ကန္တာရဝတီတိုင်း(မ်)
ကရင်နီပြည်၊ ဖရူဆိုမြို့နယ်အတွင်းက လူထုရှိရာနေရာတွေကို ယမန်နေ့ စက်တင်ဘာလ ၂ ရက်နေ့၊ နေ့လည် ၁၂ နာရီ ၄၅ မိနစ် အချိန်မှာ စစ်ကော်မရှင်က လက်နက်ကြီးပစ်ခတ်ခဲ့ပြီး စစ်ဘေးရှောင်နှစ်ဦး ထိမှန်ခဲ့တယ်လို့ ဒေသခံတွေက ပြောပါတယ်။
စစ်ကော်မရှင် ပစ်ခတ်လိုက်တဲ့ လက်နက်ကြီးက ကျေးရွာခံတွေနဲ့ စစ်ဘေးရှောင်တွေ ရေခပ်၊ ရေချိုးတဲ့ နေရာမှာ ကျရောက်ခဲ့တာပါ။
အဝတ်လျှော်၊ ရေချိုးဖို့ ပြင်နေတဲ့ အသက် ၂၀ အရွယ်ဝန်းကျင် အမျိုးသမီးတစ်ဦးရဲ့ လက်မောင်းမှာ ဒဏ်ရာရရှိခဲ့သလို အသက် ၃၁ နှစ်အရွယ် အမျိုးသားတစ်ဦးကတော့ ခြေသလုံးမှာ လက်နက်ကြီးစ ထိမှန်ခဲ့ပြီး ဒဏ်ရာပြင်းထန်တယ်လို့ ဒေသခံတစ်ဦးက ပြောပါတယ်။
” သစ်ပင်ပေါ်တည့်တည့်ကျတော့ ပေါက်ကွဲတာ။ ရေလာချိုးတဲ့ အမျိုးသမီးတစ်ဦးနဲ့ အမျိုးသားတစ်ဦး ထိသွားတာပေါ့။ ဆိုင်ကယ်ရေဆေးတဲ့ သူတွေကတော့ မထိဘူး။”လို့ သူက ပြောပါတယ်။
ဒဏ်ရာရသူနှစ်ဦးကတော့ လက်ရှိမှာ ဆေးကုသမှုခံယူနေရတယ်လို့ ပြောပါတယ်။ ဖရူဆိုမြို့နယ်အတွင်းမှာ စစ်ကော်မရှင်တပ်က စစ်ရေးလှုပ်ရှားမှုရှိနေသလို လက်နက်ကြီး မကြာခဏ ပစ်ခတ်မှုရှိနေတာကြောင့် လူထုတွေအနေနဲ့ သတိထားနေထိုင်ကြဖို့ တော်လှန်ရေးတပ်ဖွဲ့တွေက တိုက်တွန်းထားပါတယ်။
ပြီးခဲ့တဲ့ ဩဂုတ်လ ၂၉ ရက်နေ့ကလည်း ဖရူဆိုမြို့နယ် တစ်နေရာမှာ စစ်ကော်မရှင်ရဲ့ ဒရုန်းနဲ့တိုက်ခိုက်မှုကြောင့် အသက် ၅၀ အရွယ် စစ်ဘေးရှောင်အမျိုးသားတစ်ဦး ထိမှန်သေဆုံးခဲ့ပါတယ်။
