စုံစမ်းစစ်ဆေးရေးအဖွဲ့တွေ့ရှိချက် ပွင့်လင်းမြင်သာဖို့ လွှတ်တော်ဥက္ကဌထံ တင်ပြတောင်းဆို

ကန္တာရဝတီတိုင်း(မ်)

ကယားပြည်နယ်ဝန်ကြီးချုပ်အား စွပ်စွဲပြစ်တင်ခြင်းနဲ့ပတ်သက်ပြီး စုံစမ်းစစ်ဆေးနေတဲ့ စုံစမ်းစစ်ဆေးရေးအဖွဲ့၊ သက်ဆိုင်ရာတာဝန်ရှိတဲ့ဝန်ကြီးဌာန၊ လွှတ်တော်အမတ်တွေကို ကယား(ကရင်နီ)အရပ်ဖက်အဖွဲ့အစည်း ၂၃ ဖွဲ့က သဘောထားစုစည်းချက်တွေကို သြဂုတ်လ ၃၁ရက်နေ့မှာ အိတ်ဖွင့်ပေးစာ ပေးပို့လိုက်ပါတယ်။

ကရင်နီအမျိုးသမီးအစည်းအရုံးမှ အတွင်းရေးမှူး(၂) မော်ဖရေမြာက “လွှတ်တော်ဖက်ကနေ အပြန်အလှန်ထိန်းကျောင်းတဲ့သဘောမျိုးဆိုတာ ဥပဒေထဲမှာ လုပ်ထုံးလုပ်နည်းအတိုင်းပါပြီးသားဖြစ်နေတယ်။ ဒီအချိန်မှာ အလွဲသုံးစားမှုတွေ ပွင့်လင်းမြင်သာမှုမရှိတဲ့ Issue ပေါ်လာတဲ့အချိန်မှာ လွှတ်တော်ဖက်က Check and balance ပေါ့ သူတို့လုပ်ရမယ့်တာဝန်ဖြစ်နေတဲ့ခါကျတော့ စုံစမ်းစစ်ဆေးရေးဖွဲ့လိုက်တဲ့အပေါ်မှာ ဒါတွေက ဝန်ကြီးချုပ်အနေနဲ့ မှားသည်ဖြစ်စေ မှန်သည်ဖြစ်စေ အပြန်အလှန် ပွင့်ပွင့်လင်းလင်းတွေ့ဆုံဖို့လိုတာပေါ့” လို့ ပြောပါတယ်။

သြဂုတ်လ ၁၄ရက်နေ့မှာ ကယားပြည်နယ်ဝန်ကြီးချုပ်အား စွပ်စွဲပြစ်တင်ခြင်းနဲ့စပ်လျဉ်းတဲ့ (၅)ဦးပါ စုံစမ်းစစ်ဆေးရေးကော်မတီအဖွဲ့ကို ဖွဲ့စည်းလိုက်ပြီး အများပြည်သူနဲ့သက်ဆိုင်တဲ့ မြေနေရာတွေကို ပုဂ္ဂလိကလုပ်ငန်းအတွက် အလွဲသုံးစားပြုလုပ်ခြင်းနဲ့ ပြည်သူပိုင် စက်ယန္တရားဌားရမ်းခအား ပွင့်လင်းမြင်သာမှုမရှိဘဲ စီမံခန့်ခွဲနေမှုအပေါ် စုံစစ်စစ်ဆေးရန် ဖွဲ့စည်းခဲ့တာပဲဖြစ်ပါတယ်။

အရပ်ဖက်အဖွဲ့အစည်းအသီးသီး ပြည်နယ်လွှတ်တော်က ပြည်နယ်ဝန်ကြီးချုပ်ကို စွပ်စွဲပြစ်တင်တဲ့ကိစ္စကို သက်ဆိုင်ရာ ဥပဒေပြဌာန်းချက်ပါ လုပ်ထုံးလုပ်နည်းနဲ့အညီ ဆောင်ရွက်မှုအပေါ် ကြိုဆိုအသိအမှတ်ပြုကြောင်းလည်း ထုတ်ပြန်ချက်မှာ ဖော်ပြထားပါတယ်။

