spot_imgspot_imgspot_imgspot_img
Wednesday, June 19, 2024
spot_imgspot_imgspot_imgspot_img

ကရင်နီပြည်က စစ်ဘေးရှောင်တွေမှာ ရေရှားပါးမှုဒဏ်ကြုံတွေ့နေရ

ကန္တာရဝတီတိုင်း(မ်)

ကရင်နီပြည်မှာ စစ်ဘေးရှောင်တွေဟာ စားနပ်ရိက္ခာအပြင် နွေရာသီ ရေရှားပါးမှုဒဏ်တွေနဲ့လည်း ကြုံတွေ့နေရတယ်လို့ စစ်ဘေးရှောင်တွေဆီကနေ သိရပါတယ်။

ဒီးမော့ဆိုအရှေ့ဘက်ခြမ်းမှာ နေထိုင်တဲ့ စစ်ရှောင်တစ်ဦးကတော့ ရေလွှတ်ပေးတဲ့ အချိန်မှာ ရေသွားခပ်နေရတယ်လို့ ဆိုပါတယ်။

“ မနက်ပိုင်းသွားခပ်မယ်ဆိုရင်လည်း မခပ်မှီဘူး။ ပြီးတော့ အချိန်နဲ့ပဲလွှတ်တယ်ရေက။ အဲ့ကြောင့် ကျမတို့ ညအချိန်သွားစောင့်ပြီးတော့ ခပ်ရတယ်။ ဘာလို့လဲဆိုတော့ ညဆို တညလုံးလာတယ်လေ။ မနက် ၈နာရီဆို ရေမလာတော့ဘူး။ ကျမတို့ ညပဲခပ်ရတယ်။ ကျမတို့ ညဆို မအိပ်ရဘူး။ ရေစောင့်ခပ်တယ်။ အဲ့လိုပေါ့။ မနက်ပိုင်းခပ်မယ်ဆိုရင် ရေကမလောက်တော့ဘူးလေ။ အဲ့ဒီရေပုံးကို ပြည့်အောင် မလာတော့ဘူးလေ။ သူတို့က ညပဲ လွှတ်တယ်ကော။ “ လို့ စစ်ရှောင်တစ်ဦးကပြောပါတယ်။

ကရင်နီပြည် ဒီးမော့ဆိုမြို့နယ်နဲ့ ဖရူဆိုမြိုနယ်လိုနေရာတွေမှာ နှစ်စဉ် နွေရာသီတိုင်းရေရှားပါးမှု ပြဿနာကြုံတွေ့နေရပါတယ်။ ဒီနှစ်မှာတော့ ဒီနေရာတွေမှာရှိရင်းစွဲလူတွေအပြင် စစ်ရှောင်တွေပါ ထပ်မံ ရောက်ရှိလာတာကြောင့် ရေရှားပါးမှုဒဏ်ပိုခံရတယ်လို့ ဖရူဆို ဒေသခံတစ်ဦးက ပြောပါတယ်။

တချို့စစ်ရှောင်စခန်းတွေမှာလည်း ရေရှားပါးတဲ့အတွက် ကိုယ်တိုင်မစိုက်ပျိုးနိုင်ပဲ စားနပ်ရိက္ခာတွေကို အလှူရှင်တွေဆီကနေ အဓိက မှီခိုနေရတယ်လို့ ဆိုပါတယ်။

“ ဟင်းတွေခါကျတော့ အလှူရှင်တွေလာပေးမှ မဟုတ်ရင် ကိုယ့်မှာလည်း မဖူလုံဘူး။ ကိုယ့်မှာ အခုစိုက်စားစရာလည်းမရှိဘူး။ ရေဆိုရင် အဝေးကြီး သွားခပ်ရတယ်ပေါ့နော။ အဲ့လိုဆို အပင်စိုက်မယ်ဆိုရင်လည်း လောင်းစရာရေလည်း မရှိဘူးပေါ့နော။ အဲ့တာကြောင့် ရေကအစ အခက်အခဲဖြစ်နေတယ်ပေါ့။ အကုန်လုံး အခက်အခဲဖြစ်တယ်ပေါ့နော။ ဒီမှာက။ “ စစ်ဘေးရှောင်တစ်ဦးက ပြောပါတယ်။

စစ်ရှောင်စခန်းတချို့မှာတော့ မသန့်ရှင်းတဲ့ရေတွေကိုတောင် အသုံးပြုနေရတယ်လို့ ဆိုပါတယ်။
လက်ရှိမှာတော့ ဒီးမော့ဆိုမြို့နယ်ရဲ့ တချို့စစ်ရှောင်စခန်းကိုတော့ ဒီးမော့ဆို့ CDM မီးတပ်ဌာနကနေပြီးရေတွေ ပို့ဆောင်ပေးနေတာရှိပါတယ်။

ကရင်နီပြည်နယ်မှာ နွေရာသီအတွက် သောက်သုံးရေရရှိဖို့ ဆိုင်ကယ်နဲ့ တစ်နာရီကြာအောင်သွားခပ်နေရတဲ့ ကျေးရွာတွေရှိပါတယ်။ လက်ရှိကရင်နီပြည်နယ်မှာတော့ နွေအစပိုင်းမှာတောင် ရေရှားပါးမှုဒဏ်ကြုံတွေ့နေရပြီး စက်သုံးဆီစျေးတွေလည်း အဆမတန်စျေးနှုန်းမြင့်တက်နေပါတယ်။

spot_img
spot_img