ကန္တာရဝတီတိုင်း(မ်)
ရှမ်း-ကရင်နီနယ်စပ် စစ်ရှောင်စခန်းတစ်နေရာကို စစ်ကြောင်းထိုးလာတဲ့ စစ်ကောင်စီတပ်ကနေပြီး အသက်၈၁နှစ် နဲ့ ၇၈နှစ် အရွယ် အဖိုး၊ အဖွား ၂ ဦးကို မီးရှို့သတ်ဖြတ်ခဲ့သလို ၇တန်းကျောင်းသားတစ်ဦးကိုလည်း ပစ်ခတ်သတ်ဖြတ်ခဲ့တယ်လို့ ဖယ်ခုံပြည်သူ့ကာကွယ်ရေးတပ် တပ်ရင်း(၂)က ဒီကနေ့ သတင်းထုတ်ပြန်ပါတယ်။
“ ပြည်သူတွေကိုကျတော့ လူသားဒိုင်းလုပ်တယ်။ ပြည်သူ အဖိုး ၊ အဖွား နှစ်ယောက်ကိုလည်း မီးရှို့ သတ်လိုက်တယ်လေ။ ကလေးလေး ကျောင်းသားအရွယ်ပေါ့ သူတို့ သတ်တယ်လေ။ နောက် ထိခိုက်မှုလည်း နှစ်ဦး နှစ်ဖက် များတယ်။ “ လို့ ဖယ်ခုံပြည်သူ့ကာကွယ်ရေးတပ် တပ်ရင်း(၂) တာဝန်ရှိသူတစ်ဦးက ကန္တာရဝတီတိုင်း(မ်)ကို ပြောပါတယ်။
အသက် (၇၈)နှစ်အရွယ် အဖိုး ဦးလှငြိမ်း၊ အသက် (၈၁)နှစ်အရွယ် အဖွားဒေါ်မူလူး နဲ့ ၇တန်းကျောင်းသားတစ်ဦးဖြစ်သူ အသက် (၁၅)နှစ်အရွယ် မောင်ကျော်ဟူး တို့ဟာ စစ်ကောင်စီရဲ့သတ်ဖြတ်ခြင်းခံခဲ့ရတယ်လို့ ထုတ်ပြန်ထားပါတယ်။
မတ်လ ၁၂ရက်နေ့မှာ ရှမ်း-ကရင်နီနယ်စပ် မိုးဗြဲအရှေ့ဘက်ကမ်းရှိတောင်ပေါ် စစ်ဘေးရှောင်တစ်နေရာမှာ စစ်ကြောင်းထိုးလာတဲ့ တပ်မ ၆၆ ကနေပြီး သက်ကြီးရွယ်အိုနဲ့ ကလေးအချို့ကိုဖမ်းဆီးတာတွေ ရှိပြီး လူသားဒိုင်းအဖြစ်အသုံးပြုတာတွေ ရှိတယ်လို့ ထုတ်ပြန်ချက်မှာ ဖော်ပြထားပါတယ်။ ဖမ်းဆီးထားတဲ့ စစ်ရှောင်ပြည်သူတွေထဲက ၃ဦး သတ်ဖြတ်ခြင်းခံခဲ့ရပြီး စစ်ရှောင်တချို့ ပြန်လွှတ်မြောက်ခဲ့တယ်လို့ သိရပါတယ်။
လက်ရှိမှာဆိုရင်လည်း စစ်ကြောင်းထိုးလာတဲ့ စစ်ကောင်စီနဲ့ ပူးပေါင်းတပ်တို့ တိုက်ပွဲပြင်းထန်နေဆဲဖြစ်ပြီး စစ်ကောင်စီကနေပြီး ပြည်သူတွေကို လူသားဒိုင်းအဖြစ် အသုံးပြုတာတွေလည်း ရှိနေတယ်လို့ သူက ဆက်ပြောပါတယ်။
မတ်လ ၁၂ရက်နေ့မှာပဲ စစ်ရှောင်တွေကို ကယ်ဆယ်ဖို့အတွက် ပူးပေါင်းတပ်တွေနဲ့ စစ်ကောင်စီတို့ ညနေပိုင်း ၃နာရီအချိန်မှာ တိုက်ပွဲပြင်းထန်ခဲ့ပြီး ဖယ်ခုံအခြေစိုက်တပ်ရင်းနဲ့ ၄၂၂ တပ်ကနေ လက်နက်ကြီးပစ်ကူမြောက်များစွာအသုံးပြုတိုက်ခိုက်ခဲ့တယ်လို့ ဆိုပါတယ်။ ညနေ ၅နာရီခွဲအချိန်မှာတော့ စစ်ကောင်စီဖက် တိုက်လေယာဉ် နှစ်စီးနဲ့ ၃ကြိမ်ခန့် လေကြောင်းတိုက်ခိုက်ခဲ့ပါတယ်။
တိုက်ပွဲအတွင်းမှာစစ်ကောင်စီဖက် တပ်ကြပ်ကြီး နဲ့ ဒု-တပ်ကြပ်အပါအဝင် ထိခိုက်သေဆုံးမှု များပြီး စစ်ကောင်စီ အလောင်း ၄လောင်းနဲ့ စစ်အသုံးအဆောင်တချို့သိမ်းဆည်းမိခဲ့တယ်လို့ ထုတ်ပြန်ထားပါတယ်။ စစ်ကောင်စီတပ်သားသေဆုံးတဲ့အရေအတွက်ကို အတည်ပြုဖို့ ကြိုးစားနေဆဲလို့ ဆိုပါတယ်။
တိုက်ပွဲအတွင်း စစ်ရှောင်ကိုကယ်ထုတ်ဖို့ ကြိုးစားရင်း ပူးပေါင်းတပ်ဖွဲ့ဖြစ်တဲ့ ဖယ်ခုံPDFတပ်ရင်း (၂)က ရဲဘော်တစ်ဦး နဲ့ KNDF တပ်ရင်း ၃ က ရဲဘော် ၂ဦး ကျဆုံးပြီး ပူးပေါင်းတပ်ဖွဲ့ဖက် ၆ဦး ထိခိုက်ဒဏ်ရာရရှိခဲ့တယ်လို့ သိရပါတယ်။
