ကန္တာရဝတီတိုင်း (မ်)
ကဖိန်းဓာတ်ဆိုတာ လူတစ်ယောက်ရဲ့ စိတ်လန်းဆန်းတက်ကြွမှုကို အထောက်အကူပေးနေတဲ့ ဓာတ်တစ်မျိုးဖြစ်ပါတယ်။
ကဖိန်းက နိုက်ထရိုဂျင် ဇီဝဖြစ်ပျက်မှုရဲ့ ဇီဝဖြစ်စဥ်တစ်ခုဖြစ်တာကြောင့် အယ်လ်ကာလွိုက်ဒြပ်ပေါင်းအဖြစ်ယူဆသလို Purine အခြေခံပါရှိတဲ့ ဟက်ထရိုစိုင်းလစ် ဒြပ်ပေါင်းတစ်မျိုးဖြစ်တယ်လို့ ဥရောပ ဆေးပညာလေ့လာရေးအဖွဲ့ရဲ့ အစီရင်ခံစာအရ သိရပါတယ်။
ကဖိန်းဓာတ်ကို ဘီစီ ၂၇၃၇ မတိုင်ခင်ကတည်းက တရုတ်နိုင်ငံရဲ့ လက်ဖက်ရည်တွေမှာ စတင် ထည့်သွင်း စားသုံးခဲ့ကြတာပါ။
ကဖိန်းက လူတစ်ယောက်ကို အလုပ်မှာ လန်းဆန်းတက်ကြွစေတာ၊ စိတ်ကူးစိတ်သန်းကောင်းတွေရအောင် လှုံ့ဆော်ပေးနိုင်တာ၊ လိုအပ်တဲ့ အားအင်တွေပြန်လည်ဖြည့်တင်းပေးတာတွေ လုပ်ဆောင်ပေးပါတယ်။
ဒါကြောင့်လည်း ယနေ့ခေတ်မှာ ကမ္ဘာ့လူဦးရေရဲ့ ၈၀ ရာခိုင်နှုန်းက ကဖိန်းဓာတ်ပါဝင်တဲ့ အစားအသောက်တွေကို နေ့စဥ်စားသုံးနေကြတယ်လို့လည်း ဥရောပဂျာနယ်ရဲ့ တွေ့ရှိချက်အရ သိရပါတယ်။ ကဖိန်းဓာတ်ကို အထူးသဖြင့် ကော်ဖီ၊ အချိုရည်၊ အားဖြည့်အချိုရည်၊ ကိုကိုးစေ့၊ လက်ဖက်ရွက်နဲ့ တချို့ ဆေးဝါးတွေမှာ တွေ့ရပါတယ်။
ကဖိန်းဓာတ်ကို တနေ့ဘယ်လောက် စားသုံးသင့်သလဲ
လေ့လာချက်တွေအရ ကဖိန်းက အာရုံကြောဆိုင်ရာအကာအကွယ် ဂုဏ်သတ္တိရှိပြီးတော့ အယ်လ်ဇိုင်းမားနဲ့ ပါကင်ဆန် တို့လို အာရုံကြောဆိုင်ရာ ယိုယွင်းပျက်စီးမှုစတင်ဖြစ်ပေါ်လာနိုင်တဲ့ အနေအထားကို ကာကွယ်ပေးနိုင်တဲ့ ဂုဏ်သတ္တိလည်းရှိပါတယ်။
ကဖိန်းကို ခေါင်းကိုက်တာ၊ အအေးမိတာ၊ အလက်ဂျစ် ဖြစ်တာ စတဲ့ ကျန်းမာရေးဆိုင်ရာလက္ခဏာတွေအတွက် ထုတ်လုပ်ထားတဲ့ ဆေးဝါးတွေမှာ ထည့်သွင်းအသုံးပြုလေ့ရှိပါတယ်။
လေ့လာချက်အရ လူငယ်တွေကတော့ ကဖိန်းဓာတ်အတွက် ကော်ဖီကို အဓိကသောက်သုံးကြတယ်လို့လည်း ဆိုပါတယ်။ ကော်ဖီတစ်ခွက်မှာ ကဖိန်းဓာတ် ၁၀၀ ကနေ ၂၀၀ မီလီဂရမ်အထိ ပါဝင်ပါတယ်။
အစားအသောက်နဲ့ ဆေးဝါးကွပ်ကဲရေးဌာန FDA ရဲ့ လေ့လာချက်အရ လူငယ်တစ်ယောက်က တနေ့ ကဖိန်းဓာတ် ၄၀၀ မီလီဂရမ်၊ တနည်းအားဖြင့် တနေ့ အများဆုံးကော်ဖီ လေးခွက် သောက်ရင် လုံလောက်ပြီလို့ ပြောပါတယ်။
လိုအပ်တာထက် ကဖိန်းကို မှီဝဲနေတာကလည်း ကျန်းမာရေးအတွက် ဆိုးကျိုးတွေဖြစ်လာစေပါတယ်။ လူတစ်ယောက်မှာ ကဖိန်းဓာတ်များနေရင် ညဖက်အိပ်မပျော်တာ၊ ရင်တုန်တာ၊ ခေါင်းကိုက်တာ၊ စိတ်လှုပ်ရှားနေတာ၊ နှလုံးခုန်မြန်တာ၊ အသားတဆတ်ဆတ်တုန်တာ၊ အစာအိမ်ကလက်မခံတာတွေ ဖြစ်တတ်ပါတယ်။
သာမာန်လူတစ်ယောက်က ကဖိန်းကို ကျန်းမာရေးရှုထောင့်အတွက် မှီဝဲပေးနိုင်ပေမဲ့ ကိုယ်ဝန်ဆောင်မိခင်တွေကတော့ သန္ဓေသားဖွံ့ဖြိုးမှုကို အနှောက်အယှက်ပေးနိုင်တာကြောင့် တစ်ရက်ကို ကဖိန်းဓာတ် ၃၀၀ မီလီဂရမ်အောက်သာ မှီဝဲသင့်ကြောင်း ကမ္ဘာ့ကျန်းမာရေးအဖွဲ့ WHO ကတိုက်တွန်းထားပါတယ်။
ကိုးကား- European Journal of Medicinal Chemistry Reports