ကန္တာရဝတီတိုင်း(မ်)

ကယားပြည်နယ်အတွင်းရှိ စိုက်ပျိုးရေးလုပ်ကိုင်နေသော တောင်သူဦးကြီးများသည် ယင်းတို့၏ မြေယာပိုင်ဆိုင်မှုပုံစံအမျိုးမျိုးနှင့် အစဉ်တစ်ဆက်လုပ်ကိုင် လာခဲ့ကြသည်။ အများစုမှာ ဘိုဘောင်စဉ်ဆက် အသိအမှတ်ပြုမှုနှင့်သာ လုပ်ကိုင်ခဲ့သည်။

သို့သော် ခေတ်ကာလအခြေအနေက မြေယာများနှင့် ပတ်သက်၍ ဥပဒေများ ရေးဆွဲ၊ ပြင်ဆင်မှုများ ပြုလုပ်လာနေပြီဖြစ်သည်။ ထို့ကြောင့် ခေတ်ကာလအခြေအနေနှင့် လိုက်လျောညီထွေစွာ သမရိုးကျနည်းလမ်းမှ ဥပဒေဘောင်အတွင်း လုပ်ကိုင်ခြင်းသည် လက်ရှိနိုင်ငံရေးအခြေအနေနှင့် တောင်သူများရင်ဆိုင်နေရသော မြေယာပြဿနာများကို ကျော်လွှာနိုင်မည်ဖြစ်သည်။
မြေယာပုံစံများအနက် လယ်ယာမြေ လုပ်ပိုင်ခွင့်လက်မှတ် ပုံစံ(၇) ရရှိရေးအတွက် လျှောက်ထားခြင်းအပေါ် ကန္တာရဝတီတိုင်း(မ်)၏ စာဖတ်ပရိသတ်များအတွက် ရေးသားဖေါ်ပြပေးလိုက်ရပါသည်။

အမှန်စင်စစ် လယ်ယာမြေ လုပ်ပိုင်ခွင့်ပြု လက်မှတ် ပုံစံ(၇) ရရှိရေးအတွက် ပုံစံ(၁၀၅) လျှောက်ထားရန်သို့မဟုတ် ပုံစံ (၁၀၅)ကို ရှေးဦးစွာ ထုတ်ပေးရန် မလိုအပ်ချေ။

မြေစာရင်း ပုံစံ (၁၀၅) နှစ်မျိုး
——————-

ပုံစံ (၁၀၅) ဟူသည် မြေစာရင်း ပုံစံ (၁၀၅) သက်သေခံမြေပုံ (Certified Map)ကို ဆိုလိုသည်။ (မြေစာရင်း ပုံစံ (၁၀၆) မှာမူ History of Holding ခေါ် ဦးပိုင်မြေကွက် တစ်ခု၏ မြေရာဇဝင် (သို့) အမည်ပြောင်းလဲ ပုံအဆင့်ဆင့်ဖြစ်သည်) မြေစာရင်းပုံစံ (၁၀၅) / (၁၀၆)ဟူသည် မြေယာ ကိစ္စအဝဝနှင့် ပတ်သက်၍ လျှောက်ထားသည့် ကိစ္စရပ်တိုင်းတွင် မပါမဖြစ်သော ပူးတွဲ စာရွက်စာတမ်း အထောက်အထားသာ ဖြစ်သည်။ မြေယာပိုင်ဆိုင်မှု အထောက်အထား လုံးဝမဟုတ်ပါ။

သို့သော် ဌာနမှ အမြဲတစေ ပုံမှန်အသုံးပြုလျက်ရှိသော မြေစာရင်းပုံစံ ဖြစ်ပါသည်။ လယ်ယာမြေ လုပ်ပိုင်ခွင့်ပြု လက်မှတ် ပုံစံ(၇) အတူ ပူးတွဲထုတ်ပေးသော မြေစာရင်း ပုံစံ (၁၀၅) ဟူ၍ ရှိသေးသည်။ ၎င်းပုံစံမှာ လယ်ယာမြေ လုပ်ပိုင်ခွင့် မှတ်ပုံတင်ခြင်း လုပ်ငန်း ဆောင်ရွက်ပြီးစီးသည့်အခါ တောင်သူ/ ပုဂ္ဂလိကနှင့် အဖွဲ့အစည်းများအားလယ်ယာမြေ လုပ်ပိုင်ခွင့်ပြု လက်မှတ်ပုံစံ(၇) လက်မှတ်နှင့် အတူ လက်ဝယ်ကိုင်ဆောင် ထားနိုင်ရန်အတွက် မြေပုံထုတ်ပေးခြင်းဖြစ်သည်။

