တနိုင်ငံလုံးဆိုင်ရာ အရပ်ဘက်အဖွဲ့အစည်းများ၏ ငြိမ်းချမ်းရေးဖိုရမ်သို့ တက်ရောက်နိုင်ရန် အဆင်သင့်မဖြစ်သေး

ထျိုးမြာ

ပထမအကြိမ် တနိုင်ငံလုံးဆိုင်ရာ အရပ်ဘက်အဖွဲ့အစည်းများ၏ ငြိမ်းချမ်းရေးဖိုရမ်သို့ ကယား(ကရင်နီ)ပြည်နယ်ရှိအရပ်ဘက်အဖွဲ့အစည်းများ တက်ရောက်နိုင်ရန် အဆင်သင့်မဖြစ်သေးကြောင်း ကရင်နီလူမှုဖူလုံရေးနှင့် ဖွံ့ဖြိုးရေးပင်မ(KSWDC) ပြည်တွင်းတာဝန်ခံ ကိုဗညားက ပြောသည်။

“ကျနော်တို့စဉ်းစားထားတာက ကယား(ကရင်နီ)ပြည်နယ်မှာရှိတဲ့ အရပ်ဘက်အဖွဲ့အစည်းတွေနဲ့ အခုကျင်းပမဲ့ပထမဦးဆုံးအကြိမ် peace forum မှာ အဆင်သင့် မဖြစ်နေသေးတဲ့အပေါ်မှာ ကျနော်တို့ ဒီပထမအကြိမ်ကိုတော့ ကျနော်တို့ သွားနိုင်မှာမဟုတ်ဘူးပေါ့နော။ ကျနော်တို့မှာ အကြောင်းအရာတွေ ကိစ္စတွေ အများကြီးကျန်သေးတယ်။ ဖြစ်စဉ်တစ်ခုလုံးကို ကျနော်တို့က မကြေညပ်တာတွေရှိသေးတယ်။ အဲ့ဒါကြောင့်မလို့ မသွားနိုင်သေးဘူး” ကိုဗညားကပြောပါသည်။

ငြိမ်းချမ်းရေးဖြစ်စဉ်ကို မကြိုက်မနှစ်၍ ဖိုရမ်ကို မတက်ရောက်ခြင်းမဟုတ်ဘဲ အခြေအနေတစ်ခုအပေါ်တွင် ဂဃနဏ နှင့်အကြေအလည် ဆွေးနွေးဖို့ရန် လိုအပ်သေးသောကြောင့် ဖြစ်သည်ဟုဆိုသည်။

ဇန်နဝါရီလ(၁၄)ရက်နေ့ လွိုင်ကော်မြို့စေတမန် ခန်းမဆောင်တွင် ပြည်နယ်အတွင်းရှိ အရပ်ဘက်အဖွဲ့အစည်းပေါင်း ၂၄ ဖွဲ့က အကြိတ်အနယ်ဆွေးနွေးပြီး သဘောထား ချမှတ်ခဲ့ကြခြင်းဖြစ်သည်။

လူမှုအရပ်ဘက် အဖွဲ့အစည်းအနေနှင့်လည်း ဖိုရမ်တွင် ဒုက္ခသည်ပြန်လည်နေရာချထားရေး ကိစ္စရပ်များလည်း ဆွေနွေးသင့်သည့်အတွက် ထည့်သွင်းဆွေးနွေးမည့် မူပေါ်လစီများအဆင်သင့် မရှိသေးသည့်အတွက် ဖိုရမ်မတက်နိုင်သေးကြောင်း ကရင်နီအမျိုးသမီးအဖွဲ့အစည်း မှ အထွေထွေအတွင်းရေးမှူး မမီးမီးကပြောပါသည်။

“အမတို့ CSOs တွေအနေနဲ့ဆွေးနွေးရမှာကလည်း ပြန်လည်နေရာချထားရေးတွေလည်း ပါတယ်လေး။ ဆိုတော့ ပြန်လည်နေရာချထားရေးကိစ္စမှာ ဆွေးနွေးမယ်ဆိုတော့ အမတို့ဘက်က အဆင်သင့်မဖြစ်သေးဘူးဆိုတာ ဒီ refugee ကိစ္စတွေမှာ အားလုံးသွားမဲ့သူတွေက တစ်သံတည်း ထွက်ပါ့မလားပေါ့။ အဲ့ကိစ္စတွေကမူပေါ်လစီမျိုးကို ချမှတ်ထားတာတွေမျိုးလည်း သေချာလည်း အမတို့ဘက်မှာ မဆွေးနွေးရသေးဘူးပေါ့နော” ဟု မမီးမီးကပြောသည်။
တနိုင်ငံလုံးဆိုင်ရာ အရပ်ဘက်အဖွဲ့အစည်း၏ ငြိမ်းချမ်းရေးဖိုရမ်တွင် ဆွေးနွေးမည့် အကြောင်းအရာအလိုက် ခေါင်းစဉ်များမှာ လူမှုရေး၊ စီးပွားရေး၊ မြေယာနှင့်သယံဇာသ စသည်တို့ ပါဝင်ထည့်သွင်း ဆွေးနွေးသွားကြမည်ဟု သိရသည်။
ယခုဖိုရမ်မှ ရရှိလာသည့် အရပ်ဘက်အဖွဲ့အစည်းများ၏ အချက်အလက်များကို ၂၁ ရာစု ဒုတိယအကြိမ် ပင်လုံညီလာခံတွင် ထည့်သွင်း ဆွေးနွေးနိုင်ရန် ပြည်ထောင်စု ငြိမ်းချမ်းရေး ဆွေးနွေးမှုပူးတွဲကော်မတီ (UPDJC) မှတဆင့် ပေးအပ်သွားနိုင်ရန် ဖြစ်သည်။

