ကန္တာရဝတီတိုင်း ( မ် )
လွိုင်ကော်မြို့တွင်းက ဘီလူးချောင်းရေမြှင့်တက်လာမှုကြောင့် ဘီလူးချောင်းအနီးအနားက ရပ်ကွက်နေလူထုတွေဟာ ဘေးလွှတ်ရာကို ရွေ့ပြောင်းနေရတယ်လို့ ဒေသခံတွေက ပြောပါတယ်။
ပြီးခဲ့တဲ့ ဩဂုတ်လနောက်ဆုံးပတ်ကစလို့ လွိုင်ကော်မြို့တွင်း ဘီလူးချောင်းအနီးအနားက နမ့်ကွက်၊ ဒေါနိုးကူး၊ ရွှေတောင် ရပ်ကွက်နဲ့ ရေဝပ်နိုင်တဲ့ နေရာတွေမှာ ရေမြှင့်တက်နေတယ်လို့ ဆိုပါတယ်။
“နမ့်ကွက်(ရပ်ကွက်) က လူတွေတော့ ဧက ၅၀၀(ရပ်ကွက်) ဖက် ကို ပြောင်းနေကြပြီ။ မနှစ်ကလောက် မကြီးသေးပေမယ့် သွားလာရတာတော့ အဆင်မပြေတော့ဘူး အဲ့ဖက်က။”လို့ လွိုင်ကော်မြို့ခံတစ်ဦးက ပြောပါတယ်။
ဩဂုတ်လ ၂၅ ရက်နေ့က “KAJIKI”အပူပိုင်း မုန်တိုင်းဖြတ်သန်းမှုရဲ့ အကျိုးဆက် နဲ့ ရှမ်းပြည်နယ်တောင်ပိုင်းက ရေကြီးရေလျှံမှုတွေဟာ မိုးဗြဲရေလှောင်တမံအတွင်းသို့စီးဆင်းပြီး၊ မိုးဗြဲရေကာတာကနေတဆင့် ရေဖောက်ချမှုကြောင့် ဘီလူးချောင်း ရေမြှင့်တက်လာခဲ့တယ်လို့ မြို့ခံတွေက ပြောပါတယ်။
“အင်းလေးရေ ကြီးရင်တော့ ဒီဖက်လည်း ကြီးမှာပဲ။ ဒါပေမဲ့ ရေပိုစီး ဖို့ မနှစ်က ပြင်လိုက်တော့ မနှစ်ကလောက်တော့ မကြီးနိုင်လောက်ဘူး။ ဒါပေမဲ့ ကရုစိုက်ပြီး ပြင်ဆင်ထားတာတော့လည်း မမှားဘူးပေါ့”လို့ ပရဟိတဆောင်ရွက်နေသူ တစ်ဦးက ပြောပါတယ်။
ရေကြီးမှု ကြုံတွေ့ရတဲ့ ဒေသခံတွေကို ကယ်ဆယ်ရေးဆောင်ရွက်မှု မရှိသေးပေမယ့် အရေးပေါ် အခြေအနေဖြစ်ပေါ်လာပါက ကူညီဆောင်ရွက်ဖို့ ပြင်ဆင်ထားတယ်လို့ ဆိုပါတယ်။
လွိုင်ကော်မြို့မှာတော့ ပြီးခဲ့တဲ့ ၂၀၂၄ခုနှစ်၊ စက်တင်ဘာလကလည်း မြို့ပေါ်ရပ်ကွက်က ရွှေတောင်၊ မင်းစု၊ ရှမ်းပိုင်း၊ ဒေါနိုးကူး၊ နမ့်ကွတ် ရပ်ကွက်က လူထုတွေဟာ ဘီလူးချောင်းရေမြှင့်တက်မှုကြောင့် ရေဘေးသင့်မှုဒဏ်ကို ကြုံတွေ့ခဲ့ရပါတယ်။