ကန္တာရဝတီတိုင်း( မ် )
ဒီကနေ့ ဖေဖော်ဝါရီလ ၂၇ ရက်နေ့ ညနေပိုင်းမှာ စစ်ကောင်စီရဲ့ လက်နက်ကြီးပစ်ခတ်မှုကြောင့် ဒီးမော့ဆိုအရှေ့ဘက်ခြမ်းက အသက် ၇၀ အရွယ် အမျိုးသားတစ်ဦး သေဆုံးခဲ့တယ်လို့ ကရင်နီအမျိုးသားများကာကွယ်ရေးတပ် ( KNDF ) က ဒီကနေ့ညပိုင်းမှာ သတင်းထုတ်ပြန်ပါတယ်။
သေဆုံးသွားသူမှာ အသက် ( ၇၀ ) အရွယ် အမျိုးသားတစ်ဦးဖြစ်ပြီး လက်နက်ကြီးစထိမှန်မှုကြောင့်ဆေးခန်းပို့ဆောင်ချိန် လမ်းမှာ သေဆုံးခဲ့တယ်လို့ ဆိုပါတယ်။ ဒါ့အပြင် အမျိုးသားတစ်ဦး၊ အမျိူးသမီးတစ်ဦးလည်း ထိခိုက်မှုရှိခဲ့တယ်လို့ သိရပါတယ်။
လက်နက်ကြီးထိမှန်မှုကြောင့် နေအိမ် ၄ လုံး ပျက်စီးခဲ့ရပြီး တိရိစ္ဆာန်တချို့လည်း ထိခိုက်ဒဏ်ရာရထားပါတယ်။
တိုက်ပွဲဖြစ်ပွားခြင်းမရှိတဲ့ကျေးရွာတွေကို ဘောလခဲအခြေစိုက် စစ်ကောင်စီတပ်ကနေ ပစ်ခတ်ခဲ့တာလို့ ထုတ်ပြန်ချက်မှာဖော်ပြထားပါတယ်။ ဒီကနေ့ည ၉ နာရီအချိန်အထိ စစ်ကောင်စီက ဒီးမော့ဆိုမြို့နယ်က ကျေးရွာတွေကို လက်နက်ကြီးနဲ့ ပစ်ခတ်နေတာဖြစ်ပါတယ်။
စစ်ကောင်စီဘက်က စစ်ရှောင်တွေ၊ လူထုတွေရှိတဲ့နေရာကို လက်နက်ကြီးတွေနဲ့ အဆက်မပြတ် ပစ်ခတ်လာတဲ့အတွက် အရပ်သားအများအပြားထိခိုက်မှာကို စိုးရိမ်တယ်လို့ ဒီးမော့ဆိုအနောက်ခြမ်းက ဒေသခံတစ်ဦးက ပြောပါတယ်။
“ည ၇နာရီကျော် ၈နာရီထိုးခါနီးမှာ ဒီးမော့ဆိုအနောက်ခြမ်းကို တောက်လျှောက်ပစ်တော့တာပဲ။ တကယ့်ကိုမှ မီးလုံးပုံစံ လက်နက်ကြီးတွေ။ ၁၀လုံးအထက်ပဲ လက်နက်ကြီးပစ်တာတော့။ ဘယ်နေရာကျလဲတော့ အတိအကျမသိဘူး။ လူမထိခိုက်ဖို့ပဲ ဆုတောင်းနေရတယ်။” လို့ သူက ပြောပါတယ်။
တိုက်ပွဲဖြစ်ပွားခြင်းမရှိသလို စစ်ဇုံလည်းမဟုတ်တဲ့ ဒီးမော့ဆိုမြို့နယ်နဲ့ ဖရူဆိုမြို့နယ်က ကျေးရွာတွေကို စစ်ကောင်စီက ဒီကနေ့မှာ လက်နက်ကြီးတွေနဲ့ ပစ်ခတ်ခဲ့တယ်လို့ KNDF ရဲ့ ဒီကနေ့ည ထုတ်ပြန်ချက်အရ သိရပါတယ်။
