တစ်ရက်လျှင် ကျပ်သုံးသိန်းအရှုံးပေါ်နေသည့် လွိုင်ကော် မီးရထားရပ်နားဖွယ်ရှိနေ

ထျိုးမြာ

ကယားပြည်နယ် လွိုင်ကော်မြို့မှ သာစည် ဘူတာသို့ ပြေးဆွဲနေသောမီးရထားမှာ တစ်ရက်လျှင် ကျပ်သုံးသိန်းခန့် အရှုံးပေါ်နေသောကြောင့် ရပ်နားရန်အခြေအနေရှိသည်ဟု လွိုင်ကော်ဘူတာရုံမှ ဒုတိယရုံပိုင် ဦးမင်းမင်းဦးက ပြောသည်။
“လက်ရှိမှာ အရှုံးပေါ်နေလို့ ရပ်လိုက်ဖို့အခြေအနေရှိတယ်။ တစ်ရက်တစ်ရက်ကို သုံးသိန်းလောက်ရှုံးတယ်။ ပြည်နယ်အစိုးရက ခွင့်ပြုရင် ဖြုတ်ဖို့ရှိတယ် ” ဟု ၎င်းကပြောသည်။
သာစည်အထိသာရောက်သည့် အမှတ် (၁၄၈)အစုံ လွိုင်ကော်- သာစည်မီးရထားသည် သွားလာသည့် ခရီးသည် မရှိတော့သဖြင့် အရှုံးပေါ်နေရခြင်းဖြစ်သည်။
“ ခရီးသည်တွေကမရှိဘူး။ တစ်ရက်ကို သုံးယောက်နှုန်းလောက်တောင်မရှိဘူး။ လမ်းစရိတ်ပြတ်တဲ့သူတွေပဲ လာစီးတယ် ”ဟု ဦးမင်းမင်းဦးကပြောသည်။
ပြည်နယ်အစိုးရအနေနှင့် ရပ်ရန်ခွင့်ပြုပါက ရုံးချုပ်အနေနှင့် ရပ်စဲထားရန်ရှိသော်လည်း ဝန်ထမ်းများ သွားရေးလာရေး အဆင်ပြေစေရန်နှင့် စက်ပစ္စည်းအင်္ဂါရပ်နှင့်အညီရှိစေရန်အတွက် မီးရထားရှိသင့်သည်ဟု ဦးမင်းမင်းက ဆိုပြန်သည်။
ကားဖြင့်ခရီးသွားလျှင်ဝန်ဆောင်မှုကောင်းပြီး လမ်းခရီးကို ချက်ချင်းရောက်နိုင်သော်လည်း ရထားဖြင့်ခရီးသွားပါက လမ်းခရီးကြာပြီး လိုရာလမ်းခရီးကို ချက်ချင်းမရောက်နိုင်သဖြင့် ဘူတာတွင် လူပါးရခြင်းဖြစ်သည်ဟု ခရီးသွား ဒေသခံများထံမှ သိရသည်။
လွိုင်ကော်-သာစည်ကို ရထားစရိတ် (၂၃၀၀)ကျပ်ဖြစ်ပြီး နံနက်ငါးနာရီထွက်ကာ သာစည်သို့ ညအချိန်ဆိုက်ပြီး တစ်နေ့တစ်ကြိမ်ပုံမှန်ပြေးဆွဲပေးနေခြင်းဖြစ်သည်။
ယခင်က ဈေးရောင်းခရီးသည်များသည် ပွဲရောင်းရန် တစ်နေရာနှင့် တစ်နေရာသို့ ရထားဖြင့် ခရီးကူးကြသော်လည်း အခုချိန်တွင် ဈေးရောင်းခရီးသည်များလည်း မရှိတော့ကြောင်းသိရသည်။
ကယားပြည်နယ်အတွင်းရှိ မီးရထားလမ်းများမှာ အရေအသွေး စိတ်မချရခြင်း၊ ရထားစီးလျှင် အချိန်ကြာလွန်းခြင်း စသည့်အချက်များကြောင့် မစီးဖြစ်ကြကြောင်း ခရီးသည်များ ပြောသည်။

Comments

comments

Next Post

ပြောင်းစိုက်တောင်သူတွေအတွက် အစိုးရဘယ်လိုကူညီနိုင်မလဲ

Thu Dec 1 , 2016
မူအက်စတာ ကယားပြည်နယ်တွင်းရှိ တောင်သူအများစုမှာ ပြောင်းဖူးများကို စိုက်ပျိုးနေကြသူများဖြစ်ရာ ယခုကဲ့သို့ ဈေးကွက်မရှိသည့်အခြေအနေသည် တောင်သူများအတွက် ခက်ခဲသည့် ကာလတစ်ခု ဖြစ်လာခဲ့သည်။ ပြီးခဲ့သည့်နှစ်များက ပြောင်းဖူးများစိုက်ပျိုးကြပြီး ပြောင်းဖူးဈေးကောင်းရကြသဖြင့် ယခုနှစ်တွင် လည်း ပြောင်းဖူးဈေးကောင်းလိမ့်မည်ဟု တောင်သူများက ယူဆခဲ့ကြပြီး ပြောင်းမျိုးများကို တိုးချဲ့စိုက်ပျိုးကြရာတွင် ဈေးကွက်အခြေအနေ မတည်ငြိမ်ခြင်းကြောင့် အခက်အခဲများနှင့် ရင်ဆိုင်ခဲ့ရခြင်းဖြစ်သည်။ တောင်သူများမှာ နွေနှောင်း-မိုးဦးရာသီတွင် အကောင်းဆုံးဖြစ်မည်ဟု ယူဆကြသည့် ပြောင်းမျိုးစေ့များကို အလုအယက်ဝယ်ယူကြပြီး စိုက်ပျိုးခဲ့ကြသည်။ အချို့မှာ တစ်ကြိမ်စိုက်ပျိုးပြီး မိုးမရခြင်း၊ အပင်ပေါက်မကောင်းခြင်း စသည်တို့ကြောင့် နှစ်ခါပြန်စိုက်ပျိုးခဲ့ကြရသည်။ အချို့ တောင်သူများတွင်မူ စိုက်ပျိုးချင်ကြသော်လည်း အရင်းအနှီးမလုံလောက်၍ အတိုးများဖြင့် ချေးငွေများချေးယူကြပြီး ပြောင်းများ စိုက်ပျိုးခဲ့ကြရသည်။ သို့သော် ယခုကဲ့သို့ တစ်နိုင်ငံလုံး ပြောင်းဈေးများ […]

ဆက်စပ်သတင်းများ