ကန္တာရဝတီတိုင်း(မ်)
ရှမ်းပြည်နယ် ဆီဆိုင်မြို့နယ်အတွင်းက နောင်ကျောကျေးရွာအုပ်စု နဲ့ တောင်ရှေ့ကျေးရွာအုပ်စုအတွင်းကို စစ်ကောင်စီနဲ့ ပြည်သူ့စစ် PNO တို့ စစ်ကြောင်းထိုးလာခဲ့ပြီး နှစ်ဖက်တိုက်ပွဲ ဖြစ်ပွားခဲ့ကာ ပြည်သူ့ နေအိမ်မီးရှို့မှုနဲ့ ပြည်သူ သတ်ဖြတ်မှုတွေ လုပ်ခဲ့တယ်လို့ ပအိုဝ်းအမျိုးသားလွတ်မြောက်ရေးတပ်မတော် (PNLA) ရဲ့ ပြောရေးဆိုခွင့်ရှိသူ ခွန်ရိန်းယံက ကန္တာရဝတီတိုင်း(မ်) ကိုပြောပါတယ်။
စစ်ကောင်စီနဲ့ PNO တို့ဟာ ပြီးခဲ့တဲ့ ဩဂုတ်လ ၆ ရက်နေ့ကစပြီး အင်အား (၁၀၀၀) ကျော်စတင် စစ်ကြောင်းထိုးလာခဲ့တာဖြစ်ပြီး တစ်ပတ်ကျော် ကြာ နှစ်ဖက်တိုက်ပွဲဖြစ်ပွားခဲ့တယ်လို့ ခွန်ရိန်းယံက ပြောပါတယ်။
“အင်အားအဆမတန် ထိုးပြီး စစ်ဆင်လာတဲ့အခါမှာ သူတို့ ကျေးရွာအတွင်းကို ဝင်ရောက်နိုင်သွားတဲ့ အခြေအနေမျိုးမှာ ဖြစ်ပါတယ်။ အဲ့ဒီမှာ သူတို့က ရွာတွေကို မီးရှို့တယ်။ ပြီးတော့ ပြည်သူ တစ်ဦးကိုလည်း ပစ်သတ်ခဲ့တယ်ပေါ့လေ။”လို့ ခွန်ရိန်းယံက ဆိုပါတယ်။
အဆိုပါ အရပ်သားကို သတ်ဖြတ်မှုနဲ့ နေအိမ်မီးရှို့မှုကိုတော့ ပြီးခဲ့တဲ့ ဩဂုတ်လ ၉ ရက်နေ့မှာ လုပ်ခဲ့တာပါ။
ပစ်သတ်ခံရတဲ့ အရပ်သားကတော့ စလောင်းထောင်ကျေးရွာက အသက် ၃၈ နှစ်အရွယ် ဒေသခံ အမျိုးသား ဖြစ်ပြီး နေအိမ် မီးရှို့မှုဟာ နောင်ထော်ကျေးရွာမှာရှိတဲ့ ကယန်းပိုင်းရပ်ကွက် နဲ့ နောင်ထောဝ် ကုလားလမ်းကျေးရွာမှာ ဖြစ်ခဲ့ကာ နေအိမ် ၂၄လုံး ထက်မနည်း မီးလောင်ပျက်စီးခဲ့တယ်လို့ ဒီကနေ့ ဩဂုတ်လ ၁၃ ရက်နေ့မှာ PNLA ကထုတ်ပြန်ထားတာရှိပါတယ်။
စစ်ကြောင်းထိုးလာတဲ့ စစ်ကောင်စီနဲ့ ပြည်သူ့စစ် PNO တပ်ဖွဲ့တို့ကို PNLA တပ်ဖွဲ့ကနေ ပြန်လည် ခုခံတိုက်ခိုက်ခဲ့ပေမဲ့ စစ်ကောင်စီဖက် အင်အားများတဲ့အပြင် တိုက်ပွဲအတွင်း လေကြောင်းပါ အသုံးပြုတိုက်ခိုက်နေတာကြောင့် PNLA ဖက်မှ ဆုတ်ခွာခဲ့ရတယ်လို့ ဆိုပါတယ်။
တိုက်ပွဲအတွင်းမှာတော့ စစ်ကောင်စီနဲ့ ပြည်သူ့စစ် PNO တပ်ဖွဲ့ဘက်က လူအင်အား ၁၀၀ ဝန်းကျင် ထိခိုက်ကျဆုံးခဲ့တယ်လို့ ဆိုပေမယ့် ကန္တာရဝတီတိုင်း(မ်) အနေနဲ့ သီးခြားအတည်ပြုနိုင်ခြင်းမရှိပါဘူး။
အခုလို စစ်ကောင်စီ စစ်ကြောင်းထိုးတာ၊ အရ့ပ်သားကိုသတ်ဖြတ်တာနဲ့ နေအိမ် မီးရှို့တာတွေကြောင့် လက်ရှိ မှာ ဒေသခံ ၂၀၀၀ ကျော် ထပ်မံ တိမ်းရှောင်မှုတွေ ရှိခဲ့တယ်လို့ PNLA တပ်ဖွဲ့ဆီကနေ သိရပါတယ်။