ကရင်နီပြည်၊ ဖားဆောင်းမြို့အခြေစိုက် ခလရ ၁၃၄ ကို သိမ်းပိုက်ရရှိခဲ့တယ်လို့ ကရင်နီတပ်ပေါင်းစုံက ဒီကနေ့ ဇူလိုင်လ ၃ ရက်နေ့မှာ ထုတ်ပြန်ပါတယ်။
ကရင်နီတပ်ပေါင်းစုံ တော်လှန်ရေးတပ်ဖွဲ့က ဖားဆောင်းမြို့နယ်မှာ ကျန်ရှိနေတဲ့ စစ်ကောင်စီတပ်စခန်းနှစ်ခုဖြစ်တဲ့ ခလရ ၁၃၄ နဲ့ ၁၃၅ကို ဇွန်လ ၂၅ ရက်နေ့က စတင်ဝင်ရောက်တိုက်ခိုက်ခဲ့ပြီး ခလရ ၁၃၄ ကို ဇွန်လ ၃၀ ရက်နေ့မှာ သိမ်းပိုက်ရရှိခဲ့တာဖြစ်တယ်လို့ ဆိုပါတယ်။
ခလရ ၁၃၄ ရှိ လက်နက်ပစ္စည်းတွေကိုလည်း သိမ်းဆည်းရမိပြီး ဖမ်းဆီးရမိတဲ့ စစ်သုံ့ပန်းနဲ့ မိသားစုဝင်တွေကို အုပ်ချုပ်ရေးအဖွဲ့က ထိန်းသိမ်းစောင့်ရှောက်ထားတယ်လို့ ကရင်နီအမျိုးသားများကာကွယ်ရေးတပ် KNDF သတင်းနှင့်ပြန်ကြားရေးတာဝန်ခံ တာအယ်စိုးက ကန္တာရဝတီတိုင်း(မ်) ကို ပြောပါတယ်။
“စစ်သုံ့ပန်းတွေနဲ့ သူတို့ရဲ့ မိသားစုဝင်တွေကို အုပ်ချုပ်ရေးအဖွဲ့တွေက ထိန်းသိမ်းပြီးတော့ စီမံနေတယ်။ သူတို့ထိန်းသိမ်းစောင့်ရှောက်ထားတယ်လို့ ပြောလို့ရပါတယ်။ စစ်သုံ့ပန်းစာရင်းနဲ့ပတ်သက်တာတွေကိုတော့ အသေးစိတ် ပြီးကျမှ ပြန်ထုတ်ပြန်ပေးပါ့မယ်” လို့ KNDF သတင်းနှင့်ပြန်ကြားရေးတာဝန်ခံ တာအယ်စိုးက ပြောပါတယ်။
လက်ရှိမှာတော့ ဖားဆောင်မြို့မှာ ခလရ ၁၃၅ တပ်စခန်းတစ်ခုသာကျန်ရှိနေပြီး ဆက်လက်သိမ်းပိုက်ဖို့ ဆောင်ရွက်နေဆဲ ဖြစ်တယ်လို့ တာအယ်စိုးက ဆက်ပြောပါတယ်။
စခန်းသိမ်းတိုက်ပွဲအတွင်း စစ်ကောင်စီတပ်ရဲ့ FTC 2000G လေယာဥ်တစ်စင်းကိုပစ်ချနိုင်ခဲ့တယ်လို့လည်း တပ်ပေါင်းစုက ထုတ်ပြန်ချက်မှာ ဖော်ပြထားပါတယ်။ စစ်ကောင်စီကတော့ အဆိုပါလေယာဥ်က စက်ချွတ်ယွင်းမှုကြောင့် ဒါမှမဟုတ် ရာသီဥတုဆိုးရွားမှုကြောင့် ပျက်ကျသွားတာလို့ ဆိုထားပါတယ်။
တော်လှန်ရေးတပ်ပေါင်းစုတွေက ဖားဆောင်းမြို့အခြေစိုက် ခလရ ၁၃၄ ၊ ၁၃၅ တပ်စခန်းကို ၂၀၂၄ ခုနှစ် ဇန်နဝါရီလ ၂၉ ရက်နေ့မှာစတင်ဝင်ရောက် သိမ်းပိုက်ခဲ့ပေမဲ့ လက်နက်ခဲယမ်းမလုံလောက်မှုကြောင့် အကြိမ်ကြိမ်အခါခါ တပ်ဆုတ်ခဲ့ရမှုတွေ ရှိခဲ့တယ်လို့လည်း သိရပါတယ်။