ဌာနမှ ပုံမှန်အသုံးပြုလျက် ရှိသော မြေစာရင်း ပုံစံ (၁၀၅) နှင့် စာရွက် အရွယ်အစား (A3 Size) ရော၊ အောက်ခံ အရောင် (အဖြူ)ပါ ကွဲပြားခြားနားပါသည်။ (Sticker) ကပ်ပေးထားခြင်းတော့ တူညီပါသည်။ (ဌာနမှပုံမှန် အသုံးပြုလျက် ရှိသော မြေစာရင်းပုံစံ (၁၀၅) မှာ အောက်ခံ အပြာရောင်နှင့် A4 Size ဖြစ်၍ ဌာနမှ သတ်မှတ်ထားသော ပုံစံကြေးဖြင့် ဝယ်ယူ အသုံးပြုရပါသည်။) လယ်ယာမြေ လုပ်ပိုင်ခွင့်ပြုလက်မှတ် ပုံစံ(၇) နှင့်အတူ ပူးတွဲထုတ်ပေးသည့် မြေစာရင်းပုံစံ(၁၀၅) အတွက်ကိုမူ မှတ်ပုံတင်ကြေး ၅၀ဝ ကျပ် ပေးသွင်းပြီးဖြစ်၍ ငွေကြေး တစ်ပြားတစ်ချပ်မျှ ပေးသွင်းရန်မလိုပါ။

ပုံစံ (၇) လျှောက်ထားခြင်း
—————————

ပုံစံ(၇) ဟူသည် ဘိုးစဉ်ဘောင်ဆက် သားစဉ်မြေး ဆက်လယ်ယာမြေပိုင်ဆိုင်မှုများအတွက် ခိုင်မာသောအထောက်အထားလက်မှတ်ဖြစ်၍ ၂၀၁၂ ခုနှစ်၊ လယ်ယာမြေ ဥပဒေပြဋ္ဌာန်းချိန်မှ စတင်၍ လယ်ယာမြေလုပ်ပိုင်ခွင့် မှတ်ပုံတင်ခြင်း လုပ်ငန်း ဆောင်ရွက်ပြီးမှသာ ထုတ်ပေးခြင်း ဖြစ်သည်။

ရှေးအခါကဆိုလျှင် တောင်သူ လယ်သမားများ၏ လက်ဝယ်၌ တစ်နှစ်လျှင် တစ်ကြိမ်သာ စည်းကြပ်ကောက်ခံလေ့ရှိသော မြေခွန်ပြေစာ မြေစာရင်း ပုံစံ(၈) သာရှိသည်။ မြေခွန်ပြေစာ ဟူသည် မိမိ၏ ဦးပိုင်လုပ်ကွက်ပေါ်တွင် စိုက်ပျိုးသော ရာသီသီးနှံ(သို့) နှစ်ရှည်သီးပင်အတွက် မြေခွန်စည်းကြပ်သော ပြေစာဖြစ်၍ ပိုင်ဆိုင်မှု အထောက်အထား မဟုတ်ကြောင်း အတိအလင်းဖော်ပြထားပါသည်။

ပုံစံ(၇)ရရှိရန် ဦးစွာပထမ၊ လယ်ယာ မြေလုပ်ပိုင်ခွင့် လျှောက်လွှာ ပုံစံ(၁) ကို အခမဲ့ ရယူလျက် ဥက္ကဋ္ဌ၊ ရပ်ကွက်/ကျေးရွာအုပ်စုလယ်ယာမြေ စီမံခန့်ခွဲမှု အဖွဲ့မှ တစ်ဆင့်၊ မြို့နယ်မြေစာရင်းဦးစီးဌာန (ယခု မြို့နယ် လယ်ယာမြေ စီမံခန့်ခွဲရေးနှင့် စာရင်းအင်း ဦးစီးဌာန)သို့လျှောက်ထားရပါသည်။ မြေစာရင်းပုံစံ(၁၀၅) လျှောက်ထားရန် မလိုအပ်သကဲ့သို့ ၎င်းဌာနမှလည်း မြေစာရင်းပုံစံ (၁၀၅) ကို ထုတ်ပေး၍ မရပါ။

