စစ်ကောင်စီပစ်ခတ်တဲ့လက်နက်ကြီး အသက် ၁၀နှစ်အရွယ်ကလေးကိုထိမှန်သေဆုံး၊ မိုးဗြဲတိုက်ပွဲအတွင်း စစ်ကောင်စီတပ်သား ၃၀ ကျော်သေဆုံး၊ တိုက်လေယာဉ်နှစ်စီးဖြင့် နာရီဝက်ကြာ ဗုံးကျဲတိုက်ခိုက်ခဲ့

ကန္တာရဝတီတိုင်း(မ်)

စက်တင်ဘာလ ၈ ရက်နေ့မှ ၉ရက်နေ့အထိ တိုက်ပွဲပြင်းထန်ခဲ့တဲ့ မိုးဗြဲမြို့မှာ စစ်ကောင်စီပစ်ခတ်ခဲ့တဲ့ လက်နက်ကြီး လူရှိရာနေရာကျရောက်ခဲ့ပြီးနောက် အသက် (၁၀)နှစ်အရွယ် ကလေးတစ်ဦးထိမှန်သေဆုံးနေတာကို ကယ်ဆယ်ရေးလုပ်ငန်းဆောင်ရွက်စဉ် တွေ့ရှိခဲ့တယ်လို့ KNDF သတင်းနှင့်ပြန်ကြားရေးက ဒီကနေ့ စက်တင်ဘာလ ၉ရက်နေ့ ညပိုင်းမှာ သတင်းထုတ်ပြန်ပါတယ်။

စက်တင်ဘာလ ၈ ရက်နေ့ မနက်ပိုင်းမှာ ဝါရီဆူးပလိုင်ဖက်မှ မိုးဗြဲမြို့ကို အင်အား ၁၀၀နီးပါး စစ်ကြောင်းထိုးဝင်ရောက်လာတဲ့ စစ်ကောင်စီတပ်ကို မိုးဗြဲမြို့ ပွဲကုန်း (၃) ရပ်ကွက်အနီးမှာ ကရင်နီပူးပေါင်းတပ်ဖွဲ့က တိုက်ခိုက်ခဲ့ရာမှ နှစ်ရက်ဆက်တိုက် တိုက်ပွဲပြင်းထန်စွာဖြစ်ပွားခဲ့တာပါ။ တိုက်ပွဲအတွင်း စစ်ကောင်စီဖက်မှ ၃၀ ကျော်သေဆုံး၊ ထိခိုက်ဒဏ်ရာရသူ များပြားခဲ့တဲ့အတွက် လက်နက်ကြီးအလွန်အကျွံ ပစ်ခတ်တိုက်ခိုက်မှု လုပ်ဆောင်ခဲ့တယ်လို့ ဆိုပါတယ်။

တပ်သားအထိနာတဲ့အတွက် ဒီကနေ့ စက်တင်ဘာလ ၉ရက်နေ့ ညနေပိုင်း ၃ နာရီအချိန်မှာ စစ်ကောင်စီဖက်က လေကြောင်းအသုံးပြုပြီး တိုက်လေယာဉ်နှစ်စီးနဲ့ နာရီဝက်ကြာ ဗုံးကျဲတိုက်ခိုက်ခဲ့တယ်လို့ KNDF က ထုတ်ပြန်ထားပါတယ်။

တိုက်ပွဲအတွင်းမှာလည်း ကရင်နီပူးပေါင်းတပ်ဖွဲ့က MA-1 သေနတ် (၂)လတ် ၊ MA -2 (၃)လတ်၊ MA-3 သေနတ် (၄)လတ် ၊ MG-3 စက်သေနတ် (၁)လတ်၊ လက်နက်ကြီးကျည်များ၊ ခဲယမ်းနဲ့ အသုံးအဆောင်တွေကို သိမ်းဆည်းရမိခဲ့ပါတယ်။

တိုက်ပွဲအတွင်း စစ်ကောင်စီဖက်က လက်နက်ကြီးအလွန်အကျွံအသုံးပြုပြီး လူနေရပ်ကွက်ထဲ ပစ်ခတ်တိုက်ခိုက်မှုရှိခဲ့ပြီး မိုးဗြဲမြို့အတွင်း ထိတွေ့တိုက်ပွဲဆက်လက်ဖြစ်ပွားနိုင်တဲ့အတွက် မိုးဗြဲမြို့ကို ပြည်သူတွေအနေနဲ့ဖြတ်သန်းသွားလာခြင်းမပြုလုပ်ဖို့ KNDF က အသိပေးထားပါတယ်။

မိုးဗြဲတိုက်ပွဲမှာတော့ ကရင်နီပူးပေါင်းတပ်ဖွဲ့ဖြစ်တဲ့ KNDF B- 03 ၊ B- 11 ၊ ကရင်နီတပ်မတော် KA ၊ မိုးဗြဲ PDF ၊ ဖယ်ခုံ PDF ၊ URF တို့ပူးပေါင်းပြီး စစ်ကောင်စီကို တိုက်ခိုက်ခဲ့တာလို့ KNDF က ထုတ်ပြန်ထားပါတယ်။