ကန္တာရဝတီတိုင်း(မ်)
ကရင်နီပြည် လွိုင်ကော် မြို့နယ် အရှေ့ဘက်ခြမ်းက တောင်သူတွေဟာ ပြီးခဲ့တဲ့နှစ်အတွင်း ဒေသတွင်းက လမ်းကြောင်းပိတ်ဆို့ပြီး စိုက်ပျိုးထားတဲ့ ပြောင်းတွေရောင်းမထွက်ခဲ့တာကြောင့် ဒီကနှစ် စိုက်ပျိုးရာသီမှာတော့ နှမ်းကို ရွေးချယ်စိုက်ပျိုးလားတဲ့ တောင်သူတွေပိုများလာပါတယ်။
“အိမ်တိုင်းက ငွေရေးကြေးရေး အဆင်မပြေဘူးပဲ ပြောဆိုကြတယ်။ နှမ်းက နည်းနည်း ပြောင်းကနည်းနည်း အကုန်လုံးက လုပ်ကြတယ်။ ဒါပေမယ့် နှမ်းမစိုက်တာကတော့ တချို့အိမ်လောက်ပဲ ရှိမယ်။ဒီနှစ်ကတော့ နှမ်းတွေ တော်တော်များများ စိုက်ပျိုးလာကြတယ်။ စျေး မရှိမှာလည်း စိုးရိမ်ရတယ်။” နှမ်းစိုက်တောင်သူ အသက် ၅၀ ကျော်အရွယ် အမျိုးသမီး တဦးက အခုလို ပြောပါတယ်။
လွိုင်ကော်မြို့နယ်အရှေ့ဘက်ခြမ်းမှာ တောင်သူတွေဟာ စီးပွားဖြစ်ပြောင်းတွေကို အဓိကထားစိုက်ပျိုးလေ့ရှိကြတာပါ။
စစ်ရှောင်ကာလ အချိန်ကြာလာတာနဲ့အမျှ စားနပ်ရိက္ခာတွက် စိန်ခေါ်မှုတွေ က ပိုမိုမြင့်မားလာတာကြောင့်လည်း စားဝတ်နေရေးဖြေရှင်းနိုင်ဖို့အတွက် စပါးနဲ့ နှမ်းကိုသာစိုက်ပျိုးကြောင်း ဒေသခံ စိုက်ပျိုးတောင်သူ အမျိုးသား တဦးက ပြောပါတယ်။
“ပြောင်းသိပ်မစိုက်ရဲတော့ဘူး။ ဘာလို့ဆိုရင် ပြောင်းက စျေးအရမ်းကျတယ်ကော။ အရေးကြီးဆုံးကတော့ စပါးပဲ။ အဲတာကြောင့် စပါး စိုက်တယ်။ နှမ်းက စျေးရှိတယ်ပြောတော့ နှမ်းစိုက်တယ်”လို့ တောင်သူအမျိုးသား တဦးကပြောပါတယ်။
လွိုင်ကော်မြို့နယ် အရှေ့ဘက်ခြမ်း မှာတော့ ၂၀၂၆ နှစ်စပိုင်းအတွင်းမှာပဲ စစ်တပ်ဘက်က နယ်မြေ စိုးမိုးမှု ပိုမို ရယူလာတာကြောင့် ဒီကနှစ် စိုက်ပျိုး ရာသီမှာတော့ ယခင်နှစ်ကထက် စိုက်ပျိုးနိုင်မှုနှုန်းကလည်း ကျလာတယ်လို့ ဆိုထားပါတယ်။
ကရင်နီပြည် လွိုင်ကော် အရှေ့ဘက်ခြမ်းမှာတော့ စစ်ရှောင် အုပ်စု ၄ စု ရှိပြီး စစ်ရှောင် စုစုပေါင်း ဦးရေ ၁ သောင်းကျော် ရှိတယ်လို့ သိရပါတယ်။
