ကန္တာရဝတီတိုင်း(မ်)
ကရင်နီပြည်၊ ဆိုမိုဖေစိုးလေး (ရှားတော) မြို့နယ်မှာ ပြီးခဲ့တဲ့ ဇွန် နဲ့ ဇူလိုင်လ၊ နှစ်လအတွင်း ငှက်ဖျားရောဂါကြောင့် သေဆုံးခဲ့သူ (၂) ဦး ရှိနေတယ်လို့ ကျန်းမာရေးစောင့်ရှောက်မှု ပေးနေတဲ့ ဒေသခံ ဆေးမှူးတစ်ဦးကပြောပါတယ်။ ဒါ့အပြင် တခြားသော ရောဂါကြောင့် သေဆုံးသူ ၃ ဦး ရှိပြီး ဖြစ်ပွားတဲ့ရောဂါအမျိုးအစားတွေကို အသေးစိတ်မသိရဘူးလို့ ဆိုပါတယ်။
“၆လပိုင်းနဲ့ ၇လပိုင်းမှာတော့ တမြို့နယ်လုံးပြောရင်တော့ သေဆုံးတာတော့ ၅ဦးပေါ့။ အဲ့ ၅ယောက်ထဲမှာက ငှက်ဖျားနဲ့ ပိုးတွေ့၊ ငှက်ဖျားနဲ့ သေဆုံးတာတော့ ၂ ယောက်ပေါ့နော်။“ လို့ ဒေသခံ လူငယ်လည်းဖြစ်တဲ့ ဆေးမှူး ကပြောပါတယ်။
ငှက်ဖျားပိုးကြောင့် ၂ ဦးဟာ အသက် ၂၅ နှစ်အရွယ် အမျိုးသားနဲ့ အသက် ၅၀ကျော်အရွယ် အမျိုးသမီးဖြစ်ပြီး ကျန် (၃) ဦးရဲ့ အသက်အရွယ်နဲ့ သေဆုံးမှု အခြေအနေအသေးစိတ်ကိုတော့ မသိရဘူးလို့ ဆိုပါတယ်။
ငှက်ဖျားဖြစ်ပွားမှုတွေကို ကာကွယ်နိုင်ဖို့ လက်ရှိမှာတော့ အသိပညာပေး လုပ်ငန်းတွေသာ ဆောင်ရွက်နိုင်သေးတယ်လို့ဆိုပါတယ်။ ဒါ့အပြင် ငှက်ဖျားရောဂါမကူးစက်နိုင်အောင်ကာကွယ်ဖို့ လူထုတွေအတွက် ခြင်ထောင်တွေ အဓိကလိုအပ်နေတယ်လို့ အဆိုပါ ဆေးမှူးက အခုလိုဆက်ပြောပါတယ်။
“အခုလက်ရှိ ကာကွယ်နိုင်တာတော့ စစ်ရှောင်မှာ ကျေးရွာတွေမှာတော့ အသိပညာပေး လုပ်ငန်းတွေလောက်ပဲ လုပ်နိုင်တာပေါ့။ ဆိုတော့ တစ်ယောက်နဲ့ တစ်ယောက် ကူးစက်မှု မဖြစ်အောင်ဆိုတဲ့ ဟာတွေတော့ပါတယ်။ ဒါပေမဲ့ အဓိက လိုအပ်တာက ခြင်ထောင်အရမ်းလိုအပ်နေတယ်။ “ လို့ သူက ဆိုပါတယ်။
လက်ရှိ ဆိုမိုဖေစိုးလေး(ရှားတော)မြို့နယ်က ယခုနှစ်အတွင်းမှာတော့ ပြီးခဲ့တဲ့ မတ်လကတည်းက ငှက်ဖျားဖြစ်ပွားသူဦးရေများလာပြီး လက်ရှိအချိန်ထိ ဖြစ်ပွားနေကြဆဲပဲလို့ ဆိုပါတယ်။
ဆိုမိုဖေစိုးလေး(ရှားတော) မြို့နယ်အတွင်းက လူထုတွေဟာ ၇၀ ရာခိုင်နှုန်းလောက် ငှက်ဖျားဖြစ်နေကြပြီး ခြင်ကနေ တဆင့် စတင်ကူးဆက် ဖြစ်ပွားတာကြောင့် လူထုတွေအတွက် ခြင်ထောင်အဓိက ထောက်ပံ့ပေးဖို့ကိုလည်း တောင်းဆိုချင်တယ်လို့ ဆေးမှူးက ပြောပါတယ်။