တနိုင်ငံလုံးဆိုင်ရာ အရပ်ဘက်အဖွဲ့အစည်း၏ ငြိမ်းချမ်းရေးဖိုရမ် ဖြစ်မြောက်ရေးကော်မတီမှ ပထမအကြိမ်ပြုလုပ်မည့် အရပ်ဘက် အဖွဲ့အစည်းဖိုရမ်ကို ဇန်နဝါရီလ ၂၉ ရက်နေ့မှ ၃၁ ရက်နေ့အထိ ပြုလုပ်မည်ဟု လျာထားကြောင်းသိရသည်။

တနိုင်ငံလုံးဆိုင်ရာ အရပ်ဘက်အဖွဲ့အစည်း၏ ငြိမ်းချမ်းရေးဖိုရမ်သို့ ယခု ပထမအကြိမ် ကယား(ကရင်နီ)ပြည်နယ် အရပ်ဘက်အဖွဲ့အစည်းများ မတက်ရောက်နိုင်သေးသော်လည်း ဒုတိယအကြိမ်ဖိုရမ်တွင် တက်ရောက်နိုင်ရန် ပြင်ဆင်သွားမည်ဟုလည်း သိရသည်။

Comments

comments

Next Post

ဆိုင်ခန်းခပိုပေးရသည်ဟု တိုင်တန်းထားသူများကို ငွေပြန်အမ်းမည်

Wed Jan 18 , 2017
စိုင်းလင်းလင်းဦး ၆၅ နှစ်မြောက် ကယားပြည်နယ်နေ့ ပွဲဈေးဆိုင်ခန်းနေရာဝယ်ယူရာတွင် သတ်မှတ်ထားသော အခကြေးငွေထက် ပိုမိုပေးဆောင်ရသော ဆိုင်ခန်းဝယ်ယူသူများအား ငွေပြန်အမ်းပေးမည်ဟု သိရသည်။ ပွဲတော်၌ ဈေးရောင်းချရန်အတွက် နေရာချပေးထားသော ဆိုင်ခန်းနေရာများကို ဝယ်ယူရာ၌ အစိုးရမှ သတ်မှတ်ထားသော ဈေးနှုန်းထက်ကြီးနေခြင်းသာမက ယခင်နှစ်ကပေးဝယ်ရသော ဈေးနှုန်းများထက်ပင် ပိုများနေခြင်းကြောင့် ဆိုင်ခန်း ဝယ်ယူသူများမှ ဇန်နဝါရီလ ၁၈ ရက်နေ့က ပြည်နယ်အစိုးရရုံးထံသို့ လာရောက်တိုင်တန်းခဲ့ကြသည်။ ထို့နောက် ငွေပြန်အမ်းပေးမည်ဟု ဆိုင်ခန်းများနေရာချထားရေး၊ စစ်ဆေးရေးနှင့် သန့်ရှင်းရေးဆပ်ကော်မတီမှ အတွင်းရေးမှူး ဦးရဲနိုင်အောင်က မိမိတို့ကို ပြောဆိုခဲ့ခြင်းဖြစ်ကြောင်း ပြည်နယ်အစိုးရထံ သွားရောက်တိုင်တန်းရာတွင်ပါဝင်ခဲ့သည့် ပွဲဈေးတန်း၌ အထည်ဆိုင်ခန်းဝယ်ယူထားသော လွိုင်ကော်မြို့ခံတစ်ဦးဖြစ်သူ ကိုကျော်သူက ပြောသည်။ “ကျနော်တို့ တိုင်တဲ့သူတွေကိုပဲ တာဝန်ယူပေးမယ်။ ကျန်တဲ့သူတွေကိုတော့ ကိုယ်ကိစ္စမဟုတ်ဘူး […]

ဆက်စပ်သတင်းများ