ကန္တာရဝတီတိုင်း(မ်)
ရှမ်းပြည်တောင်ပိုင်း၊ ဆီဆိုင်မြို့နယ်အတွင်းက ကျေးရွာ ကျေးရွာအတွင်းမှ စေခိုင်းထွက်သွားခံရတဲ့ လူထုတွေရဲ့ နေအိမ်တချို့ကို စစ်ကောင်စီလက်အောက်ခံ ပြည်သူ့ စစ်(PNO) တွေက မီးရှို့ဖျက်ဆီးမှုတွေ ပြုလုပ်နေတယ်လို့ ပအိုးဝ်အမျိုးသားလွတ်မြောက်ရေးတပ်မတော် (PNLA) တပ်ဖွဲ့ဆီကနေ သိရပါတယ်။
မီးရှို့ပြီး နောက်တနေ့မှာ မိုးရွာတဲ့အတွက် နေအိမ် ၆ လုံးသာ ပါသွားတယ်လို့ PNLA ရဲ့ ပြောရေးဆိုခွင့်ရှိသူ ခွန်ရိန်းယံက ကန္တာရဝတီတိုင်း(မ်) ကိုပြောပါတယ်။
“ဟုတ်ပါတယ် သူတို့ ရွာသားတွေကို မောင်းထုတ်တာမကြာဘူး မီးရှို့လိုက်တာပါ။ မီးရှို့လိုက်တာပေါ့နော်။ မီးရှို့တာက ကံကောင်းတာက ရှို့ပြီးတော့ နောက်ရက်မှာ မိုးရွာတော့ ပြီးတော့ အိမ်ကလည်း အရမ်းကြီး ကပ်တည်းဟာမျိုးမဟုတ်ဘူးပေါ့နော်။ အဲ့တော့ သက်သာသွားတယ်ပေါ့နော်။ မဟုတ်ရင် ရွာလုံးကျွတ် ပါသွားတာမျိုးဖြစ်နိုင်တယ်။ ပြည်သူလူထုရဲ့ နေအိမ် ၆ အိမ် မီးလောင်ပြာကျသွားတယ်ပေါ့။“ လို့ ခွန်ရိန်းယံက ပြောပါတယ်။
ပြီးခဲ့တဲ့ ဇွန်လ ၁၂ ရက်နေ့မှာ မီးရှို့ခဲ့တာဖြစ်ပြီး ဇွန်လ ၁၃ ရက်နေ့ညအထိ မီးလောင်ကျွမ်းခဲ့တယ်လို့ ဆိုပါတယ်။
အဆိုပါ နေအိမ် မီးရှို့ဖျက်စီးခံရတဲ့ ကျေးရွာဟာ ပြီးခဲ့တဲ့ ဇွန်လ ၇ ရက်နေ့မှာ ဆီဆိုင်မြို့နယ်အတွင်း ကျေးရွာအများစု ကျေးရွာအတွင်းကနေထွက်ခွာဖို့ မောင်းထုတ်ခံနေရတာတဲ့ ကျေးရွာတွေထဲက
တပူထိုးကျေးရွာ ဖြစ်တယ်လို့ သိရပါတယ်။
ဒါ့အပြင် အဲ့ဒီ တပူးထိုရွာအတွင်းမှာ စစ်ကောင်စီ လက်အောက်ခံ PNO ပြည်သူ့စစ်တွေ တပ်စွဲနေထိုင်ကြတာဟာ ၄ လကျော်ရှိနေပြီလို့လည်း ခွန်ရိန်းယံက ဖြည့်စွက်ပြောဆိုထားပါတယ်။
တပူထိုးကျေးရွာဟာ ဆီဆိုင်မြို့နယ် နောင်ကျောကျေးရွာအုပ်စုအတွင်းကဖြစ်ပြီး နေအိမ် ၂၀၀ ဝန်းကျင်ရှိတယ်လို့ သိရပါတယ်။