အရပ်ဖက်အဖွဲ့အစည်း (၂၃)ဖွဲ့ထဲမှ တစ်ဖွဲ့အပါအဝင်ဖြစ်တဲ့ ကရင်နီလူ့အခွင့်အရေးအဖွဲ့ ဒါရိုက်တာ ကိုဗညားက “စွပ်စွဲပြစ်တင်မှုမှာပါနေတဲ့ စက်ယန္တရားကိစ္စကလည်း အရင်တုန်းက ကြားဖူးတာရှိတယ် ဒါက ပြည်သူ့ဘဏ္ဍာကိုအလွဲသုံးစားလုပ်တယ်လို့သတ်မှတ်တယ်ပေါ့နော အဲဒီအပေါ်မှာ အရပ်ဖက်ကလည်း ဒီစုံစမ်းစစ်ဆေးမှုအရက ပြည်သူ့ဘဏ္ဍငွေဖြစ်တယ် စနစ်တကျကော်မတီဖွဲ့တယ် အသိပေးပြီးလုပ်တယ်ဆိုတဲ့ဟာကို ကျနော်တို့က ကြိုဆိုတယ်ဆိုတဲ့အကြောင်းကို အသိပေးချင်တဲ့ စဉ်းစားချက်ပါ။” လို့ ပြောပါတယ်။

ပြည်နယ်တွင်းရှိ အရပ်ဖက်လူမှုအဖွဲ့အစည်းတွေအနေနဲ့ အများပြည်သူပိုင်မြေနေရာကိုအလွဲသုံးစားပြုလုပ်ခြင်းနဲ့ စက်ယန္တရားဌားရမ်းခအား ပွင့်လင်းမြင်သာမှုမရှိတဲ့အပေါ် စုံစမ်းစစ်ဆေးဖို့အပြင် နောက်ထပ် အကြောင်းအရာ ခေါင်းစဉ် လေးမျိုး ကိုလည်း စုံးစမ်းစစ်ဆေးဖို့ တိုက်တွန်းတောင်းဆိုထားပါတယ်။

အများပြည်သူ သိရှိနိုင်ဖို့ ငွေကြေးစီမံခန့်ခွဲမှု ပွင့်လင်းမြင်သာမှုမရှိတဲ့ သတ္တုသန့်စင် စက်ရုံတည်ဆောင်ခြင်းနဲ့ စက်မှုဇုံစီမံခန့်ခွဲလုပ်ဆောင်ခြင်း၊ ပန်းဥယျာဉ်မြေယာရှုခင်းလုပ်ငန်း၊ ဘာသာရေးဆိုင်ရာအလှူအဒါန်း ပြုလုပ်မှုနဲ့ တိုင်ရင်းသားစာပေ၊ ယဉ်ကျေးမှုအသင်းအဖွဲ့တွေကို ထောက်ပံ့ငွေပေးအပ်ခြင်း၊ ပြည်နယ်ဝန်ကြီးချုပ်၏ခရီးစဉ်တိုင်းမှာ ပေးဝေတဲ့ ငွေကြေးဆိုင်ရာကိစ္စ၊ ကန္တာဟေဝန်ပန်းခြံတွင် ဗိုလ်ချုပ်ကြေးရုပ်တည်ဆောင်ခြင်းနဲ့ ပန်းအလှဆင်ခြင်း စတဲ့ လုပ်ငန်းတွေကို စုံစမ်းစစ်ဆေးပြီး ပွင့်လင်းမြင်သာစွာချပြ ရှင်းလင်းပေးဖို့ ထုတ်ပြန်ချက်မှာဖော်ပြပါတယ်။

သြဂုတ်လ ၂၅ရက်နေ့နဲ့ ၂၆ရက်နေ့မှာ စုံစမ်းစစ်ဆေးတဲ့ကော်မတီကနေ ကယားပြည်နယ်ဝန်ကြီးချုပ်ကို စုံစမ်းဖို့ မေးမြန်းဖို့ဆင့်ခေါ်ပေမယ့်လည်း ကိုယ်စားလှယ်နဲ့သာ လွဲပြီး လာရောက်ဖြေရှင်းတဲ့အပေါ်မှာလည်း အရပ်ဖက်အဖွဲ့အစည်းက ဝေဖန်ထားပါတယ်ပြီး ကိုယ်တိုင်လာရောက်သင့်တယ်လို့ ဆိုပါတယ်။

