spot_imgspot_imgspot_imgspot_img
Friday, March 29, 2024
spot_imgspot_imgspot_imgspot_img

ကရင်နီပြည်မှာ တက္ကသိုလ်ဝင်တန်းစာမေးပွဲ ဖြေဆိုသူ (၉၂၁) ဦးရှိ

ဓါတ်ပုံ – Kayah State Media

ကန္တာရဝတီတိုင်း(မ်)

စစ်ကောင်စီလက်အောက်ခံ ပညာရေးဝန်ကြီးဌာနကနေ တစ်နိုင်ငံလုံးအတိုင်းအတာနဲ့ ဒီကနေ့ မတ်လ ၈ ရက် မနက်ပိုင်းကစလို့ တက္ကသိုလ်ဝင်တန်းစာမေးပွဲကို စတင်ကျင်းပနေပြီး ကရင်နီပြည်မှာ ပထမရက် စာမေးပွဲ ဝင်ရောက်ဖြေဆိုသူ (၉၂၁)ဦးရှိပြီး ဖြေဆိုတဲ့ရာခိုင်နှုန်း ၉၂.၅၆ ရှိတယ်လို့ သိရပါတယ်။

ကရင်နီပြည်မှ စာစစ်ဌာနတွေဖြစ်ကြတဲ့ အထက(၁) လွိုင်ကော်၊ အထက ဘောလခဲ၊ အထက ဖားဆောင်း၊ အထက မယ်စဲ့တို့ကနေ ဝင်ရောက်ဖြေဆိုမယ့်စာရင်းပေးထားသူ (၉၉၅)ဦးရှိပေမယ့် ဖြေဆိုသူ (၉၂၁)ဦးရှိပြီး ပျက်ကွက်သူ (၇၄)ဦးရှိခဲ့ပါတယ်။

တိုက်ပွဲဖြစ်ပွားမှုကြောင့် နေရပ်အိုးအိမ်စွန့်ခွာထွက်ပြေးရတဲ့ စစ်ရှောင်အများဆုံးဖြစ်တဲ့ ဒီးမော့ဆို၊ ဖရူဆို၊ ရှားတောမြို့ကလွဲ စစ်ကောင်စီအုပ်ချုပ်ရေးယန္တာရားလည်ပတ်နေတဲ့မြို့နယ်တွေမှာ စာစစ်ဌာနထားရှိပြီး ကျင်းပနေတာဖြစ်ပါတယ်။

ဒီကနေ့မနက်ပိုင်းမှာ လွိုင်ကော်မြို့ ရှိ အ.ထ.က(၁) ကျောင်းအနီးနဲ့ နာရီစင်အထိ လုံခြုံရေးတွေ တိုးချဲ့ချထားတယ်လို့ လွိုင်ကော်မြို့ဒေသခံတွေဆီကနေ သိရပါတယ်။

စစ်ကောင်စီခန့် ပြည်နယ်ဝန်ကြီးချုပ် ဦးဇော်မျိုးတင်နဲ့ တာဝန်ရှိသူတွေက စာဖြေဆိုတဲ့ အထက- ၁ ကျောင်းမှာ မြန်မာစာဘာသာရပ်စတင်ဖြေဆိုတဲ့ ကျောင်းသား၊ ကျောင်းသူတွေကို ကြည့်ရှုအားပေးခဲ့တယ်လို့ သိရပါတယ်။

“မြို့လမ်းကကြည့်ရင် ရဲစခန်းဘေးကနေ နာရီစင်နားထိ။ ဒီနေ့မှ လုံခြုံရေးချတာပေါ့ အရင်ရက်တွေမှာမရှိဘူး။ ရဲတွေနဲ့ မော်တော်ပီကယ်တွေများတယ်။ စစ်သားတွေကတော့သိပ်မတွေ့ဘူး ပုန်းနေတာလည်းဖြစ်နိုင်တာပဲ။”လို့ လွိုင်ကော်ဒေသခံတစ်ဦးက ပြောပါတယ်။

တက္ကသိုလ်ဝင်တန်းစာမေးပွဲကို စနစ်ဟောင်း နဲ့ဖြေဆိုတာ နောက်ဆုံးအကြိမ်ဖြစ်တဲ့အတွက် ဖြေခိုင်းလိုက်ရတယ်လို့ ကျောင်းသားမိဘတစ်ဦးက ပြောပါတယ်။

” ဒီနှစ်က စနစ်ဟောင်းတွေအတွက် နောက်ဆုံးနှစ်လို့ ပြောတယ်။နောက်နှစ်တွေဆို စနစ်သစ်ပဲရှိတော့မှာ ။ ဆိုတော့ ဒီနှစ် အောင်မှရမယ်။ မနှစ်က မဖြေဖြစ်ဘူး ။ ဒီနှစ်မဖြေရင် နောက်နှစ်ကျ စနစ်ဟောင်း မရှိတော့ဘူး ကြားတော့ ပြန်ဖြေခိုင်းလိုက်တယ် ” လို့ ကျောင်းသားမိဘတစ်ဦးက ဆိုပါတယ်။

စစ်ကောင်စီကျင်းပတဲ့ ၂၀၂၃ခုနှစ် တက္ကသိုလ်ဝင်တန်းစာမေးပွဲဟာ စနစ်ဟောင်း၊ သင်းရိုးဟောင်းနဲ့နောက်ဆုံးအကြိမ် ဖြေဆိုကြတာဖြစ်ပြီး လာမယ့်စာသင်နှစ်မှစ စနစ်သစ်နဲ့ ပြောင်းလဲသင်ကြားတော့မှာဖြစ်ပါတယ်။

စစ်ကောင်စီက တက္ကသိုလ်ဝင်စာမေးပွဲကို မတ်လ ၈ ရက်နေ့ကနေ ၁၈ ရက်နေ့အထိ ကျင်းပမယ်လို့ ကြေညာထားပါတယ်။ ပြီးခဲ့တဲ့ ၂၀၂၂ခုနှစ်မှာ ကရင်နီပြည်မှ ဝင်ရောက်ဖြေဆိုသူ (၅၇၅)ဦးရှိတဲ့အနက် အောင်မြင်သူ (၂၂၂)ဦးရှိပြီး ဒီနှစ်မှာ ဖြေဆိုသူဦးရေ ၃၀၀ကျော်တိုးလာတာဖြစ်ပါတယ်။

အာဏာမသိမ်းခင် ၂၀၁၉-၂၀ ခုနှစ် ကရင်နီပြည်မှာ တက္ကသိုလ်ဝင်တန်း ဖြေဆိုသူ ၈ထောင်နီးပါးရှိခဲ့ပြီး အောင်မြင်သူ ၂ထောင်ကျော် ရှိခဲ့ပါတယ်။

spot_img
spot_img