စည်းရုံးရေးဆင်းရာမှာ အနှောင့်အယှက်တွေနဲ့ ရင်ဆိုင်နေရတယ်လို့ ပြည်နယ်အခြေစိုက် တိုင်းရင်းသားပါတီပြော

မော်ဦးမြာ

ရွေးကောက်ပွဲအတွက် စည်းရုံးရေးဆင်းတဲ့အချိန်မှာ ပါတီခြား အမာခံလူထုတွေရဲ့ နှောင့်ယှက်မှုတွေကို ရင်ဆိုင်နေရတယ်လို့ ကယားပြည်နယ် ဒီမိုကရက်တီပါတီ KySDP မှ ပြည်နယ်လွှတ်တော် မဲဆန္ဒနယ် အမှတ် (၁)မှ ကိုယ်စားလှယ်လောင်း ဦးစတီဗင်ထွန်းထွန်းက ပြောပါတယ်။

“ ၁ ရက်နေ့က ကျနော်တို့ ငှားသွားတဲ့ကားကို မူးယစ်ဆေးရောင်းတယ်ဆိုပြီးတော့ သတင်းမှားပေးပြန်ရော သတင်းမှားပေးတာကို ရဲက ရောက်လာတာပါ။ ရဲက စစ်လိုက်လို့ ဘာမှ မတွေ့တဲ့ခါကျတော့ တဆက်တည်းမှာပဲ ဆွေးနွေးပွဲက လုပ်နေတဲ့ခါကျတော့ ဘယ်သူက ဦးဆောင်တာလဲ ဘယ်နယောက်လဲ စသဖြင့် မေးတော့ ကျနော်တို့လည်း ပြန်ရှင်းလိုက်တော့ ဒီအတိုင်းပဲ ပြန်သွားကြတယ်။ ဖြစ်တဲ့နေရာကတော့ ဝမ့်ကုန်းမှာ။” လို့ စတီဗင်ထွန်းထွန်းက ပြောပါတယ်။

ပြီးခဲ့တဲ့ ၁ ရက်နေ့မှာလည်း မူးယစ်ဆေးရောင်းနေကြောင်း သတင်းရရှိတယ်လို့ ဆိုကာ ဝမ့်ကုန်းမှာ ဒုတိယအကြိမ် လွိုင်လင်လေး ရဲစခန်းကနေ တာဝန်ရှိသူတွေက လာရောက်စစ်ဆေး မေးမြန်းသွားတယ်လို့ ဦးစတီဗင်ထွန်းထွန်းက ပြောပါတယ်။

ယခင်လကလည်း လွိုင်လေလင်းမှာ လူငယ်တွေက ဘောလုံးပွဲ ကျင်းပနေစဉ်မှာ လောင်းကစားလုပ်နေကြောင်း သတင်းရရှိတယ်လို့ ဆိုပြီး ပထမတစ်ကြိမ် လာရောက်စစ်ဆေးမေးမြန်းသွားတာလည်း ကြုံခဲ့ဖူးတယ်လို့ဆိုပါတယ်။

ဦးစတီဗင်ထွန်းထွန်းအနေနဲ့ လွိုင်ကော်မြို့နယ် ပြည်နယ်လွှတ်တော် မဲဆန္ဒနယ် အမှတ် (၁)နေရာမှာ ရွေးကောက်ပွဲ ဝင်ရောက်ယှဉ်ပြိုင်မှာဖြစ်ပါတယ်။

ပါတီကြီးတွေ စည်းရုံးရေးဆင်းတဲ့အခါမှာ တဖက်ပါတီတွေကို ထိုးနှက်ပြောဆိုတာမျိုး မဖြစ်စေချင်ပဲ နိုင်ငံရေးအားဖြင့်သာ ပြောဆိုစည်းရုံးစေချင်တယ်လို့ ကယားပြည်နယ် ဒီမိုကရက်တစ်ပါတီမှ ပြောရေးဆိုခွင့်ရှိသူ ဦးစိုင်းနိုင်နိုင်ထွေးက ပြောပါတယ်။

“ နိုင်ငံရေးအားဖြင့် ပြောဆိုတဲ့ ပါတီပဲ ဖြစ်စေချင်တယ်။ တစ်ဖက်ကို ပြောဆိုထိုးနှက်ပြီးမှ နိုင်ငံရေးအရ အားသာချက်ယူတယ်ဆိုရင်တော့ ဒါတွေဟာ မဲဆွယ်စည်းရုံးတဲ့ ကမ်ပိန်း သဘောသဘာဝမျိုးနဲ့ လုံးဝမဖြစ်သင့်တဲ့ ကိစ္စရပ်ပါ။ ဆိုတော့ နိုင်ငံရေးအားဖြင့် ပြောဆိုစည်းရုံးတဲ့ ပါတီတွေပဲ ဖြစ်စေချင်ပါတယ်။” လို့ ဦးစိုင်းနိုင်နိုင်ထွေးက ဆက်ပြောပါတယ်။

