ကန္တာရဝတီတိုင်း(မ်)
ဒီးမော့ဆိုဖက်ကို ဦးတည်လာတဲ့ စစ်ကောင်စီစစ်ကြောင်းဟာ လွိုင်ကော်မြို့နယ်အနောက်ခြမ်းက ဘုရားနီ ကျေးရွာအထိ ရောက်ရှိလာနေပြီဖြစ်ပြီး အနီးအနားက ကျေးရွာလူထုနေအိမ်တွေကို မီးရှို့ဖျက်စီးမှုတွေ လုပ်ဆောင်နေတယ်လို့ ရှေ့တန်းသတင်းအရင်းအမြစ်ဆီကနေ သိရပါတယ်။
ပြီးခဲ့တဲ့ ၂၂ ရက်နေ့မှာ စတင်ရှို့ခဲ့တာကို တွေ့ရှိရတယ်လို့ ရှေ့တန်းသတင်းအရင်းအမြစ်တစ်ဦးက ကန္တာရဝတီတိုင်း(မ်) ကိုပြောပါတယ်။
“ဟုတ်တယ် နေအိမ်မီးရှို့တာရှိတယ်။ သူတို့က(စစ်ကောင်စီ) ဘုရားနီအထိ ရောက်လာပြီ။ အဲ့ဒါ အနီးနားက နိုးကိုးတို့ နိုးကိုးအကျော်တွေမှာ မီးရှို့နေတာရှိတယ်။” ရှေ့တန်းသတင်းအရင်းအမြစ်တစ်ဦးက ပြောပါတယ်။
တိုက်ပွဲဖြစ်ပွားခြင်းတွေမရှိပဲ နိုးကိုးအုပ်စုအတွင်းကိုလည်း လက်နက်ကြီး မကြာခဏပစ်ခတ်မှုတွေရှိတယ်လို့ လည်း ဒေသခံဆီကနေ သိရပါတယ်။
လူထုနေအိမ်တွေဟာ လက်နက်ကြီး ပစ်ခတ်မှုကြောင့် ပျက်စီးမှုရှိသလို တမင်မီးရှို့မှုတွေကြောင့် ပျက်စီးတာတွေ ရှိတယ်လို့ ဒေသခံအမျိုးသာတစ်ဦးက အခုလိုပြောပါတယ်။
“နေအိမ်က ပျက်စီးမှုတွေများတယ်။ သူတို့(စစ်ကောင်စီ) ရှို့တာတွေကော တချို့လည်း လက်နက်ကြီး ကျထိလို့ ပျက်တာကော ။ နိုးကိုးတို့ နိုးကိုးအကျော်က နိုးကိုးမြောင်ခွ (ဒေသအခေါ်) တို့က တမင်ကို ဝင်ရှို့တာ။” လို့ ဒေသခံအမျိုးသားတစ်ဦးက ပြောပါတယ်။
နိုးကိုးကျေးရွာအုပ်စုအတွင်းက ဒေသခံတွေက စစ်ကောင်စီ စစ်ကြောင်းထိုးမှုတွေကြောင့် ပြီးခဲ့တဲ့ ၂၀၂၄ ခုနှစ် နိုဝင်ဘာလမှာ တိမ်းရှောင်ခဲ့ကြပါတယ်။
လက်ရှိမှာတော့ စစ်ကောင်စီတပ်ဟာ ဒီးမော့ဆိုဖက်ကိုဦးတည်စစ်ကြောင်းထိုးနေပြီး လက်နက်ကြီး ၊ဒရုန်းတွေနဲ့ ပစ်ခတ်မှုတွေ လုပ်ဆောင်နေတာကြောင့် မိုးဗြဲနဲ့နီးတဲ့ ဒီးမော့ဆိုမြို့နယ်ထဲက ကျေးရွာဒေသခံတွေဟာ ဘေးလွတ်ရာကို ထပ်မံ တိမ်းရှောင်နေကြရပါတယ်။