ထျိုးမြာ

၂၁ရာစု ပင်လုံ ပြည်ထောင်စုငြိမ်းချမ်းရေးဆွေးနွေးပွဲ ဒုတိယအစည်းအဝေး ကျင်းပမည့်ရက်ကို ရွှေ့ဆိုင်းလိုက်သော်လည်း မြန်မာနိုင်ငံလုံးဆိုင်ရာ အရပ်ဘက်အဖွဲ့အစည်းဖိုရမ်တွင် အကြောင်းအရာအလိုက် ခေါင်းစဉ်များကို ဆွေးနွေးရန် မရှိဟု မြန်မာနိုင်ငံCSOs ဖိုရမ်ဖြစ်မြောက်ရေးကော်မတီ ဦးဆောင်သူ ကိုသွင်လင်းအောင်ကပြောသည်။

“ကျနော်ဘက်ကတော့ ဒီတစ်ကြိမ်မှာတော့ ဒီissues တွေကို ဆွေးနွေးအုံးမှာ မဟုတ်သေးဘူး။ ဒါပေမဲ့ ဘယ်လိုစဉ်းစားထားလဲဆိုတော့ ဒီတစ်ကြိမ်မှာတော့ ကျနော်တို့ CSOs တွေက ဒီနိုင်ငံရေးတည်ဆောက်ရေးဆိုတဲ့ပုံစံမျိုးနဲ့ကို ကျနော်တို့ပြည့်ပြည့်စုံစုံ ဆွေးနွေးပြီးသွားသင့်တယ်ဆိုတဲ့ စဉ်းစားချက်ရှိတယ်။ အဲ့တော့ နိိုင်ငံရေးတည်ဆောက်မှုနဲ့သွားရင် ဘယ်လိုမူဝါဒမျိုးတွေ အခြေခံမလဲဆိုတာမျိုးကို တော့ ကျနော်တို့က စဉ်းစားဖို့ရှိတယ်။ ဆိုတော့ အဲ့ထဲကမှ အကြောင်းအရာလိုက် အမျိုးသားနိုင်ငံရေးဆွေးနွေးပွဲနဲ့ဆိုင်တဲ့ အခြေခံမူတွေ ပါလာရင်တော့ အဲ့ဒါမျိုးကတော့ သူတို့ဘက်ကို ရရှိချက်တွေအနေနဲ့ တင်သွားတာမျိုးတော့ ရှိကောင်းရှိလာနိုင်တယ်” ဟု ၎င်းကပြောသည်။

၂၁ရာစုပင်လုံပြည်ထောင်စုငြိမ်းချမ်းရေးညီလာခံသည် ဆက်လက်ဆောင်ရွက်သွားရဦးမည်ဖြစ်၍ ရှေ့ဆက်သွားမည့် လုပ်ငန်းစဉ် အခင်းအကျင်းနှင့် ပတ်သက်၍ ဆွေးနွေးကြမည်ဟု မွန်ပြည်နယ်CSOs ဖိုရမ် ဖြစ်မြောက်ရေး ကော်မတီခေါင်းဆောင် မင်းအောင်ထူး က ပြောသည်။

အရပ်ဘက် အဖွဲ့အစည်းများအနေဖြင့် သေချာသောအခြေခံအခင်းအကျင်းများကို မတည်ဆောက်ထားဘဲ သွားရောက်ဆွေးနွေးလျှင်အချင်းချင်းကြားတွင်လည်း စိတ်ဝမ်းကွဲမှုများ ရသွားနိုင်ကြောင်း၎င်းက ဆိုသည်။ ထို့ကြောင့် UPDJC မှချမှတ်ပေးထားသောခေါင်းစဉ်များအပေါ် မည်သည့်ပုံစံမျိုးနှင့်ဆွေးနွေးပြီး ကော်မတီများကို မည်သို့ ဖွဲ့စည်းကြမည်ဟူသော အပိုင်းကိုသာလျှင် ဆွေးနွေးသွားကြမည်ဖြစ်ကြောင်း သိရသည်။

“နေပြည်တော်မှာ ပထမအကြိမ်ဖိုရမ်သည် ကျနော်တို့နှစ်ရက်ပဲလုပ်မှာဖြစ်တယ်။ issues တွေက ဆွေးနွေးရမှာ အများကြီးရှိတယ်။ ဆိုတော့ နောက်တစ်ကြိမ်ဖိုရမ်မှာမှ ကျနော်တို့ ဒီissuesတွေကို ဆွေးနွေးသွားမှာဖြစ်တယ်လို့ ဆုံးဖြတ်ထားတာရှိပါတယ် ” ဟု မင်းအောင်ထူးကပြောသည်။

မြန်မာနိုင်ငံလုံးဆိုင်ရာ CSOs ဖိုရမ်ကို ဖေဖော်ဝါရီလ (၂၄, ၂၅ ) ရက်နေ့ နေပြည်တော်တွင် ကျင်းပ ပြုလုပ်သွားမည်ဖြစ်ပြီး အကြိုဖိုရမ်တစ်ခုကို ဖေဖော်ဝါရီလ (၂၂,၂၃) ရက်နေ့၌ တောင်ကြီးတွင် ကျင်းပ ပြုလုပ်သွားမည်ဖြစ်သည်။

တစ်ချို့သောတိုင်းနှင့်ပြည်နယ်ရှိ အရပ်ဘက်အဖွဲ့အစည်းတစ်ချို့သည် မြန်မာနိုင်ငံလုံးဆိုင်ရာ CSOs ဖိုရမ်သို့ တက်ရောက်ရန်အဆင်သင့်မဖြစ်ကြသေးသောကြောင့် တောင်ကြီးတွင်ပြုလုပ်မည့် အကြိုဖိုရမ်ကိုသာ တက်ရောက်ပြီး နေပြည်တော်တွင်ပြုလုပ်မည့် ဖိုရမ်ကို မတက်နိင်သော အဖွဲ့လည်းရှိသည် ဟု မြန်မာနိုင်ငံ CSOs ဖိုရမ် ဖြစ်မြောက်ရေးကော်မတီထံမှ သိရသည်။

အရပ်ဘက်အဖွဲ့အစည်းများ ဦးဆောင်ကျင်းပရမည်ဖြစ်သည့် ပြည်ထောင်စုငြိမ်းချမ်းရေး ဆွေးနွေးမှုပူးတွဲကော်မတီ (UPDJC) မှ ချမှတ်ထားသော အကြောင်းအရာအလိုက်ခေါင်းစဉ်များမှာ လူမှုရေး၊ စီးပွားရေး၊ မြေယာနှင့် သဘာဝတ်ပတ်ဝန်းကျင်ဆိုင်ရာ မူဝါဒတို့ဖြစ်သည်။

Comments

comments