ကန္တာရဝတီတိုင်း (မ်)
ကရင်နီပြည်၊ ဒီးမော့ဆိုမြို့နယ်အနောက်ဖက်ခြမ်း တစ်နေရာမှာ စစ်ဘေးရှောင်တွေ တစ်နိုင်တစ်ပိုင် စိုက်ပျိုးထားတဲ့ စပါးခင်းနဲ့ ပြောင်းခင်းခြံမှာ ရေဝင်ရောက်တာကြောင့် ပျက်စီးမှုနဲ့ ကြုံတွေ့နေရတယ်လို့ စစ်ရှောင်ကော်မတီဝင်တစ်ဦးက ပြောပါတယ်။
စက်တင်ဘာလ ၂ ရက်နေ့၊ ညပိုင်းက တောင်ကျချောင်းရေ မြှင့်တက်လာပြီး ချောင်းဘေးနားက လယ်တွေကိုရေတွေဝင်ရောက်လာတာပါ။
“အခက်ခဲ တော့ အများကြီးဖြစ်တာပေါ့။ စစ်ရှောင်တွေမကဘူး ရွာခံတွေအတွက်ပါ သူတို့လည်း အဲ့မှာတောင်ယာတွေရှိတယ်။ နောက်ပြီး စစ်ရှောင်လည်း ရှိတော့ သူတို့ ထော်လာဂျီတို့ ကားတို့ ဖြတ်သွားဖြတ်လာဖို့ ရှိတယ်လေ။ ရေထပ်ကြီးမယ်ဆိုရင်တော့ သူတို့အတွက် အရမ်းအခက်ဖြစ်တာပေါ့” လို့ သူက ပြောပါတယ်။
ဒါ့အပြင် အများပြည်သူသွားလာတဲ့ လမ်းမတစ်နေရာမှာလည်း ရေဝင်ရောက်လာပြီး ရေထပ်မံမြှင့်တက်ပါက သွားလာရခက်ခဲမှာကို လူထုတွေက စိုးရိမ်နေကြပါတယ်။
အဆိုပါ ချောင်းဟာ နှစ်စဥ်နှစ်တိုင်း ရေကြီးမှုနဲ့ကြုံတွေ့ရသလို လူထုတွေ အဓိက ဆက်သွယ်သွားလာတဲ့ လမ်းဖြစ်တာကြောင့် တံတားတစ်စင်းဆောက်လုပ်ပေးနိုင်ဖို့ မျှော်လင့်တယ်လို့ စစ်ရှောင်ကော်မတီဝင်တစ်ဦးက ဆက်ပြောပါတယ်။
“တံတားတစင်းလောက်လုပ်ပေးရင် သွားလို့လာလို့ ပိုအဆင်ပြေမယ်။ ကလေးတွေ ကျောင်းသွားရင်လည်း အပိုအဆင်ပြေတာပေါ့” လို့ သူက ဆိုပါတယ်။
ပြီးခဲ့တဲ့နှစ်က ချောင်းရေမြှင့်တက်လာပြီး ရေစီးသန်တဲ့အရှိန်ကြောင့် ဆိုင်ကယ်နဲ့လူ မျှောပါသွားတဲ့ ဖြစ်စဉ်လည်း ရှိခဲ့တယ်လို့ စစ်ဘေးရှောင်တွေက ပြောပါတယ်။
အဆိုပါ လမ်းမကို ဖြတ်သန်းသွားလာတဲ့ စစ်ရှောင်ရပ်ကွက် (၂၂) ခုရှိပြီး လူဦးရေ ၃၆၀၀ ကျော်ရှိပါတယ်။