ကန္တာရဝတီတိုင်း(မ်)
ယမန်ညက ဒီမော့ဆိုမြို့နယ် ဒေါပိုးစီနဲ့ ၆ မိုင်ကျေးရွာအနီးတစ်ဝိုက်မှာ ကရင်နီတပ်မတော်(KA)၊ ကရင်နီအမျိုးသားများကာကွယ်ရေးတပ်(KNDF) ပူးပေါင်းပြီး အကြမ်းစစ်ကောင်စီတပ်နဲ့ တိုက်ပွဲဖြစ်ပွားခဲ့ရာ ကရင်နီတပ်မတော်မှ တပ်ကြီးကြီးအဆင့်ရှိသူ တစ်ဦး လက်နက်ကြီးထိမှန်ပြီး ဆေးကုသမှုခံယူခဲ့ပေမယ့် ဒီကနေ့ စက်တင်ဘာလ ၁၇ ရက်နေ့ နေ့ခင်းပိုင်းမှာ ကျဆုံးသွားတယ်လို့ KNDF မှ ပြောဆိုခွင့်ရသူတစ်ဦးက ပြောပါတယ်။
“ညအချိန်က လွိုင်ကော်ကနေ တပ်မ ဘယ်လောက်လဲ ကျနော်တို့သေချာမသိဘူး။ အင်အား ၁၀၀ကျော် လွိုင်ကော်ကနေ ဒီမော့ဆိုဖက် သူတို့စစ်ကြောင်းထိုးလာတာပေါ့။ ည ၇ နာရီလောက်မှာ စပြီးပစ်ခတ်ကြတယ်။ မိုးလည်းရွာနေတယ် အဲ့ဒါ ၈ နာရီလောက်မှာ ရပ်သွားတယ်။ ကျသွားတဲ့တစ်ယောက်က KA က တပ်ကြီးကြီးပေါ့လေ။ လက်နက်ကြီးထိမှန်ပြီးကျသွားတာ။ သူဆုံးသွားတာတော့ ခုနလေးတင်ပဲပေါ့။ ဒီချိန်ထိဆို တစ်နာရီကျော်လောက်ပဲရှိသေးတယ်။”လို့ KNDF ပြောဆိုရသူတစ်ဦးက ကန္တာရဝတီတိုင်း(မ်)ကို နေ့ခင်း ၁၂နာရီခွဲအချိန်မှာ အတည်ပြု ပြောဆိုပါတယ်။
ကရင်နီတပ်မတော်မှ တပ်ကြပ်ကြီးဖြစ်သူ နားရယ်(ခေါ်) အယ်ဒီ ဟာ လက်နက်ကြီးထိမှန်ခဲ့ပြီး တောတွင်းဆေးခန်းတစ်နေရာမှာ အသက်ဆုံးရှုံးခဲ့တာပဲ ဖြစ်ပါတယ်။
တိုက်ပွဲအတွင်းမှာ ကရင်နီတပ်မတော်မှ တပ်ကြပ်ကြီးတစ်ဦးကျဆုံးခဲ့ပြီး ထိခိုက်ဒဏ်ရာရရှိသူ မရှိခဲ့သလို အကြမ်းဖက်စစ်ကောင်စီဖက်မှ သေဆုံးမှု၊ ထိခိုက်မှု ရှိမရှိကို မသိရှိရဘူးလို့ KNDF မှ ပြောဆိုခွင့်ရသူတစ်ဦးက ဆက်ပြောပါတယ်။
စစ်ရှောင်စခန်းသို့ ဦးတည်သွားနေတဲ့ အကြမ်းဖက်စစ်ကောင်စီတပ် အင်အား ၁၀၀ကျော်ကို KNDF ပူးပေါင်းတပ်မှ စက်တင်ဘာလ ၁၆ ရက်နေ့ ညပိုင်း ၇ နာရီကျော်မှာ စတင်တိုက်ခိုက်ခဲ့ပြီး ၄၅မိနစ်ကြာ ထိတွေ့တိုက်ပွဲဖြစ်ပွားခဲ့တယ်လို့ သိရပါတယ်။
စက်တင်ဘာလ ၁၆ ရက်နေ့ ညနေပိုင်းမှာ လွိုင်ကော်မြို့ဖက်ကနေ စစ်ကား ၅စီးအထက်နဲ့ အင်အား ၁၀၀ကျော် က ဒီမော့ဆိုမြို့နယ်ဖက်ကို ဦးတည်ဆင်းသွားခဲ့သလို တိုက်ပွဲမှာ စစ်ကောင်စီတပ်မှ လက်နက်ကြီးတွေနဲ့ အဆက်မပြတ်ပစ်ခတ်ခဲ့တယ်လို့ သိရပါတယ်။
ပြည်သူတွေအနေနဲ့ တိုက်ပွဲဖြစ်ပွားရာ ဒီမော့ဆိုမြို့နယ်၊ ဒေါပိုးစီ နဲ့ စံပြ (၆)မိုင်ကျေးရွာတို့မှ ဖရူဆိုမြို့နယ် ကဒါးလားကျေးရွာအထိ၊ လွိုင်ကော်-ဒီမော့ဆို-ဖရူဆို လမ်းတစ်လျှောက် ညနေ ၆နာရီမှ နံနက် ၆ နာရီအထိ ခရီးသွားလာခြင်းမပြုဖို့ KNDF သတင်းနှင့်ပြန်ကြားရေးဌာနက စက်တင်ဘာလ (၁၆)ရက်နေ့ မှာ အသိပေးထုတ်ပြန်ထားပါတယ်။
“သွားလာလုပ်ရှားမှုကတော့ လိုအပ်မှပဲအပြင်ထွက်ကြဖို့ ကျနော်တို့အနေနဲ့ကတော့ သူတို့ကို အဲ့ဒါပဲ ပန်ကြားချင်တယ်လေ ဘာဖြစ်လို့လဲဆိုရင် တိုက်ပွဲက နေရာမရွေး အချိန်မရွေးဖြစ်နိုင်တယ်ပေါ့။ အရေးကြီးမှသာ ထွက်ကြဖို့ပဲ အဲ့ဒါပဲ မှာကြားချင်ပါတယ်” လို့ KNDF ပြောဆိုခွင့်ရသူက အသိပေးထားပါတယ်။
KA၊ KNDFပူးပေါင်းတပ်နဲ့ စစ်ကောင်စီတပ်တို့ နေ့စဉ် တိုက်ပွဲဖြစ်ပွားလျက်ရှိနေပြီး KNDF အနေနဲ့ အကြမ်းဖက်စစ်ကောင်စီတပ်ကို ကရင်နီပြည်တစ်ဝန်းလုံးအတိုင်းအတာနဲ့ စစ်မျက်နှာဖွင့်ပြီး အမြစ်ပြတ်ခြေမှုန်းသွားမှာဖြစ်တယ်လို့လည်း ထုတ်ပြန်ထားတာရှိပါတယ်။
