ကန္တာရဝတီတိုင်း ( မ် )
မိုးဗြဲမြို့ကနေ ထိုးစစ်ဆင်လာတဲ့ စစ်ကောင်စီတပ်ရဲ့ စစ်ကြောင်း ကြောင့် ရှမ်း – ကရင်နီ နယ်စပ်က မရင့်မှည့်သေးတဲ့ စပါးခင်းတွေကို အလျင်စလို ရိတ်သိမ်းနေရတယ်လို့ တောင်သူတွေက ပြောပါတယ်။
မိုးဗြဲမြို့ အနီးမှာရှိတဲ့ ကျေးရွာတချို့က တောင်သူအများစုကတော့ ဧကထောင်ချီသော စပါးခင်းတွေကို မရိတ်သိမ်းနိုင်တော့ပဲ ထွက်ပြေးတိမ်းရှောင်ရတာလည်း ရှိနေပါတယ်။
တချို့ကလည်း စားဝတ်နေရေးကြောင့် လုံခြုံရေးအန္တရာယ် စိုးရိမ်ပူပန်မှုကြားကနေ စပါးတွေ မမှည့်သေးပေမယ့်လည်း ရိတ်သိမ်းလိုက်ရတဲ့ အခြေအနေမှာ ရှိနေတာပါ။
“မမှည့်ဘဲနဲ့ ရိတ်ရတယ် ဘာဖြစ်လို့လဲဆို နိုင်ငံရေးအခြေအနေ က ဒီလိုဖြစ်ခါကျတော့ ကျနော်တို့က စောင့်ရမယ်ဆိုလည်း ဒီကြားကာလမှာ သတင်းနားထောင်လိုက်တော့ မမှည့်ဘဲနဲ့ ရိတ်လိုက်မယ်လို့ ဖြစ်သွားတာ။ အခုစိုက်ထားတာ တစ်ဧကခွဲ ကျနော်မှန်းရသလောက်ဆိုရင်တော့ ခါတိုင်းနှစ်ဆို ၈၀ (အိတ်ရေ) လောက်ရတယ်။ အခုက ၆၀ ကျော်ကျော်ပဲရတယ် အရှုံးပြောရမှာပေါ့နော်။”လို့ ဒေသခံတောင်သူတစ်ဦးဖြစ်တဲ့ ဦးစောသိန်းက ကန္တာရဝတီတိုင်း ( မ် ) ကို ပြောပါတယ်။
စပါးရိတ်တဲ့စက်ကြီးနဲ့ ရိတ်သိမ်းနေတာဖြစ်ပြီး စပါးခင်း တစ်ဧကို ၂ သိန်းခွဲကနေ ၃သိန်းထိ အခကြေးငွေပေးပြီး အလှည့်ကျ ငှားရမ်းနေရတာပါ။
ယခုရက်ပိုင်းလည်း မိုးဗြဲမြို့နဲ့ ထိစပ်နေတဲ့ ဒီးမော့ဆိုမြို့နယ်အတွင်းကို စစ်ကောင်စီက စစ်ကြောင်းထိုးဖို့ ကြိုးပမ်းနေတာကြောင့် ဒေသခံတွေနဲ့ စစ်ဘေးရှောင်တွေဟာ ဘေးလွတ်ရာကို ထပ်မံတိမ်းရှောင်နေကြရပါတယ်။
စစ်ကောင်စီအခြေစိုက်တပ်ရင်းတွေကနေ လက်နက်ကြီးတွေနဲ့ ပစ်ခတ်မှုရှိနေပြီး လယ်ယာခင်းတွေမှာ ကျရောက်တာကြောင့် တောင်သူတွေဟာ စိုးရိမ်ပူပန်မှုတွေနဲ့ စပါးရိတ်သိမ်းနေရတယ်လို့ ဆိုပါတယ်။
စစ်ဘေးရှောင်ရင်း စားဝတ်နေရေးအတွက် စပါးပြန်လည်စိုက်ပျိုးကြတာဖြစ်ပေမယ့် စစ်ကြောင်းထိုးလာတဲ့ သတင်းတွေကြောင့် စိုက်ထားတဲ့ စပါးတွေကို မျှော်မှန်းထားသလောက် မရိတ်သိမ်းနိုင်ခဲ့ဘူးလို့ ရိတ်သိမ်းပြီးတဲ့ တောင်သူတချို့က ပြောပါတယ်။
“တခြားနေရာမှာ စစ်ရှောင်နေရတယ်ပေါ့ စားဝတ်နေရေးအတွက်ကျ အခက်အခဲတွေနဲ့ ဒီဖက်မှာ ပြန်လုပ်စားတာပေါ့နော်။ ကျနော်က လယ်ပြန်ငှားပြီးလုပ်စားတာပေါ့။ အခုပြန်ရှောင်ရပြီဆိုတော့ ကျနော်တို့ ပြန်သွားရမယ်။” လို့ တောင်သူတစ်ဦးဖြစ်တဲ့ ဦးရဲက ပြောပါတယ်။
ရှမ်း-ကရင်နီနယ်စပ် မိုးဗြဲမြို့ကို စစ်ကောင်စီက ယခုဇူလိုင်လအတွင်း ထိန်းချုပ်နိုင်ပြီးနောက် မိုးဗြဲမြို့အနီးအနားက ကျေးရွာအများစုက ပြည်သူတွေဟာ လယ်ယာစိုက်ခင်းနဲ့ နေအိမ်တွေကို စွန့်ခွာကာ ဘေးလွတ်ရာကို ထွက်ပြေးတိမ်းရှောင်နေကြရပါတယ်။