ကန္တာရဝတီတိုင်း( မ် )
ကရင်နီပြည် လွိုင်ကော်မြို့အနောက်ဘက်ခြမ်း ဝါရီကောခူကျေးရွာနဲ့ ပီကင်းကောခူကျေးရွာမှာ လက်နက်ကြီး ကျေးရွာအတွင်း ကျရောက်ပြီးနောက်ပိုင်း ဒေသခံ လေးထောင်ကျော်ဟာ ကျေးရွာအတွင်းမှာ မနေထိုင်ရဲတော့ပဲ နီးစပ်ရာကျေးရွာတွေကို ထွက်ပြေးတိမ်းရှောင်နေရပါတယ်။
ယမန်နေ့ အောက်တိုဘာလ ၂၆ရက်နေ့ တစ်ရက်ထဲကို ဝါရီကောခူကျေးရွာနဲ့ ပီကင်းကောခူကျေးရွာမှာ လက်နက်ကြီးကျရောက်ခဲ့ပြီး အရပ်သား ၇ဦးထိခိုက်ဒဏ်ရာရခဲ့သလို အသက် ၅နှစ်အရွယ်ကလေးငယ်တစ်ဦး သေဆုံးခဲ့ရပါတယ်။
“မနက်ပိုင်းမှာလည်း စစ်ကောင်စီတွေရဲ့ ဒီလက်နက်ကြီးတွေ ပစ်ခတ်မှုတွေရယ်။ နောက်ပြီးတော့ မထင်မှတ်ပဲ ဒီရွာအလယ်မှာ ကျရောက်တဲ့အတွက်ကြောင့် သေဆုံးတဲ့လူဦးရေက ရှိသလို ဒဏ်ရာရတဲ့လူဦးရေကလည်း အများအပြားရှိတဲ့အတွက်ကြောင့် ကြောက်လန့်တာတွေလည်း အများကြီးပါလာတယ်။” လို့ ပီကင်းကောခူ ဒေသခံ ဦးခူးလို့က ပြောပါတယ်။
ဒေသခံတွေဟာ နီးစပ်ရာ ကျေးရွာတွေကို ယမန်နေ့ ( အောက်တိုဘာလ ၂၆ ရက်နေ့ ) မှာ ထွက်ပြေးတိမ်းရှောင်ခဲ့ရတယ်လို့ ဆိုပါတယ်။ ဝါရီကောခူကျေးရွာနဲ့ ပီကင်းကောခူကျေးရွာအနီးမှာ စိုက်ပျိုးပြီးစပါးတွေကို ရိတ်သိမ်းရမဲ့ အချိန်ဖြစ်တဲ့အတွက် စပါးတွေကို မရိတ်သိမ်းလိုက်ရမှာကိုလည်း ဒေသခံတွေက စိုးရိမ်နေကြပါတယ်။
“အခုအချိန်မှာ ရိတ်သိမ်းချိန်ရောက်လာတဲ့အတွက် သူတို့ ဒါကို ရိတ်သိမ်းနိုင်မှပဲ ပြီးခဲ့တဲ့ သုံးလေးလ၊ ငါးလ၊ ခြောက်လပေါ့။ စုပေါင်းထားတဲ့ ငွေတွေ ပြန်ရမှာဖြစ်တဲ့အတွက်ကြောင့်မလို့ ဒီလိုရိတ်သိမ်းချိန်မှာ ဒီလိုပစ်ခတ်မှုတွေ ရှိလာတဲ့အတွက် သူတို့တွေက အများကြီးအခက်အခဲဖြစ်တယ်။ ပြန်ရိတ်နိုင်မလား မရိတ်နိုင်ဘူးလာ။ ရိတ်ခဲ့ရင်တောင်မှ ပြန်လှန်းနိုင်မလား။ မလှန်းနိုင်ဘူးလားပေါ့။” လို့ ဒေသခံ ဦးခူးလို့က ပြောပါတယ်။
ဝါရီကောခူကျေးရွာနဲ့ ပီကင်းကောခူကျေးရွာက ဒေသခံတွေဟာ လယ်စပါးကို အဓိက စိုက်ပျိုးကြပြီး လက်ရှိမှာ စိုက်ပျိုးထားတဲ့ စပါးဧကရဲ့ သုံးပုံတစ်ပုံကိုသာ ရိတ်သိမ်းနိုင်ကြသေးတယ်လို့ သိရပါတယ်။
ဖယ်ခုံဇုံမှာရှိတဲ့ ကရင်နီအမျိုးသားများကာကွယ်ရေးတပ် တပ်ရင်း (၃) KNDF B-03 ကတော့
” တိုက်ပွဲပြင်းထန်နေတယ် နောက်မှချပြပေးမယ် ” လို့ ဒီကနေ့ (အောက်တိုဘာလ ၂၇ရက်နေ့) မနက်ပိုင်းမှာ လူမှုကွန်ယက်စာမျက်နှာကနေတဆင့် ဖော်ပြထားပါတယ်။
ကယ်ဆယ်ရေး ပိုင်း ကူညီဆောင်ရွက်ပေးနေတဲ့ ကယန်းလူငယ် ကယ်ဆယ်ရေး ပရဟိတအသင်းဝင် တစ်ဦးကလည်း ဝါရီကောခူ၊ ပီကင်းကောခူနဲ့ တစ်မိုင်အကွာလောက်မှာ လက်နက်ကြီး၊ လက်နက်ငယ် ပစ်ခတ်သံတွေ ကြားရတယ်လို့ ဆိုပါတယ်။
” မနက် ၉နာရီကနေ နေ့လည် ၁၁နာရီခွဲအထိပေါ့နော။ လက်နက်ကြီးရောထုတယ်။ ဖယ်ခုံ အရှေ့ဖက်ခြမ်း ကျနော်တို့ရွာအနားပဲ ဖယ်ခုံမြို့နယ် အရှေ့ဖက်ခြမ်းဖက်ပေါ့နော။ လက်နက်ငယ်ရော လက်နက်ကြီးရော အကုန်လုံး ထုတာကြားတယ် ပစ်တာကြားတယ်။ အဲ့ဒီမှာ တော်တော်လေး ပစ်တာကြားတယ်။ ” လို့ ကယန်းလူငယ် ကယ်ဆယ်ရေး ပရဟိတအသင်းဝင် တစ်ဦးက ပြောပါတယ်။
အောက်တိုဘာလ ၂၅ရက်နဲ့ ၂၆ရက်နေ့အတွင်း ဝါရီကောခူကျေးရွာနဲ့ ပီကင်းကောခူကျေးရွာမှာ လက်နက်ကြီး ကျရောက်တာတွေရှိခဲ့ပြီး ဝါရီကောခူက နေအိမ်နှစ်လုံးနဲ့ ပီကင်းကောခူက နေအိမ် ၁လုံး ပျက်စီးသွားတယ်လို့ ဒေသခံတွေဆီကနေ သိရပါတယ်။
