ကန္တာရဝတီတိုင်း(မ်)
ဩဂုတ်လ ၁ဝ ရက်နေ့က လွိုင်ကော်မြို့နယ်ရှိ နေရာ နှစ်နေရာတွင် တရားမဝင်ခဲသတ္တုများကို တရားဝင်ရောင်းချရန် သိမ်းဆည်းထားသည်ကို သက်သေခံပစ္စည်းများနှင့်တကွ သိမ်းဆည်းရရှိခဲ့သော်လည်း ပစ္စည်းများ၏ ပို်င်ရှင်ကိုမူ ဩဂုတ်လ ၁၄ ရက်နေ့အထိ ဖမ်းမိရရှိခြင်း မရှိသေးကြောင်း လွိုင်ကော်မြို့၊ မြို့မရဲစခန်းမှ သိရသည်။
နေအိမ်သို့ ဝင်ရောက်ရှာဖွေရာနေ အိမ်ရှင်ကို တွေ့ရှိရခြင်း မရှိဘဲ သက်သေခံပစ္စည်းများကိုသာ တွေ့ရှိရခြင်းဖြစ်ကြောင်း ရဲမှတ်တမ်းတွင် ဖေါ်ပြထားသည်။ အမှုဖွင့်ထားသော ၁၁ ရက်နေ့အထိ အဆိုပါ ပိုင်ရှင်များကိုလည်း စုံစမ်းဆဲဖြစ်ကြောင်း သိရသည်။
ခဲသတ္တုမာျး တွေ့ရှိခဲ့သော အိမ်ပိုင်ရှင်ကို ရှာဖွေဖေါ်ထုတ်ရန် လုပ်ဆောင်နေသည်ဟု
အဆိုပါ အမှုကို အမှုစစ်အဖြစ်တာဝန်ယူထားသူ ဒုရဲအုပ် ငြိမ်းဇော်မင်းက ကန္တာရဝတီတိုင်း(မ်)ကို ဩဂုတ်လ ၁၄ ရက်နေ့ ၁၁ နာရီအချိန်က အတည်ပြု ပြောကြားသည်။
“မနေ့ညကတော့ ကယန်းပြည်သစ်က ဗိုလ်မှူး နဲ့တွေ့တယ်။ သူတို့ အပ်ပေးမယ်ပြောတယ်။ လောလောဆယ်တော့ တရာခံကို မမိသေးဘူး။”ဟု ဒုရဲအုပ် ငြိမ်းဇော်မင်းက ပြောကြားသည်။
ကယားပြည်နယ်အစိုးရအဖွဲ့၏ ညွှန်ကြားချက်ဖြင့် ပြည်နယ်မှုခင်းအကူရဲတပ်ဖွဲ့ ရဲအုပ်ခင်ကိုကို၊ ခရိုင်မှုခင်းနှိမ်နင်းရေးအဖွဲ့ ရဲအုပ်ဇော်မင်းဦး၊ မြို့မရဲစခန်းမှ နယ်ထိန်း ဒုရဲအုပ်ငြိမ်းဇော်မင်း၊ မိုင်းလုံးရပ်ကွက်အုပ်ချုပ်ရေးမှူးနှင့် အုပ်စုအုပ်ချုပ်ရေးမှူး ဦးဦးရယ်တို့ ပါဝင်သော ပူးပေါင်းအဖွဲ့က အဆိုပါ တရားမဝင်ခဲသတ္တုများကို ရှောင်တခင် ဝင်ရောက်စစ်ဆေး ဖမ်းဆီး ရရှိခဲ့ခြင်းဖြစ်သည်။
ဩဂုတ်လ ည ၁၁ နာရီခွဲ အချိန်က လွိုင်ကော်မြို့ မိုင်းလုံးရပ်ကွက်၊ မြစိမ်းရောင်လမ်း၊ အိမ်အမှတ်/၄၆၂(က) ခြံဝန်းအတွင်းရှိ ဂိုဒေါင်အတွင်း၌ ပိဿာခဲသတ္တု ၂၉ အိတ်၊ အိတ်ချုပ်ရာတွင် အသုံးပြုသော ချုပ်စက် ၂ လုံး၊ ချိန်တွယ်ကတ္တား ၁ လုံးနှင့် သတ္တုများ ထုတ်ပိုးရာတွင် အသုံးပြုသော ဆက်စပ်ပစ္စည်းများ တွေ့ရှိရသဖြင့် တာဝန်ရှိသူများမှ မျက်မြင်ရှေ့မှောက်တွင် ရှာဖွေသိမ်းဆည်းခဲ့သည်။
ထို့အပြင် ဩဂုတ်လ ၁၁ ရက်နေ့ နံနက် ၃ နာရီခွဲ အချိန်တွင် ပန်ကန်းကျေးရွာအုပ်စု၊ ထူဒူငံသကျေးရွာ၊ (အ.မ.က)စာသင်ကျောင်းအနီးရှိ ခြံဝန်းအတွင်းရှိ ဂိုဒေါင်တွင် သတ္တုအမှုန့့်ကြိတ်စက်တစ်လုံးနှင့်တွဲလျှက် ကိုဘိုတာစက် ၁ လုံး၊ သတ္တုအမှုန် ၃ ပိဿာခွဲနှင့် သတ္တုများ ထုတ်ပိုးရာတွင် အသုံးပြုသော အခြားသက်သေခံပစ္စည်းများ တွေ့ရှိခဲ့သည်။
အဆိုပါ သတ္တုများသည် တာဝန်ရှိသူများမှ ထုတ်ပေးထားသော အထောက်အထားများမပါရှိခြင်းကြောင့် တရားမဝင်ခဲသတ္တုဖြစ်သည်ဟု မော်ချီးသတ္တုတွင်းရုံးခွဲ ရုံးခွဲတာဝန်ခံအင်ဂျင်နီယာ ဦးစန်းဝင်းအောင်က ကန္တာရဝတီတိုင်း(မ်)သို့ အတည်ပြုသည်။
“အခုတွေ့ရှိရတဲ့ခဲကတော့ သတ္တုတွင်း လုပ်ထုံးလုပ်နည်းအရဆိုရင် တရားမဝင်သတ္တုလို့ သတ်မှတ်လို့ရတယ်။ သတ္တုတွင်း အထောက်အထား၊ သတ္တုတွင်း ကုန်ပို့လွှာတို့ ဘာမှ မရှိဘူး။”ဟု ဦးစန်းဝင်းအောင်က ပြောကြားသည်။
အဆိုပါ တရားမဝင်ခဲသတ္တု လက်ဝယ်သိမ်းဆည်းထားခြင်းအား လွိုင်ကော်မြို့ မြို့မရဲစခန်းတွင် (ပ) ၁၀၆/၂၀၁ရနှင့် (ပ)၁၀၇/၂၁၀ရ ဖြင့် မော်ချီးသတ္တုတွင်းရုံးခွဲ ရုံးခွဲတာဝန်ခံအင်ဂျင်နီယာ ဦးစန်းဝင်းအောင်က ဩဂုတ်လ ၁၁ ရက်နေ့က တရားလိုပြုလုပ်ပြီး တိုင်ကြားထားသည်။
