ကန္တာရဝတီတိုင်း ( မ် )
ကရင်နီပြည်၊ ဘောလခဲမြို့အစပ်က စစ်ရှောင်စခန်းတစ်နေရာကို ဒီကနေ့ ဩဂုတ်လ ၂၆ ရက်နေ့ မနက် ၁ နာရီဝန်းကျင်မှာ စစ်ကော်မရှင်က လေကြောင်းနဲ့ ဗုံးကြဲတိုက်ခိုက်ခဲ့တယ်လို့ ဒေသခံတွေက ပြောပါတယ်။
အဲ့ဒီတိုက်ခိုက်မှုကြောင့် အသက် ၄၀ ကျော်ရွယ်တစ်ဦး နဲ့ ၁၆နှစ်အောက် ကလေးနှစ်ဦး ထိခိုက်ဒဏ်ရာရရှိခဲ့ပါတယ်။ ရင်ဘတ်၊ တင်ပါး၊ ခြေသလုံးမှာ ဗုံးစ ထိမှန်ခဲ့ပြီး တစ်ဦးမှာတော့ ဒဏ်ရာပြင်းထန်တယ်လို့ သိရှိရပါတယ်။
” ထိခိုက်မှုရှိတယ် သုံးယောက်။ အသက်အရွယ်က ၁၆ နှစ်အောက် နှစ်ယောက်၊ ၄၀ ကျော်က တစ်ယောက် အားလုံးက ယောကျာ်းလေးတွေပဲ။ အဲ့မှာနေတာလည်း လူများတယ်။ မနက် ၁ နာရီမှာ ဂျက်ဖိုက်တာနဲ့ အရင်ဆုံးလာကြဲတယ်။ ဖိုက်တာပြန်သွားတော့ Y-12 နဲ့ ထပ်လာကြဲတယ်။ အလုံးရေ ၂၀ ၊ ၃၀ လောက်ရှိမလားမသိဘူး တော်တော်ကြာတယ်။ ” လို့ ဒေသခံတစ်ဦးက ပြောပါတယ်။
အဆိုပါနေရာဟာ နန်းဖဲကျေးရွာခံတွေ အများဆုံး နေထိုင်ကြတဲ့ နေရာဖြစ်ပြီး လူဦးရေ များပြားတယ်လို့ ဆိုပါတယ်။
ယခုဩဂုတ်လအတွင်း စစ်ကော်မရှင်တပ်က အရပ်သားတွေရှိတဲ့ နေရာတွေကို လေကြောင်းတိုက်ခိုက်မှု ၆ ကြိမ်ထက်မနည်း ပြုလုပ်ထားပါတယ်။ ဖားဆောင်းမြို့နယ်၊ မော်ချီးဒေသကို ဗုံးကြဲမှုအတွင်း အရပ်သား ၃၃ ဦး ထိသေဆုံးခဲ့ပါတယ်။ ဒါ့အပြင် ဒီးမော့ဆိုမြို့နယ်အတွင်းကိုလည်း လေကြောင်းတိုက်ခိုက်မှု မကြာခဏ ပြုလုပ်နေတယ်လို့ ဒေသခံတွေက ပြောပါတယ်။
စစ်အာဏာသိမ်းပြီးနောက်၂၀၂၁ခုနှစ် ဖေဖော်ဝါရီလ ၁ ရက်နေ့ကနေ ၂၀၂၅ခုနှစ် ဇူလိုင်လအထိ ကရင်နီပြည် နဲ့ အလယ်ကယန်းဒေသအတွင်း စစ်ကော်မရှင်ရဲ့ လေကြောင်းတိုက်ခိုက်မှုအကြိမ်ရေ (၂၀၁၀) ရှိတယ်လို့ တိုးတက်သော ကရင်နီပြည်သူ့အင်အားစု (PKPF) က ဩဂုတ်လ ၁ ရက်နေ့မှာ ထုတ်ပြန်ထားပါတယ်။