အသစ် တီထွင်ထားသော ပုံစံ(၁၀၅)သည် လယ်ယာမြေ လုပ်ပိုင်ခွင့် မှတ်ပုံတင်ခြင်းလုပ်ငန်း ပြီးစီး၍ လယ်ယာမြေလုပ်ပိုင်ခွင့်ပြု လက်မှတ်၊ ပုံစံ(၇)နှင့် အတူပူးတွဲ ထုတ်ပေးခြင်းသာ ဖြစ်ပါသည်။ တစ်ခုတော့ရှိသည်။ ဌာနအနေဖြင့် ပုံစံ(၇) နှင့်အတူ မြေစာရင်း ပုံစံ(၁၀၅)ကို ပူးတွဲထုတ်ပေးနိုင်ရန်အတွက် လျှောက်ထားသည့် ဦးပိုင်/လုပ်ကွက်အား (မိမိ၏ ကွင်းထုတ်မြေပုံပေါ်တွင် မှတ်တမ်းတင်ရေးဆွဲမထားရှိပါက) မြေတိုင်းတာခြင်း၊ မြေပုံ ရေးဆွဲခြင်း လုပ်ငန်းကို ကွင်းဆင်းဆောင်ရွက်ဖို့တော့ အထူးလိုအပ်ပါသည်။

လယ်ယာမြေ လုပ်ပိုင်ခွင့် မှတ်ပုံတင်ခြင်း လုပ်ငန်း
————————————–

လယ်ယာမြေ လုပ်ပိုင်ခွင့် မှတ်ပုံတင်ခြင်း လုပ်ငန်းနှင့် လယ်ယာမြေ လုပ်ပိုင်ခွင့်ပြု လက်မှတ် ပုံစံ(၇) ထုတ်ပေးခြင်း လုပ်ငန်းသည် ၂၀၁၃-၂၀၁၄ ခုနှစ်ကတည်းက စတင် အကောင်အထည်ဖော် ဆောင်ရွက်ခဲ့သော်လည်း ယခုအချိန်အထိ ပြီးပြတ်မှု မရှိသေးချေ။ ဌာနတွင် ပုံမှန်လည်ပတ်ဆောင်ရွက်ရသော လုပ်ငန်းများအပြင် တစ်ချိန်က အကြောင်း အမျိုးမျိုးကြောင့် သိမ်းဆည်းခြင်း ခံရသော လယ်ယာမြေများအားပြန်လည်စိစစ်ရေး လုပ်ငန်း၊ မြေခွန်တော်နှုန်းထားများ တိုးမြှင့်ကောက်ခံရေးအတွက် ကြိုတင်ပြင်ဆင်မှု လုပ်ငန်းများကိုလည်း တစ်ဘက်တစ်လမ်းမှ ဆောင်ရွက်နေကြရသောကြောင့် ဖြစ်သည်။

အထူးသဖြင့် ခြံမြေများ ဝါးခြံများမှာ နယ်နိမိတ်ပြဿနာ အရှုပ်အရှင်းများကြောင့် အလွယ်တကူ မှတ်ပုံတင်ပေး၍ မရချေ။ ပုံစံ (၇)ကိုလည်း ထုတ်ပေးဖို့ရာ အခက်အခဲ ကြုံတွေ့ရပေသည်။ ထို့ပြင် ပုံစံ (၇)အပြိုင်လျှောက်ထားသော ကိစ္စရပ်များကလည်း ရှိသေးသည်။

ပုံစံ(၇)ဟူသည် ရပ်ကွက်/ ကျေးရွာ အုပ်စုအဆင့်မှသည် မြို့နယ်လယ်ယာမြေ စီမံခန့်ခွဲမှုအဖွဲ့၊ ခရိုင်လယ်ယာမြေ စီမံခန့်ခွဲမှု အဖွဲ့အထိ လုပ်ငန်းစာတွဲပေး ပို့ဆောင်ရွက်ရပြီး ခရိုင်လယ်ယာမြေစီမံခန့်ခွဲမှုအဖွဲ့၏အတည်ပြုချက် ရရှိမှသာ မြို့နယ် ဦးစီးဌာနမှူးမှ ထုတ်ပေးခွင့် ရှိသောကြောင့် လုပ်ငန်း သဘာဝအရ နှောင့်နှေး ကြန့်ကြာရခြင်းမျိုးလည်း ရှိသည်။

