ စစ်ကော်မရှင်တပ်နဲ့ တော်လှန်ရေး ပူးပေါင်းတပ်ဖွဲ့တို့ တိုက်ပွဲတွေ ဖြစ်ပွားနေတာပါ။ စစ်ကော်မရှင်ဘက်က လက်နက်ကြီးပစ်ခတ်မှုတွေလည်း ရှိနေတာကြောင့် အနီးအနားမှာ ရှိတဲ့ ပတိုငံ၊ ကွိုင်ငံရွာသစ် နဲ့ ဆိုဒဲ့ခူ စတဲ့ ကျေးရွာဒေသခံတွေ ထွက်ပြေးတိမ်းရှောင်နေကြရပြီး စားနပ်ရိက္ခာ နဲ့ မိုးကာ လိုအပ်နေတယ်လို့လည်း သိရပါတယ်။