ကန္တာရဝတီတိုင်း(မ်)
ကရင်နီပြည်နယ်တွင်း စစ်ဘေးဒဏ်ကြောင့် ထွက်ပြေးတိမ်းရှောင်နေကြရတဲ့ စစ်ရှောင်ပြည်သူတွေအတွက် စိတ်ဓာတ်မြှင့်တင်တဲ့ အစီအစဥ်တစ်ခုကို ကယန်းအရပ်ဘက်လူငယ်အဖွဲ့အစည်းတခုက အကောင်အထည်အထည်ဖော်လုပ်ဆောင်နေပါတယ်။
အဆိုပါ ကယန်းအရပ်ဘက်လူငယ်အဖွဲ့မှ ကိုယ်စားလှယ်တစ်ဦးက ”အစီအစဥ်ရဲ့ ရည်ရွယ်ချက်ခါကျတော့ အဓိက စစ်ရှောင်တွေရဲ့ စိတ်ဓာတ်မြှင့်တင်ပေးတဲ့ ရည်ရွယ်ချက်လည်းပါတယ်။ ပြီးတော့ ကလေးအတော်များများကို အလေအလွင့်မဖြစ်အောင် စိတ်ဓာတ်မြှင့်တင်ပေးတဲ့ ရည်ရွယ်ချက်လည်းပါတာပေါ့နော်။ အဓိက ဒီရည်ရွယ်ချက်တွေနဲ့ ဒီအစီအစဥ်ကို သွားရခြင်းဖြစ်တယ်ပေါ့” လို့ ပြောပါတယ်။
ဒီအစီအစဥ်ကို ရှမ်း/တောင်၊ ဖယ်ခုံမြို့နယ်နဲ့ ကယား(ကရင်နီ)ပြည်နယ်၊ ဒီးမော့ဆိုမြို့နယ်မှာရှိတဲ့ စစ်ရှောင်ပြည်သူတွေရှိတဲ့ နေရာတွေကို သွားရောက်ပြီး အကောင်အထည်ဖော် လုပ်ဆောင်နေပါတယ်။
စစ်ဘေးရှောင်ပြည်သူအတွက် စိတ်ဓာတ်မြှင့်တင်တဲ့အစီအစဥ်မှာ စစ်ရှောင်ကလေးတွေကို အားကစားပြိုင်ပွဲပြုလုပ်ပေးတာ၊ ၄င်းနဲ့အတူကတာ၊ ဆုပေးတာတွေ ပြုလုပ်ပေးသလို ကလေးမိဘတွေကိုလည်း ကလေးအခွင့်အရေးဆိုင်ရာ အသိပညာပေးတာတွေ ပြုလုပ်ပေးပါတယ်။
အခုလို လုပ်ဆောင်ပေးတဲ့အပေါ် စစ်ရှောင်ပြည်သူတစ်ဦးက ခုလိုပြောပါတယ်။
“အခုလို သူတို့လာပေးတဲ့ အစီအစဥ်ကတော့ ကျနော်တို့အတွက်တော် ပီတိဖြစ်တယ်၊ ပျော်လည်းပျော်တယ်၊ ပညာလည်းရတယ်၊ အတွေ့အကြုံလည်းရတာပေါ့နော်။ ပွဲလမ်းသဘင်တွေမရှိကျတော့ မခုလို စုံစုံလင်လင်၊ ပျော်ပျော်ရွှင်ရွှင်နဲ့ ကလေးကို အကတင်ပေးတာတို့၊ ကပြပေးတာတို့ ကျေးဇူးတင်ပါတယ် “
၄င်းကယန်းအရပ်ဘက်လူငယ်အဖွဲ့အစည်း စစ်ဘေးရှောင်ပြည်သူတွေအတွက် စားနပ်ရိက္ခာအချို့ကို ကူညီထောက်ပံ့ပေးတာအပြင် အခုလို စိတ်ဓာတ်မြှင့်တင်တဲ့ အစီအစဥ်ကိုလည်း လုပ်ဆောင်ပေးနေတာဖြစ်ပါတယ်။
ကရင်နီပြည်နယ်တွင်းမှာ ဖြစ်ပွားတဲ့ တိုက်ပွဲတွေကြောင့် စစ်ဘေးရှောင်နေရတဲ့ ပြည်သူ ၁ သိန်းကျော်ရှိတယ်လို့ ခန့်မှန်းထားပါတယ်။