အထက်ပါ ပြောကြားချက်ကို အောက်တိုဘာလ ၂ ရက်နေ့မှာ ကယားပြည်နယ် ဒီမိုကရက်တစ်ပါတီ ရုံးချုပ် လွိုင်ကော်မှာ ပြုလုပ်တဲ့ သတင်းစာရှင်းလင်းပွဲမှာ ပြောကြားသွားတာ ဖြစ်ပါတယ်။ ၎င်းကိစ္စရပ်တွေကို မြို့နယ်တိုင်းမှာ ကြုံတွေ့နေရတယ်လို့လည်း သူက ပြောပါတယ်။

လွိုင်ကော်မြို့နယ်ထဲက အမျိုးသားလွှတ်တော် မဲဆန္ဒနယ် အမှတ် (၁၁) မော်မာရီထွန်းရဲ့ မဲဆန္ဒနယ် ဖြစ်တဲ့ လွိုင်လင်လေးမှာလည်း ဘောလုံးပွဲ ကျင်းပဖို့ စီစဉ်နေတဲ့အချိန်မှာ လောင်းကစားလုပ်နေတယ်လို့ဆိုပြီး ရဲတွေက လာရောက်မေးမြန်း စစ်ဆေးခဲ့တာလည်း ကြုံခဲ့ရတယ်လို့ သိရပါတယ်။

လက်ရှိမှာတော့ ရွေးကောက်ပွဲကော်မရှင်ကို တိုင်ကြားထားခြင်း မရှိပေမဲ့ သက်သေရလာတဲ့အခါမှာ တိုင်ကြားသွားမယ်လို့ စတီဗင်ထွန်းထွန်းက ပြောပါတယ်။

ရွေးကောက်ပွဲစည်းရုံးရေးကာလမှာ ကွင်းဆင်းမဲ့နေရာတွေကို ရွေးကောက်ပွဲ ကော်မရှင်ကို တင်ပြထားပြီးဖြစ်တဲ့အတွက် အခုလို လုပ်ဆောင်နေခြင်းကို ဖော်ထုတ်ဖို့လိုတယ်လို့ ဦးစတီဗင်ထွန်းထွန်းက ပြောပါတယ်။

လွိုင်ကော်မြို့နယ်အတွင်းရှိ မဲဆန္ဒနယ်တွေမှာလာမည့် ရွေးကောက်ပွဲအတွင်း ကယားပြည်နယ်ဒီမိုကရက်တစ်ပါတီအပါအဝင် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ၊ အမျိုးသားဒီမိုကရေစီ အဖွဲ့ချုပ် ၊ အမျိုးသားဒီမိုကရေစီ အင်အားစု၊ညီညွတ်သော ဒီမိုကရက်တစ်ပါတီ၊ ရှမ်းတိုင်းရင်းသားများ ဒီမိုကရေစီ အဖွဲ့ချုပ်၊ ပြည်ထောင်စု ကောင်းကျိုးဆောင်ပါတီ၊ တိုင်းရင်းသား စည်းလုံးညီညွှတ်ရေးပါတီ၊ အမျိုးသားနိုင်ငံရေး ဒီမိုကရက်တစ်ပါတီ၊ မြန်မာနိုင်ငံတောင်သူလယ်သမား အလုပ်သမားပြည်သူ့ပါတီ ၊ ပအိုဝ်းအမျိုးသားအဖွဲ့ချုပ်ပါတီတို့ကနေပြီး ကိုယ်စားလှယ်လောင်းအသီးသီး ဝင်ရောက်ယှဉ်ပြိုင်ကြမှာဖြစ်ပါတယ်။

Comments

comments

Next Post

Kayah Radio Oct 2nd Week

Sun Oct 4 , 2020
အပတ်စဉ် တင်ဆက်နေကျ တိုင်းရင်းသားဘာသာ ရေဒီယို အစီအစဉ် (ကယား)(တနင်္ဂနွေနေ့ ည ၇ နာရီတိုင်း)ယခု တစ်ပတ်မှာတော့ ကယားပြည်နယ်မှာ လက်ရှိအနိုင်ရပါတီဖြစ်တဲ့ NLD နဲ့ တိုင်းရင်းသားပါတီတို့ အင်အားပြ မဲဆွယ်စည်းရုံးမှု ပြုလုပ်ခဲ့ကြတယ်ဆိုတဲ့သတင်း၊ ကိုရိုနာဗိုင်းရပ်(စ်)ထိန်းချုပ်ရေးလုပ်ငန်းအတွက် ကုန်သွယ်ရေးလမ်းကြောင်းတွေပိတ်ထားတာကြောင့် ပြောင်းဝယ်သူတွေနည်းလာပြီး ဈေးတွေလည်း တဖြည်းဖြည်း ထိုးကျလာတဲ့အပေါ် ပြောင်းစိုက်တောင်သူတွေ စိုးရိမ်နေကြတယ်ဆိုတဲ့သတင်းနဲ့ “သေနတ်သံမကြားရင် ငြိမ်းချမ်းပြီလား” ဆိုတဲ့ဆောင်းပါးလေးအပြင် တေးရေး – Khu Prya Reh ရေးစပ်ထားပြီး တေးဆို – Khu Htel Pel သီဆိုထားတဲ့ “Amoe LoeMa TelNe Kayahli” ဆိုတဲ့ ကယားသီချင်းကောင်းလေး တစ်ပုဒ်တို့ကို ထုတ်လွှင့်တင်ဆက်ပေးသွားမှာ ဖြစ်ပါတယ်။ […]