ပုံစံ(၇) ရရှိရန်အတွက် တောင်သူများအနေနှင့် ကျပ်ငါးသိန်းခန့် ကုန်ကျခြင်း၊မြေတိုင်းတာရာတွင် တစ်ဧကလျှင် ကျပ် ၅၀ဝ၀ဝ၊ ကျပ်တစ်သိန်း တောင်းခံခြင်း၊ ပုံစံ(၇)ရရှိဖို့ ပိုက်ဆံပေးရသည့်တိုင် အနည်းဆုံးခြောက်လ၊ တစ်နှစ် ကြာမြင့်ခြင်း စသောအချက်များမှာ ဌာနအတွင်းရှိ စုန်းပြူးများ၊ ဆွမ်းဆန်စိမ်းထဲ ကြွက်ချေးရောသူ အကျင့်ပျက်ဝန်ထမ်းတချို့ကြောင့်ဖြစ်ကောင်း ဖြစ်နို်င်ပါသော်လည်း ငါးခုံးမ တစ်ကောင်ကြောင့် တစ်လှေလုံးပုပ်ရသည့် အဖြစ်မျိုးတော့ မဖြစ်စေလိုပါ။

သည်ကြားထဲ လုပ်ထုံးလုပ်နည်းအရ မြေစာရင်းပုံစံ(၁၀၅) ထုတ်ပေး၍ မရနိုင်သည်ကို နှစ်ပတ်အတွင်း မထုတ်ပေးနိုင်ပါက အရေးယူခံရမည့် အဖြစ်မျိုးမှာသာ၍ မဖြစ်သင့်ပေ။ ဆိုလိုသည်မှာ ပုံစံ(၇) လျှောက်ထားရန် အတွက် ပုံစံ(၁၀၅) ထုတ်ပေး၍ မရနိုင်တဲ့ ထုတ်ပေးရန် မလိုအပ်ဘဲ လယ်ယာမြေ လုပ်ပိုင်ခွင့်ပြုလက်မှတ် ပုံစံ (၇) ထုတ်ပေးသည့် အခါကျမှသာ ပုံစံ(၁၀၅) မြေပုံကို ပူးတွဲပေးရမည်ဟု အထက်အဆင့် ဌာန/အဖွဲ့အစည်းများက ညွှန်ကြားချက် ထုတ်ပြန်ထားပါသည်။

အချုပ်အားဖြင့် ဆိုရသော်၊ မြေစာရင်း ပုံစံ (၁၀၅) ဟူသည် စာချုပ်စာတမ်း မှတ်ပုံတင်ရန်၊ မြေငှားဂရန် လျှောက်ထားရန်၊ လယ်ယာမြေကိုအခြားနည်းသုံးစွဲခွင့် လျှောက်ထားရန်၊ မြေလွတ်မြေရိုင်း လုပ်ကိုင်ခွင့်/ အသုံးပြုခွင့် လျှောက်ထားရန်၊ တရားရုံး တင်ပြရန်၊ ဓာတ်သတ္တုကျောက်မီးသွေး၊ မြစ်ကျောက်၊ သဲထုတ်ခွင့် လိုင်စင် လျှောက်ထားရန်၊ အဆောက်အဦ ဆောက်လုပ်ရန်အတွက် စည်ပင်ခွင့်ပြုမိန့်လျှောက်ထားရန် အစရှိသော မြေယာကိစ္စရပ်များမှ တစ်ပါး၊ လယ်ယာမြေ လုပ်ပိုင်ခွင့်ပြု လက်မှတ်၊ ပုံစံ(၇) လျှောက်ထားရန်အတွက် မြေစာရင်းပုံစံ(၁၀၅)ခေါ် သက်သေခံ မြေပုံထုတ်ပေးရိုးထုံးစံမရှိပါကြောင်း အသိပေး တင်ပြလိုက်ရပါသည်။

Comments

comments