ကချင်ပြည်လွတ်လပ်ရေးအဖွဲ့ (KIO) – ဗိုလ်ချုပ်ဂွမ်မော် နှင့် တွေ့ဆုံမေးမြန်းခြင်း

ကချင်ပြည်နယ်တွင် တိုက်ပွဲများဖြစ်ပွားနေသော်လည်း ၂၁ ပင်လုံညီလာခံ တက်ရောက်ခဲ့တဲ့  ဗိုလ်ချုပ်ဂွမ်မော် နှင့် တွေ့ဆုံမေး မြန်းခဲ့တာကိုု ဖော်ပြလိုုက်ပါတယ်။
မေး။ ။ အခု ကချင်မှာလည်းတိုက်ပွဲတွေဖြစ်နေတယ်။ ၂၁ ပင်လုံညီလာခံလည်း ဗိုလ်ချုပ်တို့က တက်ရောက်နိုင်ခဲ့တယ်ဆိုတော့ ဒီအပေါ်မှာ ဗိုလ်ချုပ်တို့ရဲ့ သဘောထားကိုသိချင်ပါတယ်။
ဖြေ။ ။ ကျနော်တို့က တိုက်ပွဲမရှိဘဲ ဆွေးနွေးပွဲကိုတက်ချင်တာပေါ့။ ဒါပေမယ့် အခုကမတတ်နိုင်လို့ တိုက်ပွဲတွေရှိနေသော်လည်း ဆွေးနွေးပွဲကိုလာနေတာဖြစ်ပါတယ်။ ၂၁ ရာစုပင်လုံပြီးလို့ရှိရင် ဒီကိစ္စကို ကျနော်တို့ ဆက်ပြီး ဆွေးနွေးသွားဖို့ရှိတယ်။

မေး။ ။ NCA ကိုကော ထိုးဖို့မထိုးဖို့ ဘယ်လိုအခြေအနေရှိပါသလဲ။
ဖြေ။ ။ NCA ကတော့ ကျနော်တို့ဆွေးနွေးပြီးမှပဲ သိရမှာပါ။

မေး ။ ။ ငြိမ်းချမ်းရေးရဖို့ ဗိုလ်ချုပ်တို့ရဲ့ တကယ့်လိုအပ်ချက် ၊ ဆန္ဒက ဘာလဲဆိုတာ ပြောပေးပါရှင့်။
ဖြေ ။ ။ အဓိက ကတော့ဆွေးနွေးရေးကိုသေချာလုပ်ရမယ်။ စစ်ရေးနဲ့မဟုတ်ဘဲနဲ့ ဆွေးနွေးရေးကို လုပ်ရမယ်။ လုပ်တဲ့အခါမှာ ကြိုတင်ကန့်သတ်ချက်များ မထားရှိတဲ့ဆွေးနွေးချက်ဖြစ်ရမယ်။ တန်းတူဖြစ်ရမယ်။ ပွင့်လင်းမြင်သာ မှုရှိရမယ်။ ဒီလိုသွားမည့်ဆွေးနွေးမှုမျိုးကိုဖြစ်စေချင်တယ်။ ဒါက တကယ်ပဲ ကျနော့်ရဲ့ ဆန္ဒဖြစ်ပါတယ်။

မေး။ ။ မူးယစ်ဆေးဝါးနဲ့ပတ်သက်လို့ အတူတကွတိုက်ဖျက်ဖို့ ဘယ်လိုအကောင်းဆုံးလုပ်ဆောင်သင့်ပါသလဲ။ ဘာကြောင့်လဲဆိုတော့ ဒါက တစ်နိုင်ငံလုံးက ကြုံတွေ့နေရတဲ့ ပြဿနာမိုလို့ပါ။
ဖြေ။ ။ အစိုးရအနေနဲ့ ပြည်သူလူထုတစ်ရပ်လုံး တိုင်းရင်းသားလက်နက်ကိုင်အဖွဲ့တွေရော အားလုံးဝိုင်းပြီးလုပ်ကြရမည့်ကိစ္စဖြစ်ပါတယ်။ ဒါပေမယ့်အခုချိန်မှာတော့ ဒီငြိမ်းချမ်းရေးဖြစ်စဉ်ကိုလုပ်နေတော့ အစိုးရအနေနဲ့ရော တိုင်းရင်းသားလက်နက်ကိုင်အဖွဲ့အနေနဲ့ရော မလုပ်နိုင်သေးပါဘူး။ ဒါကိုပိုပြီး တိတိကျကျလုပ်ဖို့လိုအပ်ပါတယ်။

မေး။ ။ ဗိုလ်ချုပ်တို့ ဘက်က မြစ်ဆုံစီမံကိန်းအရေး ကိစ္စနဲ့ပတ်သက်လို့ကကော ဘယ်လိုဆက်လုပ်ဖို့ မလုပ်ဖို့ ဘယ်လိုသဘောထားရှိပါသလဲ။
ဖြေ။ ။ အားလုံးကဒါစနစ်တကျစဉ်းစားပြီးတော့မှ လုပ်သင့်တယ်မလုပ်သင့်ဘူး။ လူထုက ဆုံးဖြတ်ရမယ့်ကိစ္စဖြစ်ပါတယ်။

