ကန္တာရဝတီတိုင်း (မ်)
မနေ့က သြဂုတ်လ၂၅ ရက်နေ့မှာ စစ်ကော်မရှင်တပ်ရဲ့ အဆက်မပြတ် လက်နက်ကြီးပစ်ခတ်မှုကြောင့် ကရင်နီပြည်၊ ဒီးမော့ဆိုမြို့နယ် အနောက်ခြမ်းမှာရှိတဲ့ လူမှုကူညီရေးကားတစ်စီး ထိမှန်ပျက်စီးခဲ့တယ်လို့ ကားထိမှန်ပျက်စီးသွားတဲ့ လူမှုကူညီကယ်ဆယ်ရေးအဖွဲ့ရဲ့ အဖွဲ့ဝင်တစ်ဦးက ပြောပါတယ်။
“ခေါင်းပဲကျန်ပါတယ်။ ကားတစ်စီးက ကျေးရွာရဲ့ရန်ပုံငွေ အားနဲ့ပဲဝယ်ထားတယ်။ အဲကြောင့်မို့ ကျနော်တို့အသစ်ရှာရင် အရမ်းခက်ခဲတယ်။ ရွာကလူတွေ စစ်ရှောင်နေတာမို့ အလှူတွေထပ်ကောက်ဖို့လုံးဝအဆင်မပြေပါဘူး။ ဘားမရှိရင်တော့ နားရမှာပေါ့” လို့ အဆိုပါ အဖွဲ့ဝင်က ပြောပါတယ်။
စစ်ကော်မရှင်တပ်က ဒီးမော့ဆိုအနောက်ဖက်ခြမ်းကို လက်နက်ကြီးအဆက်အပြတ်ပစ်ခတ်နေတာကြောင့် ကျေးရွာအတွင်းရပ်ထားတဲ့ ကယ်ဆယ်ရေးကားကို ထိမှန်ခဲ့တာဖြစ်ပြီး တခြားထိခိုက်မှုတော့ မရှိဘူးလို့ သိရပါတယ်။
လက်နက်ကြီးကျရောက်တဲ့ကျေးရွာက လူထုတွေ တိမ်းရှောင်နေပြီးသားဖြစ်ပြီး ရွာနဲ့ မိုင်အနည်းငယ်အကွာမှာရှိတဲ့ ဒီးမော့ဆိုမြို့ပေါ်ရပ်ကွက်တွေမှာတော့ စစ်ကော်မရှင်တပ်နဲ့ တော်လှန်ရေးတပ်ဖွဲ့တို့ကြား တိုက်ပွဲဖြစ်ပွားနေတယ်လို့ ဒေသခံတွေက ပြောပါတယ်။
စစ်ကော်မရှင်တပ်က ဒီးမော့ဆိုမြို့ကို ပြန်လည်ထိန်းချုပ်နိုင်ပြီလို့ ကြေညာထားတာဖြစ်ပြီး မြေပြင်မှာတော့ နှစ်ဖက်ထိတွေ့တိုက်ပွဲတွေ ဖြစ်နေဆဲပဲ လို့ ဒေသခံတွေက ပြောပါတယ်။
