ကန္တာရဝတီတိုင်း ( မ် )
ဒီကနေ့ စက်တင်ဘာလ (၁) ရက်နေ့ နံနက် ၈ နာရီကျော်အချိန်မှာ ဒီးမော့ဆိုမြို့နယ်အတွင်းက စစ်ရှောင်စခန်းတစ်နေရာကို စစ်ကော်မရှင်က Y-12 လေယာဥ်အမျိုးအစားနဲ့ ဗုံး (၂)လုံး ကြဲချခဲ့တယ်လို့ ဒေသခံတွေက ပြောပါတယ်။
အဲ့ဒီ လေကြောင်းတိုက်ခိုက်မှုအတွင်း အသက် (၁၂) ဝန်းကျင်အရွယ် ကလေးနှစ်ဦး နဲ့ အသက် (၅၀) အရွယ်အမျိုးသမီး တစ်ဦး လေယာဥ်စ ထိမှန်ခဲ့ပါတယ်။ အသက် ၁၂ နှစ်အရွယ် ယောကျ်ားလေးရဲ့ ညာဖက်လက်မှာ ဗုံးစ ထိမှန်ခဲ့ပြီး မိန်းကလေးငယ်တစ်ဦးကတော့ ပေါင်ကို ထိမှန်ခဲ့တာပါ။ အသက် (၅၀) ကျော် အရွယ်အမျိုးသမီးကတော့ ခြေသလုံးနဲ့ မျက်နှာမှာ အစထိမှန်ခဲ့တယ်လို့ မျက်မြင်တွေ့ရှိသူ တစ်ဦးက ပြောပါတယ်။
“သူလာတော့ (Y-12) ကျမတို့ ဟို့ တောင်ယာ သွားနေတာ။ လေယာဉ်ကြဲတဲ့အသံကို ကျမတို့ကြားတယ်။ မဟုတ်တော့ဘူးဆိုပြီး ပြန်လာတာ ပြန်ရောက်တော့ အကုန်ထိကုန်တယ်။” လို့ စစ်ရှောင်အမျိုးသမီးတစ်ဦးက ကန္တာရဝတီတိုင်း ( မ် ) ကို ပြောပါတယ်။
အခုလို တိုက်ပွဲဖြစ်ပွားခြင်းနဲ့ အလှမ်းဝေးတဲ့ စစ်ရှောင်စခန်းကို လေယာဥ်ဗုံးကြဲသွားတာကြောင့် စစ်ရှောင်တွေဟာ စိုးရိမ်ပူပန်မှုတွေ ရှိနေကြပါတယ်။
”ဒီလေယာဥ်ကြောင့် ကျမတို့ တအားကြောက်စိတ်ဝင်ရတယ်။ကလေးတွေကျောင်းတက်တာလည်း အဆင်မပြေဘူး။ ကျမတို့က စစ်ဘေးရှောင်ရပါတယ်ဆိုမှပဲ သူတို့ (စစ်ကော်မရှင်) ဒီလိုထပ်လာလုပ်တော့ ကျမတို့လည်း ကလေးတွေကို ကျောင်းပို့မလား ဝမ်းစာပဲ ရှာစားရမလား။ဘယ်လိုပူပန်ရမှန်းမသိဘူး။ သောကရောက်တယ်။” လို့ စစ်ရှောင်အမျိုးသမီးတစ်ဦးက ပြောပါတယ်။
ပြီးခဲ့တဲ့ သြဂုတ်လအစောပိုင်းကစပြီး စစ်ကော်မရှင်က ဒီးမောဆိုမြို့နယ်ကို စစ်ကြောင်းထိုးလာပြီး တော်လှန်ရေးတပ်ဖွဲ့တွေနဲ့ နေ့စဉ်ရက်ဆက် တိုက်ပွဲဖြစ်ပွားနေတယ်လို့ သိရှိရပါတယ်။ တိုက်ပွဲဖြစ်ပွားတဲ့နေရာအပြင် တိုက်ပွဲဖြစ်ပွားခြင်းမရှိတဲ့ နေရာတွေကိုလည်း စစ်ကော်မရှင်က လက်နက်ကြီးနဲ့ ပစ်ခတ်တာ၊ လေယာဥ်နဲ့ ဗုံးကြဲတာတွေကြောင့် လူထုတွေဟာ စိုးရိမ်ပူပန်နေကြရပါတယ်။
