ကန္တာရဝတီတိုင်း (မ်)
ကရင်နီပြည်၊ ဒီးမော့ဆိုမြို့နယ်၊ နန်းမယ်ခုံမြို့ရှိ ထောင်နဲ့ချီတဲ့ ကျေးရွာလူထုတွေ စစ်ဘေးတိမ်းရှောင်ခဲ့တဲ့ မနေ့က ဇူလိုင်လ ၂၅ ရက်နေ့မှာပဲ စစ်ကောင်စီတပ်က ဒီးမော့ဆိုမြို့နယ် အနောက်ဖက်ခြမ်းကို လက်နက်ကြီးတွေ ဆက်တိုက်ပစ်ခတ်မှု လုပ်ဆောင်နေတယ်လို့ ဒေသခံတွေက ပြောပါတယ်။
ထိခိုက်မှုမရှိခဲ့ပေမယ့် လက်နက်ကြီး ၇ လုံးပစ်ခတ်လာတယ်လို့ ဒီးမော့ဆိုအနောက်ဖက်ခြမ်းမှာနေထိုင်တဲ့ ဒေသခံအမျိုးသမီးတစ်ဦးက ပြောပါတယ်။
“ည ၁၀ နာရီနဲ့ ၁၁ ကြားဆိုပေမယ့် ကားအသွားအလာတော့ ရှိတယ်။ ပစ္စည်းသယ်၊ လူသယ်တဲ့ ကားငယ်တွေပေါ့ တွေ့ရသလောက်တော့။ ဒါပေမယ့် အသွားအလာ ကျဲတယ်။ လက်နက်ကြီးတွေ ခေါင်းပေါ်ဖြတ်တဲ့အသံတွေ ကြားရတယ်” လို့ ဒေသခံတစ်ဦးက ဆိုပါတယ်။
စစ်ကောင်စီတပ်က ဇူလိုင်လအတွင်း ဒီးမော့ဆို အနောက်ခြမ်းကို လက်နက်ကြီးပြစ်ခတ်မှုအပြင် လေကြောင်းတိုက်ခိုက်မှုလဲ နှစ်ကြိမ် ပြုလုပ်ခဲ့ပါတယ်။
ရွေ့ပြောင်းတိမ်းရှောင်ဖို့ သွားလာနေကြရတဲ့အချိန်မှာ အခုလို လက်နက်ကြီးပစ်ခတ်မှုတွေ၊ လေကြောင်းတိုက်ခိုက်မှုတွေကိုလဲ လူထုတွေက စိုးရိမ်ပူပန်နေကြရပါတယ်။
ရှမ်း-ကရင်နီ နယ်စပ် မိုးဗြဲမြို့ကို အင်အားအလုံးအရင်းနဲ့ စစ်ကြောင်းထိုးလာတဲ့ စစ်ကောင်စီနဲ့ လက်အောက်ခံ PNO တပ်က အခုရက်သတ္တပတ်အတွင်းမှာပဲ နန်းမယ်ခုံမြို့နဲ့ ကပ်ရက်ရှိနေတဲ့ ဘုရားနီ ကျေးရွာအထိကို ရောက်ရှိလာပြီလို့လည်း ဒေသခံတွေက ပြောပါတယ်။
စစ်ကောင်စီတပ်ရဲ့ စစ်ကြောင်းက ဒီးမော့ဆိုမြို့နယ်နဲ့ ပိုမိုနီးစပ်လာပြီး ဒေသခံတွေက စိုးရိမ်ထိတ်လန့်နေကြရပါတယ်။