ကန္တာရဝတီတိုင်း( မ် )
ကရင်နီပြည် ဒီးမော့ဆိုမြို့ ဒေါငံခါးနဲ့ ကုန်းသာကျေးရွာအကြား တိုက်ပွဲအတွင်း ကျဆုံးသွားခဲ့တဲ့ DMO-PDF ရဲဘော်တစ်ဦးဖြစ်တဲ့ မောင်ဖရန်းမင်းအောင်( ခ ) ဘူးဒူကို ယမန်နေ့ စက်တင်ဘာလ ၁၁ရက်နေ့မှာ သင်္ဂြိုလ်ပြီးစီးခဲ့တယ်လို့ DMO-PDF တာဝန်ရှိသူ တစ်ဦးက ပြောပါတယ်။
အသက် ၁၉နှစ်ရှိပြီဖြစ်တဲ့ မောင်ဖရန်းမင်းအောင်( ခ ) ဘူးဒူဟာ ပြီးခဲ့တဲ့ စက်တင်ဘာလ ၉ရက်နေ့က ဒီးမော့ဆိုမြို့ ဒေါငံခါးနဲ့ ကုန်းသာကျေးရွာအကြား တိုက်ပွဲအတွင်း ကျဆုံးခဲ့တာဖြစ်တယ်လို့ သူက ပြောပါတယ်။
“ဒီ၉ရက်နေ့မှာ ဒီဒေါငံခါးကုန်းသာမှာပေါ့နော။ ဒေါငံခါး ကုန်းသာရွာကြားက တိုက်ပွဲမှာ ညနေပိုင်း ၇နာရီအချိန်ကနေ တိုက်ပွဲဖြစ်တော့ စကစ တော်တော် နီးကပ်တဲ့အထဲပါတော့ ဒီရဲဘော် ပေါ့။ သူကျဆုံးသွားတယ်။ သုံးယောက် ကျနော်တို့ရဲဘော်ကနေ အဲ့တစ်ယောက်ခါကျတော့ သေနတ်ကျည်က ဒီရင်ဘတ်ပေါ်မှာ တည့်တည့်ထိတယ်ပေါ့နော။ နှစ်ယောက်ခါကျတော့ လက်နက်ကျည်ရှပ်ထိတယ်။ နှစ်ယောက် သူတို့ထိခါကျတော့ ဒီရင်ဘတ်မှာ တည့်တည့်ထိတယ်လို့ ပြောလို့ရတယ်။ ၇နာရီမှာ တိုက်ပွဲဖြစ်ခါကျတော့ ညအချိန်မှာ ပစ်ရင်းနဲ့ ကျဆုံးသွားတယ်ပေါ့နော။” လို့ သူက ပြောပါတယ်။
နာရီဝက်ကြာဖြစ်ပွားခဲ့တဲ့ တိုက်ပွဲအတွင်း စစ်ကောင်စီဘက်က လက်နက်ကြီးတွေနဲ့ ပစ်ခတ်မှုရှိခဲ့သလို စစ်ကောင်စီဘက်ကလည်း နှစ်ဦး သေဆုံးခဲ့တယ်လို့ ဆိုပါတယ်။
ကရင်နီပြည်မှာ ၂၀၂၂ခုနှစ်အတွင်း စစ်ကောင်စီနဲ့ တော်လှန်တိုက်ခိုက်ရင်း DMO-PDF တပ်ဖွဲ့ဝင် ၁၄ဦး ကျဆုံးသွားခဲ့ရတယ်လို့ DMO-PDF ရဲ့ ထုတ်ပြန်ချက်တွေအရ သိရပါတယ်။
မိုးဗြဲမြို့အတွင်းမှာလည်း စစ်ကောင်စီနဲ့ ကရင်နီဒေသခံကာကွယ်ရေး ပူးပေါင်းတပ်ဖွဲ့တို့ စက်တင်ဘာလ ၈ရက်ကစပြီး ငါးရက်ဆက်တိုက် တိုက်ပွဲအပြင်းအထန်ဖြစ်ပွားနေပါတယ်။ တိုက်ပွဲအတွင်း အရပ်သားထိခိုက်သေဆုံးမှုနဲ့ နေအိမ်ထိခိုက်ပျက်စီးမှုတွေ ရှိသလို နှစ်ဦးနှစ်ဖက် ထိခိုက်မှုတွေလည်း ရှိနေတယ်လို့ သိရပါတယ်။