ကရင်နီလူ့အခွင့်အရေးအဖွဲ့မှ ဒါရိုက်တာ ကိုဗညားက “ကော်မတီရဲ့ဆင့်ခေါ်မှုကိုတော့ သူ့အနေနဲ့လာသင့်တယ် ပြည်သူလူထုတွေကိုအချက်အလက်ပြန်ချပြတဲ့နေရာမှာ ပိုပြီးတော့ မှန်မှန်ကန်ကန်နဲ့ရှင်းရှင်းလင်းလင်းသိအောင် သူကိုယ်တိုင်က ရှင်းပြတာအကောင်းဆုံးဖြစ်မယ်။ ဒီအခြေအနေမှာအကောင်းဆုံးက သူလာတာအကောင်းဆုံးဖြစ်တယ် အသိအမှတ်ပြုခြင်းဖြစ်တယ် အထိမ်းအမှတ်ပြုခြင်းဟာ ဒီမိုကရေစီနဲ့အနှစ်သာရကို လေးစားရာရောက်တယ်လို့ မှတ်ယူပါတယ်” လို့ ဆိုပါတယ်။

လာမည့် စက်တင်ဘာလ ၁ ရက်နေ့ ကယားပြည်နယ်လွှတ်တော်အတွင်းမှာ စုံစမ်းစစ်ဆေးရေးအဖွဲ့ကနေပြီး တွေ့ရှိချက်တွေကို အဆိုတင်သွင်းသွားဖို့ရှိတယ်လို့ ကြားသိရပါတယ်။

Comments

comments

Next Post

ခွေးဂေဟာ တည်ဆောက်ရေးရုတ်သိမ်းလိုက်ပေမယ့်လည်း ငွေပြန်လည်မရရှိသေး

Tue Sep 1 , 2020
အန်ထော်နီ ၂၀၁၇-၁၈ ဘဏ္ဍာရေးနှစ်မှာ လွိုင်ကော်မြို့နယ်အတွင်း ခွေးဂေဟာ တည်ဆောက်ရေးစီမံကိန်း ကန့်ကွက်ခံရတဲ့အတွက် ချပေးခဲ့တဲ့ ဘတ်ဂျက်ငွေတွေကို သက်ဆိုင်ရာ ကုမ္မဏီကနေပြီး ပြန်အပ်ဖို့ ကျန်ရှိနေပါသေးတယ်လို့ ပြည်နယ်စာရင်းစစ်ချုပ်ရဲ့ ပြောပြချက်အရ သိရပါတယ်။ ချမှတ်ပေးထားတဲ့ ဘတ်ဂျက်ငွေဖြင့် တည်ဆောက်ဖို့လိုအပ်တဲ့ ပစ္စည်းတွေတစ်ချို့ဝယ်ယူထားခဲ့ပြီးနောက်မှာ ဒေသခံတွေက ကန့်ကွက်မှုတွေထွက်ပေါ်လာတဲ့အတွက် စီမံကိန်းကို ပြန်လည်ရုတ်သိမ်းခဲ့ခြင်းဖြစ်ပါတယ်။ “ နောက်ပြီးတော့ စောဌေးမြင့်ကုမ္ပဏီရှိသေးတယ်။ စောဌေးမြင့်က ခွေးဂေဟာဆောက်ဖို့အတွက်ဆိုပြီးတော့ ပြည်သူတွေကကန့်ကွက်တဲ့အတွက်ကြောင့် မဆောက်ဖြစ်တော့ဘူး။ မဆောက်ဖြစ်တော့ သူ့ကိုပေးထားတဲ့ငွေတွေကနေပြီးတော့ ပစ္စည်းတစ်ချို့ဝယ်တယ်။ အဲ့ပစ္စည်းတွေကိုတော့ အစိုးရပြန်လက်ခံလိုတယ်။ လက်ခံပြီးတော့ မဝယ်ပဲနဲ့သူ့ဆီမှာပါသွားတဲ့ငွေက (၅၁.၄၃၅) သန်း။ အဲ့တာက အဲ့ကုမ္ပဏီမှာကျန်သွားတယ်ပေါနော်။” လို့ ပြည်နယ်စရင်းစစ်ချုပ် ဦးအောင်မောင်း ကပြောပါတယ်။ ပြည်နယ် စာရင်းစစ်ချုပ်ကနေပြီး ၂၀၁၈-၁၉ ဘဏ္ဍာရေးနှစ် […]