မေး။ ။ သံယံဇာတခွဲဝေတဲ့အပိုင်းနဲ့ပတ်သက်လို့ အခု ဖားကန့်တို့ မိုင်းရှုးတို့ဘက်မှာလည်း ကြုံတွေ့နေရတဲ့အခက်အခဲတွေရှိတယ်။ ဒါတွေကို ဘယ်လိုဖြစ်သင့်လဲ ၊ အကောင်းဆုံးဘာတွေလုပ်သင့်လဲဆိုတာ ပြောပေးအုံးရှင့်။
ဖြေ။ ။ သံယံဇာတအပိုင်းတော့ သုံးခု ပြောချင်တယ်။ တူးဖော်ရေး၊ခွဲဝေရေး၊နောက် ထိန်းသိမ်းရေး၊ ဒီသုံးခုလုံးအရေးကြီးတယ်။ ဒါကို အစိုးရနဲ့ လူထုက စီမံကိန်းချရပါမယ်။ စီမံကိန်းချတဲ့အခါမှာအားလုံးရဲ့ ဆုံးဖြတ်ချက်နဲ့ ချဖို့ အရေးကြီးပါတယ်။

မေး။ ။ စစ်ပွဲကြောင့် ကချင်ဒုက္ခသည်တွေရှိလာတဲ့အပေါ်မှာကော သူတို့အတွက် အကောင်းဆုံးဘာတွေလုပ်ပေးသင့်လဲ ၊ ဒုက္ခသည်တွေမရှိအောင် ဘာလုပ်သင့်လဲ။
ဖြေ။ ။ ဒုက္ခသည်တွေထပ်ပြီးတိုးမလာအောင် တိုက်ပွဲတွေကို ရပ်နိုင်အောင်ကြိုးစားရမယ်။ ရှိပြီးသားတွေကိုယ့်ရဲ့ဒေသမှာပြန်ပြီးတော့ နေသားကျအောင်နောက်ပြီးမှ ဂုဏ်သိက္ခာရှိရှိနဲ့ ပြန်လာနိုင်အောင် ဒီနှစ်ပိုင်းကိုခွဲပြီးလုပ်ရပါ့မယ်။

မေး။ ။ ဗိုလ်ချုပ်အနေနဲ့ တိုင်းသူပြည်သားအားလုံးကို ဘာအမှာစကားပြောကြားလိုပါသလဲ။
ဖြေ။ ။အခု ဒီ ၂၁ ရာစုပင်လုံကို အားလုံးကမျှော်လင့်နေကြတာပဲ အဲတော့ ဒီဟာအောင်မြင်ဖို့ဆိုတာကလည်း အစိုးရကော ၊ ဒီမှာတက်ရောက်လာတဲ့သူကော လူထုတစ်ရပ်လုံးရဲ့ သဘောထား ဗဟုသုတဆုံးဖြတ်ချက်တွေ အရေးကြီးပါတယ်။ အားလုံးဝိုင်းပြီးတော့ အကြံပေးနိုင်ဖို့လိုအပ်တယ်လို့ အကြံပြုပါတယ်။

Comments

comments

Next Post

သိန်းတစ်ထောင်ကျော်အကြွေးရှင်ကိုသတ်သွားသည့်အမှု အလောင်းအတည်မပြုနိုင်သေး

Mon Sep 19 , 2016
လွိုင်ကော်မြို့ ထေးငှားလျားရွာတွင် ဩဂုတ်လ ၂၈ ရက်နေ့က ဖြစ်ပွားခဲ့သည့် လူသတ်မှုသည် ယခုအချိန်ထိ အလောင်းဖျောက်ဖျက်ခြင်းအပေါ် အတည်မပြုနိုင်သေးကြောင်း လွိုင်ကော်မြို့မ ရဲ့စခန်းမှူး ဒုရဲမှူးကျော်ကျော်ဦးက ကန္တာရဝတီတိုင်း(မ်)သို့ စက်တင်ဘာလ ၁၂ ရက်က ပြောကြားသွားသည်။ “ လက်ရှိအနေအထားကတော့ အိမ်သာကျင်းထဲက တွေ့တဲ့ဟာကို ဓါတုရာဝင်ရုံးကို ပေးပို့ ထင်မြင်ချက်တောင်းခံထားတုန်းပဲ ဖြစ်ပါတယ်။ မည်သည့်အသားဖြစ်တယ်ဆိုတာ ကျနော်တို့ ပြန်ကြားစာ ရရှိခြင်း မရှိသေးပါဘူး။ တရာခံက ဓါးနဲ့ခုတ်တယ်ဆိုတာကလည်း ကျနော်တို့ စစ်ဆေး အတည်ပြုဆဲပဲ ရှိပါသေးတယ်။”ဟု ၎င်းက ပြောကြားသည်။ သိန်းတစ်ထောင်ကျော် ငွေကြေးချေးယူခြင်းနှင့် အရောင်းအဝယ်ဖက်စပ်လုပ်ကိုင်ရာမှ ဖြစ်လာသည့် ငွေကြေးအရှုပ်အထွေးအပေါ် အစပြု၍ အချင်းများပြီး လူသတ်သည့် အထိဖြစ်သွားရခြင်းဖြစ်ကြောင်း အသတ်ခံရသူ ဒေါ်ပိုးမြာ၏ […]